AKP តាកែវ ថ្ងៃទី៦ ខែតុលាឆ្នាំ២០២៦--ឯកឧត្តម វ៉ី សំណាង អភិបាលនៃគណៈអភិបាលខេត្តតាកែវ និងជាប្រធានគ ណៈកម្មាធិការសាខាកាកបាទក្រហមកម្ពុជាខេត្តតាកែវ បានអញ្ជើញដឹកនាំប្រតិភូរួមមាន អនុប្រធាន សមាជិក សមាជិកាគណៈកម្មាធិការសាខា នាយកប្រតិបត្តិសាខា មន្ត្រីប្រតិបត្តិសាខាកាកបាទក្រហមកម្ពុជាខេត្តតាកែវ និងអនុសាខាកាកបាទក្រហមកម្ពុជាស្រុកទ្រាំង ចុះសួរសុខទុក្ខ និងនាំយកអំ ណោយមនុស្សធម៌ ចែកជូនប្រជាពលរដ្ឋចំនួន12គ្រួសារ ដែលជាគ្រួសារទីទ័លក្រ និងរងផលប៉ះពាល់ដោយសារជំនន់ទឹកភ្លៀង មកពីភូមិត្រពាំងកក់និងភូមិអង្គកែវក្នុងឃុំអង្គកែវ។

ពិធីនេះរៀបចំឡើងនៅក្នុងភូមិត្រពាំងកក់ឃុំអង្គកែវស្រុកទ្រាំងខេត្តតាកែវ កាលពីព្រឹកថ្ងៃអង្គារ១០រោចខែភទ្របទឆ្នាំមមីអដ្ឋស័កព.ស២៥៧០ ត្រូវនឹងថ្ងៃទី06ខែតុលាឆ្នាំ2026។    

នៅក្នុងឱកាសនោះ ឯកឧត្តម វ៉ី សំណាង អភិបាលនៃគណៈអភិបាលខេត្តតាកែវ និងជាប្រធានគណៈកម្មាធិការសាខាកាកបាទក្រហមកម្ពុជាខេត្តតាកែវ បានពាំនាំនូវបណ្តាំផ្ញើសួរសុខទុក្ខយ៉ាងជ្រាលជ្រៅ និងការយកចិត្តទុកដាក់ខ្ពស់ពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាល សម្តេចតែងតែគិតគូរអំពីសុខទុក្ខ និងជីវភាពរស់នៅរបស់ប្រជាពលរដ្ឋនៅគ្រប់ទិសទី ដោយមិនទុកឱ្យប្រជាពលរដ្ឋណាម្នាក់ស្លាប់ដោយសារការដាច់បាយ គ្មានអាហារបរិភោគ ឬរងគ្រោះដោយគ្មានការជួយជ្រោមជ្រែងនោះឡើយ ។    

ឯកឧត្តម វ៉ី សំណាង បានមានប្រសាសន៍បន្តថា ទុក្ខលំបាករបស់បងប្អូនប្រជាពលរដ្ឋគ្រប់រូប គឺជាកង្វល់របស់ថ្នាក់ដឹកនាំដែលត្រូវតែគិតគូរ និងស្វែងរកដំណោះស្រាយឱ្យបានល្អប្រសើរ។ជាក់ស្ដែងដូចជាការនាំយកអំណោយសង្គ្រោះបន្ទាន់ មកចែកជូនដល់ប្រជាពលរដ្ឋរងគ្រោះនាពេលនេះ។ទោះបីជាមិនអាចជួយបំពេញបានទាំងស្រុង ទៅតាមតម្រូវការក៏ដោយ ក៏ប៉ុន្តែសាខាកាកបាទក្រហមកម្ពុជាខេត្តតាកែវ តែងតែបានចូលរួមចំណែកជួយដោះស្រាយ និងសម្រាលនូវការខ្វះខាតរបស់បងប្អូនបានមួយផ្នែកផងដែរ។ម្យ៉ាងទៀតអំណោយដែលបាននាំយកមកចែកជូននាពេលនេះ គឺធ្វើឡើងពីបេះដូង គ្មានការប្រកាន់ពូជសាសន៍ សាសនា ពណ៌សម្បុរ ឬនិន្នាការនយោបាយអ្វីឡើយ។    

ឯកឧត្តម វ៉ី សំណាង ក៏បានសម្តែងនូវការសោកស្តាយចំពោះផលប៉ះពាល់ ដែលបង្កឡើងដោយគ្រោះធម្មជាតិ ជំនន់ទឹកភ្លៀងនាពេលនេះ។ឯកឧត្តមក៏បានអំពាវនាវដល់បងប្អូនប្រជាពលរដ្ឋទាំងអស់ ត្រូវបង្កើនការប្រុងប្រយ័ត្នខ្ពស់ចំពោះសុខភាព អនាម័យ និងសុវត្ថិភាពផ្ទាល់ខ្លួន។ជាពិសេសត្រូវមើលថែរក្សាកូនចៅតូចៗ និងមនុស្សចាស់ជរាឱ្យបានល្អ។ដើម្បីចៀសវាងនូវគ្រោះថ្នាក់ផ្សេងៗ ដែលកើតមានឡើងជាយថាហេតុ។    
អំណោយមនុស្សធម៌ដែលត្រូវ បានផ្តល់ជូនប្រជាពលរដ្ឋទាំង12គ្រួសារនាពេលនេះ  ដោយក្នុងមួយគ្រួសារៗទទួលបាន៖អង្ករ25គីឡូក្រាម ត្រីខ1យួរ មី1កេស ប្រេងឆា1លីត្រ នំ1កញ្ចប់ ទឹកត្រី3ដប ទឹកស៊ីអុីវ3ដប កន្ទេល1 មុង1 ភួយ1 សារុង1 ក្រម៉ា1 ព្រមទាំងថវិកាឧបត្ថម្ភចំនួន20 000រៀល(ពីរម៉ឺនរៀល)ផងដែរ៕

ដោយ៖ អ៊ុច សៀង