AKP បន្ទាយមានជ័យ ថ្ងៃទី៤ ខែតុលា ឆ្នាំ២០២៦-- ឯកឧត្តម នាយឧត្តមសេនីយ៍ កែ គឹមយ៉ាន សមាជិករដ្ឋសភានៃព្រះរាជាណាចក្រកម្ពុជា តំណាងរាស្ត្រមណ្ឌលខេត្តបន្ទាយមានជ័យ និងជាឧត្តមប្រឹក្សាផ្ទាល់ព្រះមហាក្សត្រ នៅព្រឹកថ្ងៃទី៤ ខែតុលា ឆ្នាំ២០២៦ បានអញ្ជើញជួបសំណេះសំណាល សួរសុខទុក្ខ និងនាំយកអំណោយជាគ្រឿងឧបភោគបរិភោគ ចែកជូនបងប្អូនប្រជាពលរដ្ឋចំនួន ៩៣៩គ្រួសារ ដែលរងគ្រោះដោយសារទឹកជំនន់ ក្នុងភូមិសាស្ត្រក្រុងប៉ោយប៉ែត ខេត្តបន្ទាយមានជ័យ។

ការចុះជួបសួរសុខទុក្ខ និងនាំយកស្បៀងអាហារទៅជូនប្រជាពលរដ្ឋនៅពេលនេះ បានបង្ហាញពីការយកចិត្តទុកដាក់របស់ថ្នាក់ដឹកនាំ និងរាជរដ្ឋាភិបាលចំពោះសុខទុក្ខរបស់ប្រជាពលរដ្ឋនៅគ្រប់ទីកន្លែង ជាពិសេសប្រជាពលរដ្ឋដែលកំពុងជួបប្រទះការលំបាកដោយសារគ្រោះធម្មជាតិ។

ក្នុងឱកាសនោះ ឯកឧត្តម នាយឧត្តមសេនីយ៍ កែ គឹមយ៉ាន បានលើកឡើងថា ការនាំយកស្បៀងមកចែកជូនប្រជាពលរដ្ឋនៅពេលនេះ មិនត្រឹមតែជាការរួមចំណែកដោះស្រាយតម្រូវការជីវភាពប្រចាំថ្ងៃរបស់ប្រជាពលរដ្ឋ ដែលរងគ្រោះដោយសារគ្រោះធម្មជាតិទឹកជំនន់នាពេលកន្លងមកប៉ុណ្ណោះទេ ប៉ុន្តែថែមទាំងជាការបង្ហាញពីការគិតគូរដល់ប្រជាពលរដ្ឋនៅគ្រប់កាលៈទេសៈ ជាពិសេសនៅពេលជួបប្រទះគ្រោះធម្មជាតិ ដែលទាមទារឱ្យមានការចូលរួមពីគ្រប់ភាគីក្នុងការជួយសង្គ្រោះ និងសម្រាលការលំបាកជូនប្រជាពលរដ្ឋ។

ឯកឧត្តមបានបន្តថា ក្នុងស្ថានភាពដែលប្រជាពលរដ្ឋជួបប្រទះគ្រោះទឹកជំនន់ ការផ្តល់ជំនួយស្បៀង និងសម្ភារៈចាំបាច់នានា គឺជាការរួមចំណែកដ៏មានសារៈសំខាន់ក្នុងការជួយឱ្យគ្រួសារដែលរងផលប៉ះពាល់អាចបន្តជីវភាពប្រចាំថ្ងៃបាន ខណៈអាជ្ញាធរ និងកម្លាំងពាក់ព័ន្ធក៏ត្រូវបន្តយកចិត្តទុកដាក់លើសុវត្ថិភាព សុខភាព និងជីវភាពរបស់ប្រជាពលរដ្ឋរងគ្រោះឱ្យបានជាប់ជាប្រចាំ។

ជាមួយគ្នានេះ ឯកឧត្តម កែ គឹមយ៉ាន បានបង្ហាញនូវការយកចិត្តទុកដាក់ចំពោះស្ថានភាពរស់នៅរបស់ប្រជាពលរដ្ឋដែលរងផលប៉ះពាល់ និងបានលើកទឹកចិត្តឱ្យអាជ្ញាធរមូលដ្ឋាន និងគ្រប់ភាគីពាក់ព័ន្ធ បន្តសហការគ្នាដោះស្រាយបញ្ហាប្រឈមនានាដែលកើតមាន ដោយផ្តល់អាទិភាពខ្ពស់ដល់សុវត្ថិភាព និងផលប្រយោជន៍របស់ប្រជាពលរដ្ឋ។

ការជួបសំណេះសំណាលនៅពេលនេះ ក៏ជាឱកាសមួយសម្រាប់ថ្នាក់ដឹកនាំស្តាប់ពីស្ថានភាពជាក់ស្តែង និងការលំបាករបស់ប្រជាពលរដ្ឋដែលទទួលរងផលប៉ះពាល់ពីទឹកជំនន់ ដើម្បីជំរុញឱ្យការឆ្លើយតបរបស់អាជ្ញាធរមានប្រសិទ្ធភាព និងស្របតាមតម្រូវការជាក់ស្តែងនៅមូលដ្ឋាន។

សកម្មភាពនេះក៏បានឆ្លុះបញ្ចាំងពីស្មារតីរួមគ្នារវាងថ្នាក់ដឹកនាំ អាជ្ញាធរ និងប្រជាពលរដ្ឋ ក្នុងការជួយគ្នាឆ្លងកាត់ស្ថានភាពលំបាកដែលបង្កឡើងដោយគ្រោះធម្មជាតិ ព្រមទាំងបង្ហាញថា ប្រជាពលរដ្ឋដែលជួបការលំបាកមិនត្រូវបានទុកឱ្យប្រឈមបញ្ហាតែម្នាក់ឯងឡើយ។

សូមជម្រាបថា ក្នុងរយៈពេលកន្លងមកនេះ អាជ្ញាធរខេត្តបន្ទាយមានជ័យ និងក្រុងប៉ោយប៉ែត បានបន្តចាត់វិធានការជួយសង្គ្រោះ ជម្លៀសប្រជាពលរដ្ឋទៅកាន់ទីតាំងមានសុវត្ថិភាព និងផ្តល់ជំនួយសង្គ្រោះបឋម ដើម្បីកាត់បន្ថយផលប៉ះពាល់ពីទឹកជំនន់ និងធានាសុវត្ថិភាពជូនប្រជាពលរដ្ឋ៕

ដោយ ឈុន សារ៉ាត