AKP ភ្នំពេញ ថ្ងៃទី៥ ខែតុលា ឆ្នាំ២០២៦–សម្តេចមហាបវរធិបតី នាយឧត្តមសេនីយ៍ ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកកម្ពុជា និងជាអនុប្រធានទី១ សមាគមអតីតយុទ្ធជន និងនិវត្តជនកម្ពុជា នាព្រឹកថ្ងៃទី៥ ខែតុលា ឆ្នាំ២០២៦នេះ នឹងអញ្ជើញចូលរួមជាអធិបតីដ៏ខ្ពង់ខ្ពស់ក្នុងកម្មវិ​ធី​បើកមហាសន្និបាតសហព័ន្ធអតីតយុទ្ធជនបណ្តាប្រទេសអាស៊ាន (VECONAC) លើកទី២៥ នៅវិមានសន្តិភាព។

មហាសន្និបាតសហព័ន្ធអតីតយុទ្ធជនបណ្តាប្រទេសអាស៊ាន(VECONAC) លើ​កទី២៥នេះ ជាព្រឹត្តការណ៍លើកទី២ បន្ទាប់ពីកម្ពុជាបានរៀបចំឡើងជាលើកដំបូង នៅក្នុងអំ​ឡុង​ឆ្នាំ២០១៩ ស្ថិត ក្រោមអធិបតីភាពដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន អតីត​នាយករដ្ឋមន្ត្រី បច្ចុប្បន្នជាប្រធានព្រឹទ្ធសភានៃព្រះរាជាណាចក្រកម្ពុជា និងជាប្រធានសមាគម។

ការរៀបចំមហាសន្និបាត VECONAC នេះ បានផ្តល់នូវឱកាសយ៉ាងសំខាន់សម្រាប់អតីតយុទ្ធជនបណ្តាប្រទេសអាស៊ាន ដើម្បីបញ្ជាក់ជាថ្មីនូវការប្តេជ្ញាចិត្តរួមគ្នាក្នុងការពង្រឹង​សាមគ្គីភាព មិត្តភាព និងកិច្ចសហប្រតិបត្តិការរវាងអង្គការ សមាគមអតីតយុទ្ធជននៃបណ្តាប្រទេសអាស៊ាន ព្រមទាំងផ្លាស់ប្តូរបទពិសោធន៍ លើ​កកម្ពស់សុខុ​មា​ល​ភាពអតីតយុទ្ធជន និងជំរុញការចូលរួមរបស់អតីតយុទ្ធជនក្នុងការរក្សាសន្តិភាព ស្ថិរភាព ការអភិវឌ្ឍសង្គម ការកសាង​​សហគមន៍អាស៊ានប្រកប​ដោ​យ​​ភាព​រឹងមាំ និងចីរភាព។

ក្រោមការដឹកនាំរបស់រាជរដ្ឋាភិបាល នីតិកាលទី៧ នៃរដ្ឋសភា កម្ពុជាបានបន្តថែរក្សាសន្តិភាព ស្ថិរភាពនយោបាយ សន្តិសុខ សណ្តាប់ធ្នាប់សាធារណៈ និងជំរុញការអភិវឌ្ឍជាតិជាបន្តបន្ទាប់។ សមិទ្ធផលទាំងនេះមានមូលដ្ឋានពីសន្តិភាព និងការឯកភាពជាតិ ដែលសម្រេចបាននៅចុងឆ្នាំ១៩៩៨ ក្រោមនយោបាយឈ្នះ ឈ្នះ របស់ សម្តេចតេជោ ហ៊ុន សែន ព្រមទាំងការធ្វើពលីកម្ម និងការរួមចំណែកដ៏ធំធេងរបស់អតីតយុទ្ធជន ដែលបានបម្រើជាតិ មាតុភូមិ និងប្រជាជន។

​បន្តពីមូលដ្ឋានដ៏រឹងមាំនេះ រាជរដ្ឋាភិបាល នីតិកាលទី៧ ដឹកនាំដោយ សម្តេចមហាបវរធិបតី ហ៊ុន ម៉ាណែត បានដាក់ចេញ និងអនុវត្ត យុទ្ធសាស្ត្របញ្ចកោណ-ដំណាក់កាលទី១ ដោយយកចិត្តទុកដាក់លើការលើកកម្ពស់ជីវភាព សុខុមាលភាព និងសេចក្តីថ្លៃថ្នូររបស់អតីតយុទ្ធជន និវត្តជន ជនមានពិការភាព និងគ្រួសារជនពលី មរណៈ តាមរយៈការពង្រឹងប្រព័ន្ធសន្តិសុខសង្គម សេវាថែទាំសុខភាព និងការគាំពារសង្គម។

​រាជរដ្ឋាភិបាលកម្ពុជា ដឹកនាំដោយគណបក្សប្រជាជនកម្ពុជា ដែលមាន សម្តេច តេជោប្រធាន និងសម្តេចធិបតីនាយករដ្ឋមន្រ្តី និងជាអនុប្រធានទី១ សមាគម គឺបានយកចិត្តទុកដាក់ខ្ពស់ បន្តអនុវត្តកម្មវិធីគាំពារសំខាន់ៗ រួមមាន ការផ្តល់របបសន្តិសុខសង្គម និងសេវាថែទាំសុខភាព ការឧបត្ថម្ភគ្រួសារជនពលី មរណៈ ការផ្តល់ដីសម្បទានសង្គមកិច្ច និងសាងសង់លំនៅឋាន ព្រមទាំងការផ្តល់អាហារូបករណ៍ និងការបណ្តុះបណ្តាលជំនាញដល់កូន និងអ្នកក្នុងបន្ទុករបស់អតីតយុទ្ធជន និងនិវត្តជនក្រីក្រ។

​ទន្ទឹមនេះ សមាគមបានបន្តជំរុញការរៀបចំ ភូមិដ្ឋានអតីតយុទ្ធជន និងនិវត្តជន លើដី សម្បទានសង្គមកិច្ចដែលរាជរដ្ឋាភិបាលផ្តល់ជូន ដើម្បីធានាឱ្យអតីតយុទ្ធជន និវត្តជន និងគ្រួសារជនពលី មរណៈ ដែលមានជីវភាពលំបាក មានលទ្ធភាពបង្កើតមុខរបរ និងលើកកម្ពស់ជីវភាពរស់នៅប្រកបដោយសេចក្តីថ្លៃថ្នូរ។

សមាគមអតីតយុទ្ធជន និងនិវត្តជនកម្ពុជា ដែលពីមុនមានឈ្មោះថា «សមាគមអតីតយុទ្ធជនកម្ពុជា» (ស.អ.ក.) ត្រូវបានបង្កើតឡើងតាមរយៈមហាសន្និបាតតំណាងសមាគមអតីតយុទ្ធជនកម្ពុជាទូទាំងប្រទេសលើកទី១ នាថ្ងៃទី២១ ខែមិថុនា ឆ្នាំ២០០៧។

ក្នុងរយៈពេលប្រមាណ១៩ឆ្នាំកន្លងមក ក្រោមការដឹកនាំដ៏ខ្ពង់ខ្ពស់របស់ សម្តេចតេជោប្រធាន និងដោយមាន សម្តេចធិបតី ជាស្ថាបនិក និងជាប្រតិបត្តិករដឹកនាំដោយផ្ទាល់ សមាគមបានធ្វើការកែសម្រួលបទដ្ឋានគតិយុត្ត លក្ខន្តិកៈ និងរចនាសម្ព័ន្ធដឹកនាំជាបន្តបន្ទាប់ ឱ្យស្របតាមការវិវត្តរបស់សង្គមជាតិ ដោយពង្រីកការចូលរួមពីក្រសួង ស្ថាប័ន អង្គភាព ថ្នាក់ជាតិ និងថ្នាក់ក្រោមជាតិ សំដៅពង្រឹងប្រសិទ្ធភាពការងារ និងធ្វើជាខ្នងបង្អែកដ៏រឹងមាំជូនអតីតយុទ្ធជន និងគ្រួសារជនពលី មរណៈ ដោយមិនទុកនរណាម្នាក់ចោលឡើយ។

ជាពិសេស ដោយមានការយកចិត្តទុកដាក់ និងអនុសាសន៍ដ៏ខ្ពង់ខ្ពស់របស់ សម្តេចតេជោប្រធាន វិសាលភាពរបស់សមាគមត្រូវបានពង្រីក ដោយបញ្ចូលនិវត្តជនដែលជាអតីតមន្ត្រីរាជការស៊ីវិលពីបណ្តាក្រសួង ស្ថាប័ននានា ជាសមាជិក និងបានសម្រេចប្តូរឈ្មោះជាផ្លូវការពី «សមាគមអតីតយុទ្ធជនកម្ពុជា» ទៅជា «សមាគមអតីតយុទ្ធជន និងនិវត្តជនកម្ពុជា»។

ការវិវត្តដ៏មានសារៈសំខាន់នេះ មិនត្រឹមតែជាការពង្រីកវិសាលភាពរបស់សមាគមប៉ុណ្ណោះទេ ប៉ុន្តែថែមទាំងជាការផ្តល់តម្លៃ និងតបស្នងសងគុណចំពោះការលះបង់ និងគុណបំណាច់ដ៏ធំធេងរបស់អតីតយុទ្ធជន និងនិវត្តជន ដែលបានបូជាកម្លាំងកាយ កម្លាំងចិត្ត សាច់ស្រស់ ឈាមស្រស់ និងប្រាជ្ញាស្មារតី ក្នុងបុព្វហេតុការពារឯករាជ្យ សន្តិភាព អធិបតេយ្យភាព និងបូរណភាពទឹកដី ព្រមទាំងចូលរួមស្តារ កសាង និងអភិវឌ្ឍប្រទេសជាតិរហូតមកដល់បច្ចុប្បន្ន។ចំណែកឯ សហព័ន្ធអតីតយុទ្ធជនបណ្តាប្រទេសអាស៊ាន (VECONAC) ត្រូវបានបង្កើតឡើងនៅថ្ងៃទី១៩ ខែធ្នូ ឆ្នាំ១៩៨០ និងបច្ចុប្បន្នមានសមាជិកសរុបចំនួន ១០ប្រទេស ដែលកំពុងបំពេញភារកិច្ច​លើការងារអតីតយុទ្ធជនយ៉ាងសកម្មតាមបណ្តាប្រទេសរៀងៗខ្លួននៅក្នុងតំបន់៕

ដោយ៖ គង់ សិរីរ័ត្ន