AKP ភ្នំពេញ ថ្ងៃទី៧ ខែតុលា ឆ្នាំ២០២៦--ក្រសួងមហាផ្ទៃនៃរាជរដ្ឋាភិបាលកម្ពុជាបានជម្រាបជូនសាធារណជនជាតិ និងអន្តរជាតិថា នៅថ្ងៃទី២២ ខែកញ្ញា ឆ្នាំ២០២៦ អគ្គស្នងការដ្ឋាននគរបាលជាតិបានទទួលការស្នើសុំកិច្ចអន្តរាគមន៍ពីស្ថានទូតអូស្ត្រាលីប្រចាំព្រះរាជាណាចក្រកម្ពុជា ពាក់ព័ន្ធនឹងករណីបាត់ខ្លួនបុគ្គលឈ្មោះ TRAN HIEP កាន់លិខិតឆ្លងដែនអូស្ត្រាលីលេខ RA1088235 ហើយនៅយប់ថ្ងៃដដែលនេះដែរ ក្រសួងមហាផ្ទៃក៏បានទទួលការបញ្ជាក់បន្ថែមថា មានបុគ្គលរួមដំណើរម្នាក់ទៀត ឈ្មោះ NGUYEN THUAN DUC កាន់លិខិតឆ្លងដែនន័រវែស លេខ CFC960392 ក៏បាត់ដំណឹងទាក់ទងជាមួយក្រុមគ្រួសារ តាំងពីថ្ងៃទី១៨ ខែកញ្ញា ឆ្នាំ២០២៦ ផងដែរ។

ឈរលើកិច្ចសហប្រតិបត្តិការដែលមានស្រាប់ និងក្នុងស្មារតីយកចិត្តទុកដាក់ខ្ពស់ដែលមានតាំងពីដើមមក ក្រោយទទួលបានព័ត៌មានខាងលើអគ្គស្នងការដ្ឋាននគរបាលជាតិបានចាត់វិធានការបន្ទាន់ ដោយបានបញ្ជាកម្លាំងជំនាញបើកការស្រាវជ្រាវ និងស៊ើបអង្កេតយ៉ាងយកចិត្តទុកដាក់បំផុត រហូតទទួលបានលទ្ធផលនៃការផ្ទៀងផ្ទាត់ជាក់ស្តែង៖ ១-តាមរបាយការណ៍ទិន្នន័យរបស់អគ្គនាយកដ្ឋានអន្តោប្រវេសន៍ នៅថ្ងៃទី១៥ ខែកញ្ញា ឆ្នាំ២០២៦ បុគ្គលឈ្មោះ TRAN HIEP កាន់លិខិតឆ្លងដែនអូស្ត្រាលីលេខ RA1088235 និងបុគ្គលឈ្មោះ NGUYEN THUAN DUC កាន់លិខិតឆ្លងដែនន័រវែស CFC960392/33494270/29683969 ពិតជាបានធ្វើដំណើរមកពីប្រទេសថៃចូលមកកាន់ប្រទេសកម្ពុជា តាមច្រកទ្វារអាកាសយានដ្ឋានអន្តរជាតិតេជោ ដោយប្រើប្រាស់ជើងហោះហើរលេខ K6 723 ហើយក្នុងប្រព័ន្ធគ្រប់គ្រងទិន្នន័យអន្តោប្រវេសន៍នៃអគ្គនាយកដ្ឋានអន្តោប្រវេសន៍ក៏បង្ហាញថាជនទាំងពីរពុំទាន់មានកំណត់ត្រាចាកចេញពីប្រទេសកម្ពុជានៅឡើយដែរ។ ផ្អែកតាមទិន្នន័យនេះ កម្លាំងជំនាញនៃអគ្គស្នងការដ្ឋាននគរបាលជាតិក៏បានបន្តការស្រាវជ្រាវយ៉ាងយកចិត្តទុកដាក់។ ២-ផ្អែកលើព័ត៌មានរបស់សមត្ថកិច្ចក្រសួងនគរបាល នៃសាធារណរដ្ឋសង្គមនិយមវៀតណាម នៅថ្ងៃទី២៨ ខែកញ្ញា ឆ្នាំ២០២៦ សមត្ថកិច្ចក្រសួងនគរបាលវៀតណាមបានប្រកាសជាសាធារណៈអំពីការឃាត់ខ្លួនមនុស្សចំនួន៣នាក់ រួមមាន ឈ្មោះ TRAN HIEP (កាន់លិខិតឆ្លងដែនអូស្ត្រាលី) ឈ្មោះ NGUYEN THUAN DUC (កាន់លិខិតឆ្លងដែនន័រវែស) និងឈ្មោះ THAI CONG TRUONG SON (ជនជាតិវៀតណាម) កាលពីថ្ងៃទី១៨ ខែកញ្ញា ឆ្នាំ២០២៦ វេលាម៉ោង ២១:៥០នាទី នៅប៉ុស្តិ៍ការពារព្រំដែន Mỹ Quý Tây ខេត្ត Tây Ninh ពីបទលួចឆ្លងដែនចូលប្រទេសវៀតណាមដោយខុសច្បាប់ និងត្រូវបានចោទប្រកាន់ថា ជាសមាជិកអង្គការភេរវកម្ម Việt Tân។ បច្ចុប្បន្ន ពួកគេត្រូវបានឃុំខ្លួននៅប្រទេសវៀតណាម ដើម្បីបន្តការស៊ើបអង្កេត។

ក្នុងន័យនេះ ក្រសួងមហាផ្ទៃនៃរាជរដ្ឋាភិបាលកម្ពុជាសូមប្រកាសបដិសេធយ៉ាងម៉ឺងម៉ាត់ថា អាជ្ញាធរមានសមត្ថកិច្ចនៃព្រះរាជាណាចក្រកម្ពុជាពុំបានចាប់ខ្លួន និងបញ្ជូនបុគ្គលខាងលើទៅឱ្យសមត្ថកិច្ចវៀតណាមនោះឡើយ៕

ដោយ៖ ចាន់ សុភឿន (ប្រភព៖ ក្រសួងមហាផ្ទៃ)