AKP ភ្នំពេញ ថ្ងៃទី០៧ ខែតុលា ឆ្នាំ២០២៦ -- ប្រទេសប៉ាគីស្ថាន និងតួកគី នឹងផ្តល់កងកម្លាំង និងសមត្ថភាពយោធា ព្រមទាំងធានាឱ្យមានការដាក់ពង្រាយកងកម្លាំងទាំងនោះយ៉ាងឆាប់រហ័សនៅក្នុងប្រទេសអារ៉ាប៊ីសាអូឌីត ស្របតាមការប្តេជ្ញាចិត្តរបស់ពួកគេក្រោម «សម្ព័ន្ធភាពការពារជាតិទីក្រុងមេកា»។ នេះបើតាមសេចក្តីប្រកាសរួមរបស់ប្រទេសទាំងបីកាលពីថ្ងៃចន្ទ ខណៈដែលប្រទេសអារ៉ាប៊ីសាអូឌីតកំពុងប្រឈមមុខនឹងការវាយប្រហារកាន់តែខ្លាំងឡើងពីក្រុមហ៊ូធី (Houthi) របស់ប្រទេសយេម៉ែន។

សេចក្តីសម្រេចនេះត្រូវបានប្រកាសបន្ទាប់ពីមានកិច្ចប្រជុំបន្ទាន់មួយរបស់គណៈកម្មាធិការនយោបាយយុទ្ធសាស្ត្រ និងការពារជាតិ នៃសម្ព័ន្ធភាពទីក្រុងមេកា នៅរដ្ឋធានីរីយ៉ាដ ដើម្បីដោះស្រាយបញ្ហាគំរាមកំហែងផ្នែកសន្តិសុខដែលប្រទេសអារ៉ាប៊ីសាអូឌីតកំពុងជួបប្រទះ។ ព័ត៌មាននេះត្រូវបានបញ្ជាក់នៅក្នុងសេចក្តីថ្លែងការណ៍រួមមួយដែលបានបង្ហោះនៅលើគណនីផ្លូវការរបស់ក្រសួងការពារជាតិអារ៉ាប៊ីសាអូឌីត នៅលើបណ្តាញសង្គមអ៊ិច។

សេចក្តីថ្លែងការណ៍បានបញ្ជាក់ថា ប្រទេសទាំងបីបានថ្កោលទោសយ៉ាងខ្លាំងក្លាបំផុតចំពោះការប៉ុនប៉ងវាយប្រហារលើទីក្រុងមេកា និងទីក្រុងម៉ាឌីណា ក៏ដូចជាការវាយប្រហារជាបន្តបន្ទាប់ទៅលើទីក្រុងនានា និងហេដ្ឋារចនាសម្ព័ន្ធស៊ីវិល និងសេដ្ឋកិច្ចនៅក្នុងប្រទេសអារ៉ាប៊ីសាអូឌីត។

ប្រទេសទាំងនោះបានបញ្ជាក់ថា សន្តិសុខរបស់ភាគីនីមួយៗគឺជាផ្នែកសំខាន់មួយនៃសន្តិសុខរួមរបស់ប្រទេសទាំងបី ហើយបានកត់សម្គាល់ថា ការអនុវត្តជាក់ស្តែងនូវ «កិច្ចព្រមព្រៀងការពារជាតិរួមទីក្រុងមេកា» នឹងជួយពង្រឹងសមត្ថភាពទប់ស្កាត់ការវាយប្រហារ ការត្រៀមខ្លួនផ្នែកយោធា និងការធ្វើសមាហរណកម្មកងកម្លាំង។

ក្រុមហ៊ូធីបានប្រកាសហាមឃាត់ការធ្វើដំណើរតាមផ្លូវសមុទ្រសម្រាប់នាវាដឹកទំនិញរបស់ប្រទេសអារ៉ាប៊ីសាអូឌីតកាលពីខែកក្កដា ហើយចាប់តាំងពីពេលនោះមក បានបើកការវាយប្រហារលើនាវាដឹកប្រេង និងកន្លែងហេដ្ឋារចនាសម្ព័ន្ធប្រេងរបស់អារ៉ាប៊ីសាអូឌីត។

ប្រទេសអារ៉ាប៊ីសាអូឌីត ប៉ាគីស្ថាន និងតួកគី បានចុះហត្ថលេខាលើកិច្ចព្រមព្រៀងការពារជាតិរួមទីក្រុងមេកា កាលពីថ្ងៃទី៧ ខែសីហា នៅទីក្រុងមេកា ប្រទេសអារ៉ាប៊ីសាអូឌីត។ កិច្ចព្រមព្រៀងនេះបានចែងថា ការវាយប្រហារលើភាគីហត្ថលេខីណាមួយ នឹងត្រូវចាត់ទុកថាជាការវាយប្រហារលើភាគីទាំងអស់៕

ដោយ៖ មូល មិនា (ប្រភព៖ ភីបផលដេលី)