AKP ភ្នំពេញ ថ្ងៃទី៤ ខែតុលា ឆ្នាំ២០២៦-- កម្មវិធី (SMART-Spatial Monitoring and Reporting Tool) បានផ្តល់ជំនួយដល់ការប្រមូល តាមដាន និងគ្រប់គ្រងទិន្នន័យល្បាត ជាពិសេសវាអាចជួយក្រុមការងារនៅទីវាលកត់ត្រាជាប្រព័ន្ធនូវផ្លូវល្បាត ការសង្កេតឃើញសត្វព្រៃ កត្តាគំរាមកំហែង សកម្មភាពខុសច្បាប់ និងព័ត៌មានសំខាន់ៗផ្សេងទៀតដែលប្រមូលបានក្នុងអំឡុងពេលចុះល្បាត។

ប្រភពពីអង្គការ NatureLife បានឱ្យដឹងនៅថ្ងៃទី៣ ខែតុលា ឆ្នាំ២០២៦ថា មន្ត្រីឧទ្យានុរក្ស និងក្រុមល្បាតសហគមន៍ ដែលជាអ្នកប្រើប្រាស់សំខាន់នៅទីវាល អាចប្រើប្រាស់កម្មវិធី ស្មាត សម្រាប់ជួយបង្កើនប្រសិទ្ធភាព និងភាពស៊ីសង្វាក់គ្នានៃការងារល្បាត ព្រមទាំងពង្រឹងការតាមដានជីវចម្រុះ។ តាមរយៈគម្រោងថ្មីដែលទទួលបានការគាំទ្រពីមូលនិធិ Critical Ecosystem Partnership Fund (CEPF) អង្គការជីវិតធម្មជាតិនៅកម្ពុជា (NatureLife Cambodia) បាននឹងកំពុងពង្រឹងសមត្ថភាពមន្ត្រីឧទ្យានុរក្ស និងគណៈកម្មការតំបន់ការពារធម្មជាតិសហគមន៍នៅក្នុងតំបន់រ៉ាមសារស្ទឹងសែន និងតំបន់រ៉ាមសារបឹងទន្លេឆ្មារ ដើម្បីប្រើប្រាស់ឧបករណ៍ឌីជីថលសម្រាប់បង្កើនប្រសិទ្ធភាពការងារល្បាត និងការតាមដានជីវចម្រុះ។

ថ្មីៗនេះ អង្គការជីវិតធម្មជាតិនៅកម្ពុជា បានរៀបចំវគ្គបណ្តុះបណ្តាលរំលឹកចំណេះដឹងស្តីពីការប្រើប្រាស់ស្មាតលើទូរស័ព្ទដៃសម្រាប់ប្រមូល និងកត់ត្រាទិន្នន័យនៅទីវាល ព្រមទាំងបណ្តុះបណ្តាលបច្ចេកទេសប្រើប្រាស់ម៉ាស៊ីនថតរូប ដើម្បីកត់ត្រាសត្វស្លាប និងជីវចម្រុះផ្សេងៗក្នុងអំឡុងពេលចុះល្បាត។ ការពង្រឹងសមត្ថភាពមន្ត្រីឧទ្យានុរក្ស និងសមាជិកសហគមន៍ក្នុងការប្រើប្រាស់កម្មវិធីស្មាត និងឧបករណ៍ថតរូបនេះនឹងរួមចំណែកដល់ការធ្វើឲ្យការតាមដាននៅទីវាលកាន់តែមានប្រសិទ្ធភាព ការគ្រប់គ្រងទិន្នន័យល្បាតកាន់តែប្រសើរ និងការពារធនធានធម្មជាតិ និងជីវចម្រុះនៅតំបន់រ៉ាមសារស្ទឹងសែន និងតំបន់រ៉ាមសារបឹងទន្លេឆ្មារ ក្នុងតំបន់បឹងទន្លេសាប៕

ដោយ ណយ នឿន (ប្រភព៖ NatureLife)