AKP ភ្នំពេញ ថ្ងៃទី០៦ ខែតុលា ឆ្នាំ២០២៦ -- ចលនាប៉ាឡេស្ទីនហាម៉ាសកាលពីពេលថ្មីៗនេះបានអំពាវនាវដល់រដ្ឋបាលសហរដ្ឋអាមេរិក និងអ្នកសម្រុះសម្រួលផ្សេងទៀត នៅក្នុងកិច្ចពិភាក្សារបស់ខ្លួនជាមួយអ៊ីស្រាអែល ដើម្បីរារាំងអ៊ីស្រាអែលពីការប្រើប្រាស់កិច្ចព្រមព្រៀងបទឈប់បាញ់នៅតំបន់ហ្គាហ្សាស្ទ្រីប ដើម្បីបន្តការវាយប្រហារលើទឹកដីប៉ាឡេស្ទីន។

ក្រុមហាម៉ាសបាននិយាយនៅក្នុងសេចក្តីថ្លែងការណ៍មួយថា «យើងអំពាវនាវឱ្យអ្នកសម្របសម្រួល និងរដ្ឋបាលសហរដ្ឋអាមេរិកមិនអនុញ្ញាតឱ្យលោក ណេតាន់យ៉ាហ៊ូ [នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ] ប្រើប្រាស់កិច្ចព្រមព្រៀងបទឈប់បាញ់ធ្វើជាគម្របបិទបាំងដើម្បីបន្តការសម្លាប់រង្គាលរបស់ខ្លួន»។

សេវាវេជ្ជសាស្រ្តក្នុងតំបន់បាននិយាយថា កាលពីព្រឹកថ្ងៃសៅរ៍សប្តាហ៍មុន ការវាយប្រហារតាមអាកាសរបស់អ៊ីស្រាអែលទៅលើអគារលំនៅដ្ឋានមួយក្នុងទីក្រុងហ្កាហ្សា បានសម្លាប់មនុស្សយ៉ាងហោចណាស់ ០៥នាក់ដោយក្នុងនោះមានស្ត្រី ០៤នាក់។ កងទ័ព​អ៊ីស្រាអែល​មិន​បាន​ធ្វើ​អត្ថាធិប្បាយចំពោះ​ការ​វាយ​ប្រហារ​នោះ​ទេ។

នៅថ្ងៃទី០៩ ខែតុលា ឆ្នាំ២០២៥ អ៊ីស្រាអែល និងក្រុមហាម៉ាសជាមួយនឹងការសម្រុះសម្រួលនៃប្រទេសអេហ្ស៊ីប កាតា សហរដ្ឋអាមេរិកនិងតួកគី បានយល់ព្រមអនុវត្តដំណាក់កាលទីមួយនៃផែនការសន្តិភាពដែលបង្ហាញដោយប្រធានាធិបតីសហរដ្ឋអាមេរិក លោក ដូណាល់ ត្រាំ។ នៅថ្ងៃបន្ទាប់ បទឈប់បាញ់បានចូលជាធរមាននៅតំបន់ហ្គាហ្សាស្ទ្រីប។អនុលោមតាមកិច្ចព្រមព្រៀងនេះ កងទ័ពអ៊ីស្រាអែលបានដកខ្លួនទៅកាន់អ្វីដែលគេហៅថាបន្ទាត់លឿង ដោយរក្សាបាននូវការគ្រប់គ្រងជាង ៥០% នៃទឹកដីនៃតំបន់ហ្គាហ្សាស្រ្ទីបនោះ៕

ដោយ៖ យា ចិន្ដាខន្ដី (ប្រភព៖ ស្ពុតនីក)