AKP កំពង់ធំ ថ្ងៃទី០៧ ខែតុលា ឆ្នាំ២០២៦--លោកឧត្តមសេនីយ៍ទោ ហេង សុផល ស្នងការនគរបាលខេត្តកំពង់ធំ កាលពីថ្ងៃទី០៦ ខែតុលា ឆ្នាំ២០២៦ បានបន្តចុះសាកសួរសុខទុក្ខកងកម្លាំង និងត្រួតពិនិត្យស្ថានភាពជាក់ស្តែងនៅតាមប៉ុស្តិ៍នគរបាលរដ្ឋបាលក្នុងភូមិសាស្ត្រស្រុកប្រាសាទបល្ល័ង្ក និងស្រុកកំពង់ស្វាយ ខេត្តកំពង់ធំ។

លោកឧត្តមសេនីយ៍ទោ ហេង សុផល បានសំណេះសំណាល និងផ្តល់ការណែនាំដល់ថ្នាក់ដឹកនាំ និងកងកម្លាំង ដោយបានគូសបញ្ជាក់ថា ប៉ុស្តិ៍នគរបាលរដ្ឋបាល គឺជាអង្គភាពមូលដ្ឋានដែលនៅជិតស្និទ្ធជាមួយប្រជាពលរដ្ឋ និងជាកន្លែងសំខាន់ក្នុងការផ្តល់សេវារដ្ឋបាល សន្តិសុខ សុវត្ថិភាព និងសណ្តាប់ធ្នាប់សាធារណៈជូនប្រជាពលរដ្ឋនៅគ្រប់ពេលវេលា។

លោកឧត្តមសេនីយ៍ទោស្នងការ បានណែនាំឱ្យកងកម្លាំងបន្តពង្រឹងសាមគ្គីភាព ឯកភាពផ្ទៃក្នុង និងកិច្ចសហការល្អ ព្រមទាំងគោរពវិន័យរបស់កងកម្លាំងនគរបាលជាតិ និងពង្រឹងរបៀបរបបការងារជំនាញ ដោយអនុវត្តតាមតួនាទី ភារកិច្ច និងឋានានុក្រមប្រកបដោយស្មារតីទទួលខុសត្រូវខ្ពស់។ កងកម្លាំងត្រូវបន្តអនុវត្តការងារប្រចាំថ្ងៃឱ្យបានជាប់លាប់ និងស្របតាមផែនការដែលបានកំណត់ រួមមានការរៀបចំវេនប្រចាំការ ការផ្តល់សេវារដ្ឋបាលជូនប្រជាពលរដ្ឋ ដូចជា សៀវភៅស្នាក់នៅ សៀវភៅគ្រួសារ និងអត្តសញ្ញាណប័ណ្ណសញ្ជាតិខ្មែរ ព្រមទាំងតាមដានសភាពការណ៍ និងរក្សាសន្តិសុខ សុវត្ថិភាព និងសណ្តាប់ធ្នាប់សាធារណៈក្នុងមូលដ្ឋាន។ ចំពោះប៉ុស្តិ៍នគរបាលរដ្ឋបាលដែលមានការខ្វះខាតកម្លាំង លោកស្នងការបានណែនាំឱ្យអធិការដ្ឋាននគរបាលស្រុកបញ្ចុះកម្លាំងទៅជួយបំពេញភារកិច្ចតាមរយៈពេល និងតាមការកំណត់ជាក់ស្តែង ដើម្បីធានាបាននូវប្រសិទ្ធភាពការងារ និងការបំពេញភារកិច្ចបានទាន់ពេលវេលា។

លោកឧត្តមសេនីយ៍ទោស្នងការបានណែនាំឱ្យកងកម្លាំងប៉ុស្តិ៍នគរបាលរដ្ឋបាល ត្រូវសហការជាមួយអាជ្ញាធរភូមិ ឃុំ និងសង្កាត់ រៀបចំវេទិកាសាធារណៈផ្សព្វផ្សាយគោលនយោបាយ «ភូមិ-ឃុំ-សង្កាត់មានសុវត្ថិភាព» ផ្សព្វផ្សាយលក្ខណៈសម្បត្តិទាំង៧ ឱ្យបានទូលំទូលាយ ដើម្បីលើកកម្ពស់ការយល់ដឹង និងការចូលរួមរបស់ប្រជាពលរដ្ឋក្នុងការថែរក្សាសន្តិសុខ និងសណ្តាប់ធ្នាប់សង្គម ព្រមទាំងទទួលយកមតិយោបល់ បញ្ហាប្រឈម និងក្តីកង្វល់របស់ពួកគាត់ ដើម្បីសហការដោះស្រាយឱ្យបានទាន់ពេលវេលា។

លោកស្នងការបានជំរុញឱ្យបន្តចុះអនុវត្តវិធានការរដ្ឋបាលតាមខ្នងផ្ទះ ដើម្បីធ្វើបច្ចុប្បន្នភាពបម្រែបម្រួលប្រជាពលរដ្ឋ ចំណូល-ចំណាកស្រុក គ្រប់គ្រងត្រួតពិនិត្យមធ្យោបាយ មុខរបរពិសេស អាវុធ និងគ្រឿងផ្ទុះ ព្រមទាំងផ្សព្វផ្សាយលេខទូរស័ព្ទរបស់សមត្ថកិច្ចជូនប្រជាពលរដ្ឋ សម្រាប់ទំនាក់ទំនងស្នើសុំអន្តរាគមន៍នៅពេលមានហេតុការណ៍ចាំបាច់។ ពង្រឹងចលនាប្រជាការពារ ដើម្បីបំផុតស្មារតីឱ្យមានការចូលរួមពីប្រជាពលរដ្ឋសម្រាប់ការងារការពារ រក្សាសន្ដិសុខ សុវត្ថិភាព សណ្តាប់ធ្នាប់សាធារណៈជូនជាតិមាតុភូមិ ឆ្លៀតក្នុងឱកាសនោះ លោកឧត្តមសេនីយ៍ទោ ហេង សុផល ក៏បានត្រួតពិនិត្យវឌ្ឍនភាពនៃដំណើរការសាងសង់អគារប៉ុស្តិ៍នគរបាលរដ្ឋបាលដូង នៃអធិការដ្ឋាននគរបាលស្រុកប្រាសាទបល្ល័ង្ក ដោយយកចិត្តទុកដាក់លើវឌ្ឍនភាពការងារ និងការអនុវត្តតាមផែនការសាងសង់ ដើម្បីធានាឱ្យសំណង់មានគុណភាព សោភ័ណភាព សណ្តាប់ធ្នាប់ និងអាចប្រើប្រាស់បានយូរអង្វែង។

សូមបញ្ជាក់ថា ប៉ុស្តិ៍នគរបាលរដ្ឋបាល ដែលលោកស្នងការបានចុះត្រួតពិនិត្យ រួមមាន ១. ប៉ុស្តិ៍នគរបាលរដ្ឋបាលផាន់ញើម ២. ប៉ុស្តិ៍នគរបាលរដ្ឋបាលសាគ្រាម ៣. ប៉ុស្តិ៍នគរបាលរដ្ឋបាលក្រយា ៤. ប៉ុស្តិ៍នគរបាលរដ្ឋបាលសាមគ្គី  ៥. ប៉ុស្តិ៍នគរបាលរដ្ឋបាលដូង និង ៦. ប៉ុស្តិ៍នគរបាលរដ្ឋបាលដំរីស្លាប់៕

ដោយ៖ ស៊ុម វណ្ណា