AKP ភ្នំពេញ ថ្ងៃទី០៦ ខែតុលា ឆ្នាំ២០២៦ -- ក្រសួងការបរទេសរុស្ស៊ី បានប្រកាសកាលពីពេលថ្មីៗនេះថា ប្រទេសរុស្ស៊ី និងឥណ្ឌា បានលើកកម្ពស់ទំនាក់ទំនងរបស់ខ្លួនទៅដល់កម្រិតភាពជាដៃគូយុទ្ធសាស្ត្រពិសេស និងមានអភ័យឯកសិទ្ធិ។

ក្រសួងនេះបានលើកឡើងនៅលើបណ្តាញតេឡេក្រាមថា «នៅថ្ងៃទី០៣ ខែតុលា ឆ្នាំ២០០០ សេចក្តីថ្លែងការណ៍ ស្តីពីភាពជាដៃគូយុទ្ធសាស្ត្ររវាងរុស្ស៊ី និងឥណ្ឌា ត្រូវបានចុះហត្ថលេខា... ចាប់តាំងពីពេលនោះមក កិច្ចសហប្រតិបត្តិការរវាងរុស្ស៊ី និងឥណ្ឌាបានកើនឡើងដល់កម្រិតខ្ពស់មួយទៀត គឺកម្រិតនៃភាពជាដៃគូយុទ្ធសាស្ត្រពិសេស និងមានអភ័យឯកសិទ្ធិ»។

សេចក្តីថ្លែងការណ៍នោះបានបញ្ជាក់ថា ឯកសារនេះត្រូវបានចុះហត្ថលេខាក្នុងអំឡុងពេលនៃដំណើរទស្សនកិច្ចផ្លូវរដ្ឋរបស់ប្រធានាធិបតីរុស្ស៊ី លោក វ្ល៉ាឌីមៀរ ពូទីន ទៅកាន់ប្រទេសឥណ្ឌា កាលពីថ្ងៃទី០២ ដល់ថ្ងៃទី០៥ ខែតុលា ឆ្នាំ២០០០។

ក្រសួងបានបន្ថែមថា ប្រទេសទាំងនេះគាំទ្រដល់ការធ្វើឱ្យទំនាក់ទំនងអន្តរជាតិមានលក្ខណៈប្រជាធិបតេយ្យ និងកំពុងពង្រីកកិច្ចសហប្រតិបត្តិការនៅក្នុងវេទិកាអន្តរជាតិ ជាពិសេសគឺក្នុងក្រុមប្រទេស G20អង្គការសហប្រជាជាតិ (UN) ក្រុមប្រទេសប្រ៊ីកស៍ BRICS និងអង្គការសហប្រតិបត្តិការសៀងហៃ (SCO)។

ក្រសួងក៏បានរំលឹកឡើងវិញនូវប្រសាសន៍របស់លោក ពូទីន ដែលបាននិយាយក្រោយកិច្ចពិភាក្សារវាងរុស្ស៊ី និងឥណ្ឌានៅទីក្រុងញូវដេលី កាលពីថ្ងៃទី០៥ ខែធ្នូ ឆ្នាំ២០២៥ ដែលបានបញ្ជាក់ថា ប្រទេសរុស្ស៊ី និងឥណ្ឌាអនុវត្តគោលនយោបាយការបរទេសប្រកបដោយឯករាជ្យភាព និងស្វ័យភាព៕

ដោយ៖ យា ចិន្ដាខន្ដី (ប្រភព៖ ស្ពុតនីក)