AKP ភ្នំពេញ ថ្ងៃទី០៧ ខែតុលា ឆ្នាំ២០២៦ -- ធនាគារអឺរ៉ុបសម្រាប់ការកសាងឡើងវិញ និងការអភិវឌ្ឍ (EBRD) កំពុងផ្តល់ប្រាក់កម្ចីរហូតដល់ ៥៥លានអឺរ៉ូដល់ក្រុមហ៊ុន Asarel Medet AD ដែលជាក្រុមហ៊ុនផលិតទង់ដែងឈានមុខគេមួយនៅក្នុងប្រទេសប៊ុលហ្គារី ដើម្បីគាំទ្រដល់ការធ្វើទំនើបកម្ម និងការកាត់បន្ថយការបញ្ចេញកាបូននៅក្នុងប្រតិបត្តិការរុករករ៉ែរបស់ខ្លួន។ នេះបើយោងតាមសេចក្តីប្រកាសព័ត៌មានរបស់ធនាគារកាលពីពេលថ្មីៗនេះ។

ប្រាក់កម្ចីនេះនឹងគាំទ្រដល់ការចំណាយលើដើមទុនសម្រាប់សកម្មភាពថែទាំ និងការរុករករ៉ែនៅឯអណ្តូងរ៉ែទង់ដែងប្រភេទបើកចំហរបស់ក្រុមហ៊ុននៅក្នុងតំបន់ Panagyurishte ក៏ដូចជាការវិនិយោគលើការផលិតថាមពលកកើតឡើងវិញសម្រាប់ប្រើប្រាស់ផ្ទាល់ខ្លួន។ ការវិនិយោគទាំងនេះត្រូវបានរំពឹងថានឹងជួយបង្កើនប្រសិទ្ធភាពប្រតិបត្តិការ ព្រមទាំងកាត់បន្ថយការបញ្ចេញឧស្ម័នដែលពាក់ព័ន្ធនឹងការប្រើប្រាស់អគ្គិសនី។

ប្រាក់កម្ចីនេះត្រូវបានរំពឹងថានឹងផ្តល់ផលវិជ្ជមានជាចម្បងតាមរយៈសមាសភាគ «បៃតង» របស់ខ្លួន ដោយប្រហែល ៦៨% ​​នៃហិរញ្ញប្បទានរបស់ធនាគារ EBRD ត្រូវបានចាត់ថ្នាក់ជាហិរញ្ញវត្ថុបៃតង។ គម្រោងនេះក៏នឹងគាំទ្រដល់ការកែលម្អអភិបាលកិច្ចសាជីវកម្មផងដែរ តាមរយៈការពង្រឹងគោលនយោបាយ និងនីតិវិធីនៃការអនុលោមតាមច្បាប់របស់ក្រុមហ៊ុន។

លោកស្រី ចាកគី ប៉ូវែល នាយិកាគ្រប់គ្រងផ្នែកសាជីវកម្មរបស់ធនាគារ EBRD បាននិយាយថា «គម្រោងនេះបង្ហាញពីរបៀបដែលហិរញ្ញប្បទានដែលមានគោលដៅច្បាស់លាស់អាចគាំទ្រដល់ការអភិវឌ្ឍប្រកបដោយចីរភាពនៃការផ្គត់ផ្គង់វត្ថុធាតុដើមដ៏សំខាន់នៅក្នុងទ្វីបអឺរ៉ុប។ តាមរយៈការរួមបញ្ចូលគ្នានៃការកែលម្អប្រតិបត្តិការ និងការប្រើប្រាស់ថាមពលកកើតឡើងវិញ ក្រុមហ៊ុន Asarel Medet កំពុងជំរុញទាំងសមត្ថភាពប្រកួតប្រជែង និងការអនុវត្តស្របតាមដំណើរការផ្លាស់ប្តូរទៅរកភាពបៃតង»។

លោក ឌីមីតា ធីសូតសូកូវ ប្រធានក្រុមប្រឹក្សាត្រួតពិនិត្យរបស់ក្រុមហ៊ុន Asarel Medet បាននិយាយថា «ក្រុមហ៊ុន Asarel មានសេចក្តីរីករាយក្នុងការបង្កើនកិច្ចសហប្រតិបត្តិការជាមួយធនាគារ EBRD លើផែនការសកម្មភាពដ៏ទូលំទូលាយមួយដែលគ្របដណ្តប់លើផ្នែកបរិស្ថាន សុខភាព សុវត្ថិភាព និងសង្គម ដោយអនុលោមតាមស្តង់ដារអន្តរជាតិខ្ពស់បំផុត។ ក្នុងនាមជាអ្នកផ្គត់ផ្គង់ទង់ដែងដ៏សំខាន់សម្រាប់ឧស្សាហកម្ម និងដំណើរការផ្លាស់ប្តូរថាមពលរបស់អឺរ៉ុប ការរក្សាបាននូវលទ្ធផលល្អប្រសើរលើផ្នែក ESG (បរិស្ថាន សង្គម និងអភិបាលកិច្ច) គឺមានសារៈសំខាន់ណាស់ចំពោះសមត្ថភាពប្រកួតប្រជែងរបស់យើង។ យើងសូមថ្លែងអំណរគុណចំពោះការគាំទ្រប្រកបដោយស្មារតីស្ថាបនារបស់រដ្ឋាភិបាលប៊ុលហ្គារី និងធនាគារ EBRD ខណៈដែលយើងបន្តធ្វើទំនើបកម្មក្រុមហ៊ុន Asarel Medet ក្នុងលក្ខណៈប្រកបដោយការទទួលខុសត្រូវ និងចីរភាព»៕

ដោយ៖ យា ចិន្ដាខន្ដី (ប្រភព៖ BTA)