AKP ភ្នំពេញ ថ្ងៃទី០៧ ខែតុលា ឆ្នាំ២០២៦ -- សាកលវិទ្យាល័យភើរលីសម៉ាឡេស៊ី (UniMAP) កំពុងស្វែងរកការពង្រឹងកិច្ចសហប្រតិបត្តិការជាមួយប្រទេសវៀតណាមលើវិស័យបច្ចេកវិទ្យាហាឡាល់ (halal) ជាពិសេស គឺដំណើរការនៃការផ្តល់វិញ្ញាបនបត្រហាឡាល់ ដែលឆ្លើយតបយ៉ាងពេញលេញទៅនឹងលក្ខណៈវិនិច្ឆ័យដែលបានកំណត់។

យោងតាមទីភ្នាក់ងារសារព័ត៌មាន Bernama បានឱ្យដឹងថា លោក ស៊ីយ៉េដ ហ្វៃហ្ស៊ុដឌីន ពុត្រា ចាម៉ាលូឡៃ ដែលជាសាកលវិទ្យាធិការនៃសាកលវិទ្យាល័យ UniMAP បានលើកឡើងថា សមត្ថភាពស្រាវជ្រាវរបស់សាកលវិទ្យាល័យអាចផ្តល់នូវមូលដ្ឋានដ៏រឹងមាំសម្រាប់កិច្ចសហប្រតិបត្តិការជាក់ស្តែងជាមួយប្រទេសវៀតណាម លើវិស័យបច្ចេកវិទ្យាហាឡាល់ ស្តង់ដារ និងការអភិវឌ្ឍឧស្សាហកម្មហាឡាល់។

លោកបានកត់សម្គាល់ថា កាលពីពេលកន្លងទៅ សាកលវិទ្យាល័យ UniMAP បានទៅទស្សនកិច្ចនៅមជ្ឈមណ្ឌលហាឡាល់អូសាកានៅក្នុងប្រទេសជប៉ុន ដែលនៅទីនោះអ្នកចូលរួមបានពិភាក្សាគ្នាអំពីឱកាសសម្រាប់និស្សិតក្នុងការទទួលបានការបណ្តុះបណ្តាលជាក់ស្តែងនៅតាមក្រុមហ៊ុននានា និងទទួលបានបទពិសោធន៍ផ្ទាល់អំពីប្រតិបត្តិការដែលពាក់ព័ន្ធនឹងវិស័យហាឡាល់។

ដោយលើកឡើងពីបទពិសោធន៍នៅប្រទេសជប៉ុន លោក ស៊ីយ៉េដ ហ្វៃហ្ស៊ុដឌីន បានបង្ហាញក្តីសង្ឃឹមថា សកម្មភាពចែករំលែកជំនាញស្រដៀងគ្នានេះ អាចនឹងត្រូវបានអនុវត្តនៅក្នុងប្រទេសវៀតណាម។

កម្មវិធីរបស់សាកលវិទ្យាល័យ UniMAP នៅប្រទេសជប៉ុននោះ មានការចូលរួមពីនិស្សិតដែលសិក្សាជំនាញគ្រប់គ្រងអាជីវកម្ម និងវិស្វកម្មគីមី រួមទាំងបច្ចេកវិទ្យាម្ហូបអាហារផងដែរ។ បទពិសោធន៍នេះអាចផ្តល់ជាមូលដ្ឋានគ្រឹះសម្រាប់គំនិតផ្តួចផ្តើមចែករំលែកចំណេះដឹងស្រដៀងគ្នានេះនៅក្នុងប្រទេសវៀតណាម ខណៈដែលប្រទេសទាំងពីរស្វែងរកកិច្ចសហប្រតិបត្តិការជាក់ស្តែងនៅក្នុងវិស័យហាឡាល់។

លោក រ៉ាមលែន អូស្មាន់ នាយកមជ្ឈមណ្ឌលជាតិសម្រាប់វិញ្ញាបនបត្រហាឡាល់ (HALCERT) បាននិយាយថា មជ្ឈមណ្ឌលនេះអាចដើរតួនាទីជាស្ពានតភ្ជាប់សម្រាប់កិច្ចសហប្រតិបត្តិការរវាងម៉ាឡេស៊ី និងវៀតណាម លើវិស័យបច្ចេកវិទ្យាហាឡាល់ ស្តង់ដារ និងការអភិវឌ្ឍឧស្សាហកម្មហាឡាល់។

លោក​បាននិយាយ​ថា មជ្ឈមណ្ឌល HALCERT ដំណើរការ​ក្រោម​ក្រសួង​វិទ្យាសាស្ត្រ និង​បច្ចេកវិទ្យា​វៀតណាម ហើយ​បុគ្គលិក​របស់​ខ្លួនអនុវត្តការងារ​យោង​ទៅ​តាម​នីតិវិធី​របស់​នាយកដ្ឋាន​អភិវឌ្ឍន៍​អ៊ីស្លាម​ម៉ាឡេស៊ី (JAKIM) ដែល​ជា​អាជ្ញាធរ​បញ្ជាក់​ហាឡាល់​របស់​ប្រទេសនេះ នៅពេល​កំណត់​លក្ខណៈវិនិច្ឆ័យ​ហាឡាល់​សម្រាប់​ផលិតផល។

លោក រ៉ាមលែន ក៏បាន​គូសបញ្ជាក់​ពី​សារៈសំខាន់​នៃ​ភស្តុភារ​ហាឡាល់​ក្នុង​ការ​រក្សា​ភាព​សុចរិត​នៃ​ផលិតផល​ទូទាំង​ខ្សែសង្វាក់​ផ្គត់ផ្គង់ផងដែរ ដោយលោកបាន​សង្កត់ធ្ងន់​ថា តម្រូវការ​ហាឡាល់​ត្រូវតែ​គោរព​យ៉ាង​តឹងរ៉ឹង​រាប់ចាប់តាំងពី​ការដឹកជញ្ជូន និង​ការផ្ទុក​រហូតដល់​ការដឹកជញ្ជូន​ដល់​អ្នកប្រើប្រាស់។

វិស័យ​សហប្រតិបត្តិការ​ដែល​មាន​សក្តានុពល​រួមមាន ​វិញ្ញាបនបត្រ និង​ការកែច្នៃ​ហាឡាល់ ផលិតផល​កសិកម្ម​ដែល​មាន​តម្លៃ​បន្ថែម បច្ចេកវិទ្យា​អង្ករ ជលផល ក៏ដូចជា​ដំណោះស្រាយ​ផ្ទុក​ត្រជាក់ និង​ភស្តុភារ​ប្រកបដោយនវានុវត្តន៍៕

ដោយ៖ យា ចិន្ដាខន្ដី (ប្រភព៖ VNA)