AKP ភ្នំពេញ ថ្ងៃទី០៨ ខែតុលា ឆ្នាំ២០២៦ -- កាលពីពេលថ្មីៗនេះ អគ្គលេខាធិការអង្គការសហប្រជាជាតិ លោក អេនតូនីញ៉ូ ហ្គូតេរេស បានជំរុញឱ្យសហរដ្ឋអាមេរិក និងអ៊ីរ៉ង់ ងាកមកប្រើប្រាស់មធ្យោបាយការទូត និងបញ្ចប់សង្គ្រាម ខណៈដែលលោកបានកោតសរសើរចំពោះតួនាទីដ៏សំខាន់របស់ប្រទេសប៉ាគីស្ថានក្នុងការបង្កើតលក្ខខណ្ឌសម្រាប់កិច្ចសន្ទនារវាងភាគីទាំងពីរ រួមទាំងកិច្ចព្រមព្រៀងក្របខ័ណ្ឌមួយកាលពីខែមិថុនា។

លោកបាននិយាយថា «កិច្ចខិតខំប្រឹងប្រែងរបស់លោកអ្នកបានជួយសម្រេចឱ្យមានអនុស្សរណៈនៃការយោគយល់គ្នានៅទីក្រុងអ៊ីស្លាម៉ាបាដកាលពីថ្ងៃទី១៧ ខែមិថុនា នៃបទឈប់បាញ់គ្នាដែលកើតឡើងបន្ទាប់ពីនោះ និងក្របខ័ណ្ឌសម្រាប់កិច្ចចរចាបន្ថែមទៀត»។ លោកបានបន្ថែមថា «ប្រជាជនប៉ាគីស្ថានគ្រប់រូបគួរតែមានមោទនភាពចំពោះតួនាទីដ៏សំខាន់នោះ»។

ការលើកឡើងរបស់លោកបានធ្វើឡើងក្នុងអំឡុងពេលសន្និសីទសារព័ត៌មានរួមគ្នាមួយជាមួយរដ្ឋមន្ត្រីការបរទេសប៉ាគីស្ថាន លោក អ៊ីស្សាក ដារ នៅទីក្រុងអ៊ីស្លាម៉ាបាដ។ លោក ហ្គូតេរេស កំពុងបំពេញទស្សនកិច្ចនៅប្រទេសប៉ាគីស្ថានរហូតដល់ថ្ងៃព្រហស្បតិ៍នេះ។

លោក ហ្គូតេរេស បាននិយាយថា «ពីទីក្រុងអ៊ីស្លាម៉ាបាដ ខ្ញុំចង់ផ្ញើសារដ៏ច្បាស់លាស់មួយទៅកាន់ភាគីទាំងអស់ថា ចូរបញ្ចប់ជម្លោះ។ ងាកមកប្រើប្រាស់មធ្យោបាយការទូត។ ស្តារសិទ្ធិ និងសេរីភាពនៃការធ្វើនាវាចរណ៍ឡើងវិញឱ្យបានពេញលេញស្របតាមច្បាប់អន្តរជាតិ»។

ពាក់ព័ន្ធនឹងបញ្ហាប្រទេសប៉ាឡេស្ទីន លោកបានលើកឡើងថា នឹងមិនមានសន្តិភាពនៅក្នុងតំបន់ឡើយ ដរាបណាសិទ្ធិរបស់ប្រជាជនប៉ាឡេស្ទីនក្នុងការកំណត់ជោគវាសនាខ្លួនឯងត្រូវបានសម្រេចពេញលេញ ដូចដែលប្រទេសប៉ាគីស្ថានបានតស៊ូមតិជាយូរមកហើយនោះ។

លោក ដារ បានឱ្យដឹងថា ភាគីទាំងពីរបានពិភាក្សាគ្នាអំពីបញ្ហាតំបន់និងសកលលោកដែលទាក់ទងនឹងសន្តិភាព និងសន្តិសុខ រួមទាំងបញ្ហាប៉ាឡេស្ទីន តំបន់ចាំមូ និងកាស្មៀរ ប្រទេសអាហ្វហ្គានីស្ថាន ការប្រយុទ្ធប្រឆាំងនឹងអំពើភេរវកម្ម និងអនាគតនៃពហុភាគីនិយម។

លោកបានបញ្ជាក់ថា លោកបានជម្រាបជូនលោក ហ្គូតេរេស អំពីជំហររបស់ប៉ាគីស្ថានលើតំបន់ចាំមូ និងតំបន់កាស្មៀរ ព្រមទាំងកិច្ចព្រមព្រៀងទឹកទន្លេ Indus  ដោយបានបញ្ជាក់សារជាថ្មីនូវការអំពាវនាវរបស់ទីក្រុងអ៊ីស្លាម៉ាបាដឱ្យមានដំណោះស្រាយប្រកបដោយយុត្តិធម៌ និងសន្តិភាព ចំពោះជម្លោះនីកាស្មៀរ ស្របតាមសេចក្តីសម្រេចចិត្តពាក់ព័ន្ធនានារបស់ក្រុមប្រឹក្សាសន្តិសុខអង្គការសហប្រជាជាតិ៕

ដោយ៖ យា ចិន្ដាខន្ដី (ប្រភព៖ AA-AKP)