AKP តាកែវ ថ្ងៃទី០៤ ខែតុលា ឆ្នាំ២០២៦ -- លោក ភួន ឈីម អភិបាលនៃគណៈអភិបាលស្រុកកោះអណ្ដែត បានអញ្ជើញជាអធិបតីភាពក្នុងពិធីបើកវគ្គបណ្ដុះបណ្ដាលស្ដីពី «ការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០២៦» នៅតាមមណ្ឌលប្រមូលផ្ដុំក្រុង-ស្រុក ដោយមានការអញ្ជើញចូលរួមពីលោក លោកស្រីអភិបាលរងស្រុក តំណាងក្រុមប្រឹក្សាឃុំ ចំនួន ០២រូបក្នុងមួយឃុំ ព្រមទាំងក្រុមចុះឈ្មោះបោះឆ្នោត (ក.ច.ប) ជាច្រើនរូបផងដែរ។ ពិធីនេះរៀបចំឡើងនៅក្នុងវត្តកោះអណ្ដែត ស្ថិតនៅក្នុងឃុំរមេញស្រុកកោះអណ្ដែត ខេត្តតាកែវ កាលពីព្រឹកថ្ងៃអាទិត្យ ៨រោច ខែភទ្របទ ឆ្នាំមមី អដ្ឋស័ក ព.ស២៥៧០ ត្រូវនឹងថ្ងៃទី០៤ ខែតុលា ឆ្នាំ២០២៦ នេះ។

មានប្រសាសន៍សំណេះសំណាលក្នុងពិធីនោះ លោក ភួន ឈីម អភិបាលនៃគណៈអភិបាលស្រុកកោះអណ្ដែត បានថ្លែងថា វគ្គបណ្ដុះបណ្ដាលនេះធ្វើឡើងក្នុងគោលបំណងពង្រឹងសមត្ថភាព និងផ្តល់ចំណេះដឹងបន្ថែមដល់មន្ត្រីពាក់ព័ន្ធទាំងអស់អំពីនីតិវិធី និងបច្ចេកទេសនៃការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០២៦ ឱ្យកាន់តែមានប្រសិទ្ធភាព និងមានភាពរលូន។

លោក ភួន ឈីម ក៏បានថ្លែងអំណរគុណ និងកោតសរសើរដល់មន្ត្រីពាក់ព័ន្ធទាំងអស់ ដែលបានខិតខំត្រង់ត្រាប់ស្តាប់ការពន្យល់ណែនាំរបស់គ្រូបណ្តុះបណ្តាល និងសួរដេញដោលនូវចំណុចមិនទាន់ច្បាស់លាស់ ដើម្បីយកទៅអនុវត្តការងារជាក់ស្តែងឱ្យចំគោលដៅ និងត្រឹមត្រូវតាមនីតិវិធី ហើយត្រូវបំពេញភារកិច្ចដោយស្មោះត្រង់ ផ្ដល់កិច្ចសហការល្អ សម្រួលដល់ប្រជាពលរដ្ឋ និងប្រកាន់ខ្ជាប់នូវភាពស្មោះត្រង់ តម្លាភាព និងយុត្តិធម៌ ក្នុងការពិនិត្យបញ្ជីឈ្មោះ និងការចុះឈ្មោះបោះឆ្នោត។

លោកអភិបាលស្រុកកោះអណ្ដែត ក៏បានស្នើឱ្យអាជ្ញាធរឃុំ-ភូមិ និងមន្ត្រីក.ច.ប រួមសហការគ្នាផ្សព្វផ្សាយព័ត៌មានឱ្យបានទូលំទូលាយដល់ប្រជាពលរដ្ឋ ដែលមានអាយុគ្រប់បោះឆ្នោត ឬអ្នកដែលទើបផ្លាស់ប្តូរទីលំនៅ សូមអញ្ជើញមកពិនិត្យឈ្មោះ និងចុះឈ្មោះបោះឆ្នោតឱ្យបានគ្រប់ៗគ្នា និងទាន់ពេលវេលា។

លោកអភិបាលស្រុកកោះអណ្ដែត ក៏បានជឿជាក់យ៉ាងមុតមាំថា បន្ទាប់ពីបញ្ចប់វគ្គបណ្ដុះបណ្ដាលនេះ មន្ត្រី ក.ច.ប ទាំងអស់នឹងទទួលបាននូវចំណេះដឹង បទពិសោធន៍ និងសមត្ថភាពពេញលេញ ដើម្បីដឹកនាំ និងអនុវត្តដំណើរការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០២៦ នៅក្នុងស្រុកកោះអណ្ដែត ឱ្យទទួលបានលទ្ធផលជោគជ័យ និងស្របតាមប្រតិទិនដែលបានកំណត់៕

ដោយ៖ អ៊ុច សៀង