AKP ភ្នំពេញ ថ្ងៃទី០៧ ខែតុលា ឆ្នាំ២០២៦--នៅពេលមានការផ្ទុះឡើងនៃជំងឺនានា មន្ទីរពិសោធន៍ដើរតួនាទីយ៉ាងសំខាន់ក្នុងការជួយរកឱ្យឃើញ ស្វែងយល់ និងឆ្លើយតបទៅនឹងជំងឺទាំងនោះ។ ប៉ុន្តែ ទិន្នន័យមន្ទីរពិសោធន៍ដែលមានភាពជឿជាក់ គឺមានសារៈសំខាន់មិនចាញ់ការធ្វើតេស្តនោះឡើយ។

កាលពីថ្ងៃទី០៦ ខែតុលា ឆ្នាំ២០២៦ អង្គការ FAO ប្រចាំកម្ពុជា ដោយសហការជាមួយអគ្គនាយកដ្ឋានសុខភាពសត្វ និងផលិតកម្មសត្វ បានរៀបចំកិច្ចប្រជុំសម្រាប់អ្នកជំនាញផ្នែកមន្ទីរពិសោធន៍ និងអ្នកជំនាញផ្នែក «សុខភាពតែមួយ» (One Health) នៅក្នុងខេត្តកំពង់ឆ្នាំង ដើម្បីទទួលការបណ្តុះបណ្តាលអនុវត្តជាក់ស្តែងលើប្រព័ន្ធគ្រប់គ្រងព័ត៌មានមន្ទីរពិសោធន៍ ឬហៅម្យ៉ាងទៀតថា SILAB (ដែលជាពាក្យកាត់មកពីភាសាអ៊ីតាលី «Sistema di gestione delle Informazioni di Laboratorio»)។

ក្រោមការគាំទ្រពីមូលនិធិសម្រាប់ទប់ស្កាត់ជំងឺរាតត្បាតសកល (Pandemic Fund) អ្នកចូលរួមបានសិក្សាស្វែងយល់អំពីប្រព័ន្ធ SILAB ដែលជាប្រព័ន្ធគ្រប់គ្រងព័ត៌មានមន្ទីរពិសោធន៍ត្រូវបានប្រើប្រាស់នៅក្នុងមន្ទីរពិសោធន៍ជាង ៨០កន្លែងនៅជុំវិញពិភពលោក ព្រមទាំងបានរៀនសូត្រអំពីរបៀបដែលការគ្រប់គ្រងទិន្នន័យកាន់តែប្រសើរឡើង អាចជួយបង្កើនប្រសិទ្ធភាព ភាពត្រឹមត្រូវ និងការរាយការណ៍ទិន្នន័យ។

តាមរយៈការបង្កើនប្រសិទ្ធភាពលើរបៀបនៃការប្រមូល គ្រប់គ្រង និងចែករំលែកព័ត៌មានពីមន្ទីរពិសោធន៍ កម្ពុជាអាចគាំទ្រដល់ការចាត់វិធានការបានឆាប់រហ័ស និងផ្អែកលើព័ត៌មានច្បាស់លាស់ ដើម្បីការពារមនុស្ស សត្វ និងបរិស្ថាន៕

ដោយ៖ ណយ នឿន (ប្រភព៖ អង្គការ FAO)