AKP ភ្នំពេញ ថ្ងៃទី៦ ខែតុលា ឆ្នាំ២០២៦–ឯកឧត្តមបណ្ឌិត អាន ពេជ្រ ហត្ថដា រដ្ឋលេខាធិការ ក្រសួងធនធានទឹក និងឧតុនិយម បានអញ្ជើញជាអធិបតីដឹកនាំកិច្ចប្រជុំគណៈកម្មការរៀបចំផែនការមេគ្រប់ជ្រុងជ្រោយលើការគ្រប់គ្រង និងការអភិវឌ្ឍធនធានទឹក នៅសាលប្រជុំរំដួល ទីស្ដីការក្រសួង នាថ្ងៃអង្គារទី៦ ខែតុលា ឆ្នាំ២០២៦ នេះ។
សមាសភាពចូលរួមមាន ឯកឧត្តម លោកជំទាវ លោក លោកស្រី ជាអនុប្រធាន និងសមាជិក សមាជិកានៃគណៈកម្មការ ព្រមទាំងតំណាងភាគីដៃគូអភិវឌ្ឍន៍ រួមមាន លោកស្រី Kirsty Harris ប្រធានកិច្ចសហប្រតិបត្តិការអភិវឌ្ឍន៍ប្រចាំស្ថានទូតអូស្ត្រាលី លោកស្រី Sarah Law លេខាធិការទី២ និងក្រុមការងារនៃកម្មវិធីភាពជាដៃគូអូស្ត្រាលី-កម្ពុជា ដើម្បីភាពធន់នឹងអាកាសធាតុ (ACP4Climate)។

កិច្ចប្រជុំនេះរៀបចំឡើងក្នុងគោលបំណងពិគ្រោះយោបល់ និងសម្រេចឯកភាពលើរចនាសម្ព័ន្ធនៃការរៀបចំផែនការមេគ្រប់គ្រងធនធានទឹក ដែលជាមូលដ្ឋានគ្រឹះរួមក្នុងការធានាឱ្យបាននូវភាពស៊ីសង្វាក់គ្នា ភាពប្រទាក់ក្រឡាគ្នា និងសមាហរណកម្មធនធានទឹក ព្រមទាំងពិនិត្យ ប្រមូលមតិយោបល់ និងផ្តល់ការណែនាំជាយុទ្ធសាស្ត្រលើឯកសារទស្សនទានបឋមសម្រាប់ផែនការទឹកមេថ្នាក់ជាតិ (NWMP) ដើម្បីកំណត់ចក្ខុវិស័យថ្នាក់ជាតិ ក្នុងការគាំទ្រដល់ការសម្រេចបាននូវ «យុទ្ធសាស្ត្របញ្ចកោណ» របស់រាជរដ្ឋាភិបាលកម្ពុជា ក៏ដូចជាការឆ្លើយតបទៅនឹងការប្រែប្រួលអាកាសធាតុ ប្រជាសាស្ត្រ និងការអភិវឌ្ឍសេដ្ឋកិច្ចសង្គម។

ឯកឧត្តមរដ្ឋលេខាធិការ មានប្រសាន៏ថា៖ ទឹកគឺជាធនធានឆ្លងវិស័យនៃការផ្លាស់ប្តូរសេដ្ឋកិច្ចសង្គម ដែលជះឥទ្ធិពលដល់គ្រប់ទិដ្ឋភាពទាំងអស់ ដោយអង្គប្រជុំបានព្រមព្រៀងគ្នាកំណត់លើរចនាសម្ព័ន្ធរួមនៃឧបករណ៍យុទ្ធសាស្ត្រទាំង ៦ រួមមាន គោលនយោបាយ និងច្បាប់ស្តីពីការគ្រប់គ្រងធនធានទឹក, ការវាយតម្លៃធនធានទឹកថ្នាក់ជាតិ, ផែនការទឹកមេថ្នាក់ជាតិ, យុទ្ធសាស្ត្រគ្រប់គ្រងធនធានទឹកថ្នាក់ជាតិ, ផែនការមេគ្រប់គ្រងធនធានទឹកថ្នាក់ជាតិ និងផែនការគ្រប់គ្រងអាងទន្លេ ដើម្បីទម្រង់ទិសការងារថ្នាក់ជាតិ និងឈានទៅបង្កើតសកម្មភាពជាក់ស្តែងនៅកម្រិតអាងស្ទឹង និងសហគមន៍មូលដ្ឋានប្រកបដោយបរិយាបន្ន។

សូមបញ្ជាក់ថា កម្មវិធី ACP4Climate (២០២៦-២០៣០) ជាកម្មវិធីវិនិយោគលើអាកាសធាតុរបស់រដ្ឋាភិបាលអូស្ត្រាលី ដែលកំពុងគាំទ្រផ្ទាល់ដល់ក្រសួងធនធានទឹក និងឧតុនិយម លើឧបករណ៍យុទ្ធសាស្ត្រចំនួន៣ គឺ៖ ការវាយតម្លៃធនធានទឹកថ្នាក់ជាតិ, ផែនការទឹកមេថ្នាក់ជាតិ, និងយុទ្ធសាស្ត្រគ្រប់គ្រងធនធានទឹកថ្នាក់ជាតិ ដើម្បីកសាងសន្តិសុខទឹក និងចីរភាពនៅកម្ពុជា។
ឯកឧត្តម បានថ្លែងអំណរគុណយ៉ាងជ្រាលជ្រៅចំពោះរដ្ឋាភិបាលអូស្ត្រាលី តាមរយៈស្ថានទូត និងកម្មវិធី ACP4Climate ដែលបានផ្តល់ជំនួយបច្ចេកទេស និងថវិកា ព្រមទាំងបានបញ្ជាក់ថា អង្គប្រជុំបានសម្រេចឯកភាពទាំងស្រុងលើសេចក្តីព្រាងទស្សនទានសម្រាប់ផែនការទឹកមេថ្នាក់ជាតិ និងរចនាសម្ព័ន្ធរៀបចំផែនការគ្រប់គ្រងទឹកផងដែរ៕
ដោយ៖ ពេជ្រ សំអឿន(ប្រភព៖ក្រសួងធនធានទឹក និងឧតុនិយម)