AKP ភ្នំពេញ ថ្ងៃទី០៧ ខែតុលា ឆ្នាំ២០២៦ -- ដោយសារការប្រកួតប្រជែងកាន់តែខ្លាំងឡើងរវាងសហរដ្ឋអាមេរិក និងចិនក្នុងវិស័យបច្ចេកវិទ្យា និងខ្សែសង្វាក់ផ្គត់ផ្គង់ ធ្វើឱ្យកូរ៉េខាងត្បូងស្ថិតក្នុងស្ថានភាពដ៏លំបាកមួយរវាងសម្ព័ន្ធមិត្តសន្តិសុខ និងដៃគូសេដ្ឋកិច្ចសំខាន់របស់ខ្លួន។ ឯកអគ្គរដ្ឋទូតចិនប្រចាំប្រទេសកូរ៉េខាងត្បូង លោក តៃ ពីង បាននិយាយថា ទីក្រុងសេអ៊ូលមិនចាំបាច់ជ្រើសរើសភាគីណាមួយឡើយ។ នៅក្នុងបទសម្ភាសន៍មួយជាមួយសារព័ត៌មានកូរ៉េថាមស៍ បានឱ្យដឹងថា លោក តៃ បានសង្កត់ធ្ងន់ថា ការរក្សាទំនាក់ទំនងដែលមានតុល្យភាព និងរឹងមាំជាមួយទាំងទីក្រុងវ៉ាស៊ីនតោន និងទីក្រុងប៉េកាំង គឺល្អបំផុតសម្រាប់ផលប្រយោជន៍ជាតិរបស់ប្រទេសកូរ៉េខាងត្បូង។ លោកបានអំពាវនាវឱ្យប្រទេសកូរ៉េខាងត្បូងអនុវត្តស្វ័យភាពយុទ្ធសាស្ត្រពិតប្រាកដ ដោយបានបញ្ជាក់ថា នេះមិនមានន័យថា បោះបង់ចោលសម្ព័ន្ធភាពសហរដ្ឋអាមេរិករបស់ខ្លួននោះទេ ប៉ុន្តែផ្ទុយទៅវិញ គឺរក្សាសេរីភាពក្នុងការធ្វើការសម្រេចចិត្តដោយឯករាជ្យដោយផ្អែកលើផលប្រយោជន៍ជាតិរបស់ខ្លួន។

លោក តៃ បានកត់សម្គាល់ថា ទំនាក់ទំនងទ្វេភាគីកំពុងផ្លាស់ប្តូរពីការបែងចែកការងារបញ្ឈរបែបប្រពៃណីទៅជាកិច្ចសហប្រតិបត្តិការផ្ដេកកាន់តែជិតស្និទ្ធ។ ខណៈដែលការប្រកួតប្រជែងឧស្សាហកម្មរវាងប្រទេសទាំងពីរបានកើនឡើង លោកបានអះអាងថា កិច្ចសហប្រតិបត្តិការយុទ្ធសាស្ត្រដែលផ្តល់ផលប្រយោជន៍ទៅវិញទៅមករបស់ពួកគេនៅតែមិនផ្លាស់ប្តូរ។ លោកបានពិពណ៌នាអំពីទីផ្សារចិនដ៏ធំទូលាយថា ជាកន្លែងដែលក្រុមហ៊ុនកូរ៉េខាងត្បូងអាចបង្កើតកម្លាំងដើម្បីប្រកួតប្រជែងកាន់តែប្រសើរឡើងនៅទូទាំងពិភពលោក ដោយណែនាំប្រទេសកូរ៉េខាងត្បូងឱ្យទាញយកអត្ថប្រយោជន៍ពីភាពជិតខាងផ្នែកភូមិសាស្ត្រ និងបណ្តាញឧស្សាហកម្មរបស់ប្រទេសចិន ដើម្បីពង្រីកវិសាលភាពទីផ្សារជាសកលរបស់ខ្លួន។

ដោយសម្លឹងមើលទៅមុខ ឯកអគ្គរដ្ឋទូតរូបនេះបានគូសបញ្ជាក់ពីវិស័យជាច្រើនដែលមានសក្តានុពលសម្រាប់កិច្ចសហការនាពេលអនាគត រួមទាំងបញ្ញាសិប្បនិម្មិត ជីវវេជ្ជសាស្ត្រ ថាមពលថ្មី និងការផលិតឆ្លាតវៃជាដើម។ លោកក៏បានចង្អុលបង្ហាញពីកិច្ចចរចាដំណាក់កាលទីពីរនៃកិច្ចព្រមព្រៀងពាណិជ្ជកម្មសេរីកូរ៉េខាងត្បូង-ចិន ដែលកំពុងដំណើរការ ដោយបានបង្ហាញពីបំណងប្រាថ្នារបស់ប្រទេសចិនសម្រាប់កិច្ចព្រមព្រៀងដំបូង ដើម្បីធ្វើឱ្យប្រសើរឡើងនូវកិច្ចសហប្រតិបត្តិការពាណិជ្ជកម្ម និងសេដ្ឋកិច្ចទ្វេភាគីបន្ថែមទៀត៕

ដោយ៖ យា ចិន្ដាខន្ដី (ប្រភព៖ កូរ៉េថាមស៍)