AKP ភ្នំពេញ ថ្ងៃទី៩ ខែតុលា ឆ្នាំ២០២៦--សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោក ឡេ មិញហ៉ឹង (Le Minh Hung) នាយករដ្ឋមន្ត្រីនៃសាធារណរដ្ឋសង្គមនិយមវៀតណាម នាល្ងាចថ្ងៃទី០៩ ខែតុលា ឆ្នាំ២០២៦នេះ បានអញ្ជើញជាអធិបតីភាពរួមគ្នាក្នុងពិធីបើក «វេទិកាធុរកិច្ចកម្ពុជា-វៀតណាម» (Cambodia-Vietnam Business Forum) នៅសណ្ឋាគារ សូហ្វីតែល ភ្នំពេញ ភូគីត្រា។
«វេទិកាធុរកិច្ចកម្ពុជា-វៀតណាម» គឺជាព្រឹត្តិការណ៍សេដ្ឋកិច្ចដ៏មានសារសំខាន់មួយ ដែលត្រូវបានរៀបចំឡើងជាបន្តបន្ទាប់ ដើម្បីជំរុញកិច្ចសហប្រតិបត្តិការណ៍ពាណិជ្ជកម្ម ការវិនិយោគ និងការតភ្ជាប់ទំនាក់ទំនងធុរកិច្ចឱ្យកាន់តែជិតស្និទ្ធរវាងប្រទេសទាំងពីរ។
ក្នុងឱកាសនោះ សម្តេចធិបតី ហ៊ុន ម៉ាណែត បានថ្លែងថា ក្នុងឆ្នាំ២០២៥ កម្ពុជាបានទទួលភ្ញៀវទេសចរវៀតណាមប្រមាណជាង ១ លាននាក់ ដែលធ្វើឱ្យវៀតណាមក្លាយជាទីផ្សារទេសចរណ៍ធំជាងគេរបស់កម្ពុជា។ ទន្ទឹមគ្នានេះ ប្រជាជនកម្ពុជាកាន់តែច្រើនក៏កំពុងជ្រើសរើសវៀតណាមជាគោលដៅសម្រាប់ទេសចរណ៍ និងសេវាសុខភាពផងដែរ ដោយក្នុងឆ្នាំ២០២៥ ភ្ញៀវទេសចរកម្ពុជាទៅវៀតណាមបានកើនឡើងប្រមាណ ៤៥% បើធៀបនឹងឆ្នាំ២០២៤។

ទន្ទឹមនេះ សម្តេចធិបតីបានគូសបញ្ជាក់ថា ទោះបីជាទេសចរណ៍រវាងប្រទេសទាំងពីរមានមូលដ្ឋានរឹងមាំ ប៉ុន្តែយើងអាចធ្វើបានច្រើនជាងនេះ។ ជំហានបន្ទាប់គឺប្រែក្លាយរំហូរទេសចរណ៍ដែលមានស្រាប់ ទៅជាកិច្ចសហប្រតិបត្តិការសេដ្ឋកិច្ចកាន់តែស៊ីជម្រៅ។ សម្តេចបានលើកទឹកចិត្តដល់ក្រសួង ស្ថាប័ន និងវិស័យឯកជន ពិសេសក្រុមហ៊ុនអា​កា​ស​ចរណ៍ សណ្ឋាគារ និងក្រុមហ៊ុនទេសចរណ៍ បង្កើនការផ្សព្វផ្សាយ និងបង្កើតកញ្ចប់ទេសចរណ៍រួមគ្នាដែលភ្ជាប់ទេសចរណ៍ធម្មជាតិ វប្បធម៌ បេតិកភណ្ឌ ទីក្រុង ឆ្នេរ និងទេសចរណ៍សុខភាព។
លើសពីការធ្វើដំណើររវាងប្រជាជននៃប្រទេសទាំងពីរ កម្ពុជា និងវៀតណាម គួរមើលឃើញពីសក្តានុពលក្នុងការបំពេញឱ្យគ្នាទៅវិញទៅមក ដើម្បីទាក់ទាញភ្ញៀវទេសចរពីទីផ្សារទីបី។

សម្រាប់ការតភ្ជាប់ និងសម្រួលការធ្វើធុរកិច្ចវិញ ប្រទេសទាំងពីរមានព្រំដែនជាប់គ្នា និងមានវិស័យជាច្រើនដែលអាចបំពេញឱ្យគ្នា។ ភាគីទាំងពីរត្រូវបន្តពង្រឹងការតភ្ជាប់ សម្រួលការវិនិយោគ ពាណិជ្ជកម្ម និងបង្កើតលក្ខខណ្ឌអំណោយផល ដើម្បីឱ្យវិស័យឯកជនធ្វើការជាមួយគ្នាកាន់តែងាយស្រួល និងបង្កើតតម្លៃបន្ថែមកាន់តែច្រើន។
សម្តេចធិបតី ហ៊ុន ម៉ាណែត ក៏បានលើកទឹកចិត្តដល់ធុរជន និងវិនិយោគិននៃប្រទេសទាំងពីរ ឱ្យបន្តស្វែងរកកាលានុវត្តភាពថ្មីៗ ពង្រីកកិច្ចសហការពីការធ្វើពាណិជ្ជកម្មទៅកាន់ការវិនិយោគ ការផលិត ការកែច្នៃ និងការភ្ជាប់ខ្សែច្រវាក់ផ្គត់ផ្គង់។ សម្តេចសង្ឃឹមថា ជំនួបនាថ្ងៃនេះនឹងប្រែក្លាយការពិភាក្សាទៅជាដំណើរទស្សនកិច្ចសិក្សា ភាពជាដៃគូ កិច្ចព្រមព្រៀង និងគម្រោងវិនិយោគជាក់ស្តែងនៅឆ្នាំ២០២៧ និងឆ្នាំបន្តបន្ទាប់៕
ដោយ៖ គង់ សិរីរ័ត្ន, រូបថត៖ ហុង ម៉េងឡុង