AKP ភ្នំពេញ ថ្ងៃទី០៨ ខែតុលា ឆ្នាំ២០២៦ -- ប្រទេសចិនបានបញ្ជាក់សារជាថ្មីនូវការប្រឆាំងរបស់ខ្លួនចំពោះការលក់អាវុធទៅឱ្យកោះតៃវ៉ាន់ បន្ទាប់ពីទីក្រុងតៃប៉ិបានទទួលយន្តហោះចម្បាំងប្រភេទ F-16V Block 70 ចំនួន២គ្រឿងជាលើកដំបូង ក្នុងចំណោមយន្តហោះសរុបចំនួន ៦៦គ្រឿងពីសហរដ្ឋអាមេរិក។

លោក គូ ជៀគុន អ្នកនាំពាក្យក្រសួងការបរទេសចិន បានថ្លែងនៅក្នុងសេចក្តីថ្លែងការណ៍ជាលាយលក្ខណ៍អក្សរមួយកាលពីយប់ថ្ងៃអង្គារថា«គោលជំហររបស់ចិន គឺច្បាស់លាស់។ យើងនៅតែប្រឆាំងយ៉ាងដាច់អហង្ការចំពោះការលក់អាវុធរបស់សហរដ្ឋអាមេរិកទៅកាន់កោះតៃវ៉ាន់របស់ចិន»។

យន្តហោះទាំងពីរគ្រឿងនេះបានទៅដល់មូលដ្ឋានទ័ពអាកាសChihhang នៅភាគខាងកើតតំបន់តៃទុងកាលពីថ្ងៃសុក្រ បន្ទាប់ពីបានហោះចេញពីកោះហាវ៉ៃ និងបានឈប់សម្រាកនៅកោះហ្កាំ។

ការលក់យន្តហោះចម្បាំងប្រភេទ F-16V ចំនួន ៦៦គ្រឿង និងឧបករណ៍ពាក់ព័ន្ធនានា ត្រូវបានអនុម័តដោយសហរដ្ឋអាមេរិកក្នុងឆ្នាំ២០១៩ក្នុងតម្លៃប្រហែល ៨ពាន់លានដុល្លារអាម៉េរិក។

លោក គូ បានបន្ថែមថា «បញ្ហាកោះតៃវ៉ាន់ គឺជាកិច្ចការផ្ទៃក្នុងរបស់ចិន»។

លោកបាននិយាយថា «ការដោះស្រាយបញ្ហាកោះតៃវ៉ាន់ គឺជាកិច្ចការរបស់ប្រជាជនចិនខ្លួនឯង ដែលមិនអនុញ្ញាតឱ្យមានការជ្រៀតជ្រែកពីខាងក្រៅឡើយ។ ភាគីសហរដ្ឋអាមេរិកចាំបាច់ត្រូវអនុវត្តតាមការឯកភាពគ្នាដ៏សំខាន់ដែលសម្រេចបាននៅក្នុងកិច្ចប្រជុំរវាងប្រធានាធិបតីទាំងពីរ គោរពតាមគោលការណ៍ចិនតែមួយ និងសេចក្តីថ្លែងការណ៍រួមទាំងបីរវាងចិន និងសហរដ្ឋអាមេរិក ព្រមទាំងប្រព្រឹត្តដោយប្រុងប្រយ័ត្នចំពោះបញ្ហាកោះតៃវ៉ាន់»៕

ដោយ៖ យា ចិន្ដាខន្ដី (ប្រភព៖ AA-AKP)