AKP ភ្នំពេញ ថ្ងៃទី០២ ខែតុលា ឆ្នាំ២០២៦--គណៈប្រតិភូក្រសួងផែនការដឹកនាំដោយឯកឧត្តម ប៊ិន ត្រឈៃ រដ្ឋមន្ត្រីក្រសួងផែនការ អញ្ជើញចុះសំណេះសំណាល សួរសុខទុក្ខ និងនាំយកអំណោយឧបត្ថម្ភជូនដល់កងកម្លាំងនគរបាលនៃអង្គភាពវរសេនាតូចនគរបាលការពារព្រំដែនគោកលេខ៨២៣ និងលេខ៣១០ ដែលកំពុងឈរជើងការពារបូរណភាពទឹកដីនៅភូមិសាស្ត្រតំបន់សំឡូត ខេត្តបាត់ដំបង នាព្រឹកថ្ងៃទី២ ខែតុលា ឆ្នាំ២០២៦ ក្នុងឱកាសពិធីបុណ្យភ្ជុំបិណ្ឌ ដែលនឹងឈានចូលមកដល់នាពេលខាងមុខនេះ។

ឯកឧត្តមរដ្ឋមន្ត្រីបានគូសបញ្ជាក់ថា  នេះគឺជាកម្មវិធីលើកទី៤ ហើយក្នុងនាម ក្រសួងផែនការ បានចុះមកសំណេះសំណាល និងសួរសុខទុក្ខដល់កងកម្លាំងទាំងពីរអង្គភាព ដែលជាសម្ព័ន្ធមេត្រីភាពជាមួយក្រសួងផែនការ កំពុងឈរជើងការពារភូមិសាស្ត្រតំបន់សំឡូត ក្រោយពីជម្លោះព្រំដែនកម្ពុជា-ថៃ ដែលបានផ្ទុះឡើង ចាប់តាំងពីខែកក្កដា ឆ្នាំ២០២៥ ចាប់តាំងពីព្រំដែនគោក រហូតដល់ព្រំដែនសមុទ្រ ដែលបានបន្សល់ទុកស្លាកស្នាម ព្រមទាំងផលវិបាកជាច្រើនដល់ប្រជាជនស្លូតត្រង់ សេដ្ឋកិច្ចជាតិ និងការអភិវឌ្ឍន៍សង្គម។

ឯកឧត្តមបន្តថា ទោះបីជាភូមិសាស្ត្រតំបន់សំឡូតមិនបានឆ្លងកាត់ការផ្ទុះអាវុធផ្ទាល់ជាមួយថៃ ដូចបណ្តាតំបន់មួយចំនួនទៀតក៏ដោយ ក៏បងប្អូនកងកម្លាំងរបស់យើងនៅតែបន្តលះបង់កម្លាំងកាយចិត្ត ភាពសុខសាន្តផ្ទាល់ខ្លួន និងការឃ្លាតឆ្ងាយពីគ្រួសារ ដើម្បីបម្រើបុព្វហេតុជាតិមាតុភូមិ។ ការឈរជើងការពារព្រំដែនក្នុងស្ថានភាពលំបាកលំបិន ការឆ្លងកាត់ឧបសគ្គ និងការការពារសន្តិសុខសុវត្ថិភាពនៅតាមខ្សែបន្ទាត់ព្រំដែនយ៉ាងសកម្ម គឺជាវីរភាពដ៏អង់អាច និងជាការលះបង់យ៉ាងធំធេងដែលមិនអាចកាត់ថ្លៃបាន ក្នុងការថែរក្សាសុខសន្តិភាព និងភាពស្ងប់ស្ងាត់ជូនប្រជាជន។

ឯកឧត្តមរដ្ឋមន្ត្រីបានបន្តទៀតថា រហូតមកដល់ពេលនេះ ទោះបីជាមានការខិតខំចរចារកដំណោះស្រាយ មិនទាន់ឈានដល់កិច្ចព្រមព្រៀងណាមួយក៏ដោយ រាជរដ្ឋាភិបាលកម្ពុជា នៅតែបន្តប្រកាន់ខ្ជាប់នូវគោលជំហរដោះស្រាយបញ្ហាព្រំដែនជាមួយប្រទេសជិតខាងតាមផ្លូវការទូត និងច្បាប់អន្តរជាតិ។ ស្ថិតក្នុងស្ថានការណ៍នេះ រាជរដ្ឋាភិបាលកម្ពុជាក្រោមការដឹកនាំដ៏ម៉ឺងម៉ាត់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានដាក់ចេញនូវវិធានការជាយុទ្ធសាស្ត្រក្នុងការគាំទ្រ និងលើកកម្ពស់ជីវភាពរស់នៅរបស់កងកម្លាំងប្រដាប់អាវុធនៅតាមខ្សែបន្ទាត់ព្រំដែនឱ្យកាន់តែប្រសើរឡើង។ ការពង្រឹងកិច្ចសហការក្នុងទម្រង់សម្ព័ន្ធមេត្រីភាពរវាងក្រសួង ស្ថាប័នរដ្ឋ និងអង្គភាពកងកម្លាំងប្រដាប់អាវុធ គឺជាការសបញ្ជាក់ពីការគាំទ្ររបស់សមរភូមិក្រោយ និងជាកម្លាំងជំរុញយ៉ាងរឹងមាំដល់សមរភូមិមុខ។

ឯកឧត្តមរដ្ឋមន្ត្រី ក៏បានថ្លែងអំណរគុណ និងវាយតម្លៃខ្ពស់ចំពោះស្មារតីលះបង់ដ៏ធំធេងរបស់កងកម្លាំងទាំងពីរអង្គភាព ដែលជាអង្គភាពសម្ព័ន្ធមេត្រីភាពជាមួយក្រសួងផែនការ ហើយជាកិច្ចឆ្លើយតបទៅនឹងការលះបង់នេះ ក្រសួងផែនការ ថ្នាក់ដឹកនាំ មន្ត្រីរាជការគ្រប់លំដាប់ថ្នាក់ និងសប្បុរសជន បានរៀបចំអំណោយឧបត្ថម្ភជូនដល់កងកម្លាំងរបស់យើងទាំងពីរអង្គភាព ដោយក្នុងម្នាក់ៗទទួលបាន អង្ករ ១០គីឡូក្រាម មី១កេស ទឹកត្រី ១យួរ និងថវិកា ២ម៉ឺនរៀល។

ទន្ទឹមនឹងនេះ ឯកឧត្តមក៏បានឧបត្ថម្ភថវិកាចំនួន៣លានរៀល អង្ករ ១០០គីឡូក្រាម មី ១០កេស និងទឹកត្រី ១០យួរ និងម៉ូតូចំនួន ១គ្រឿង ជូនដល់បញ្ជាការដ្ឋានអង្គភាពនីមួយៗផងដែរ៕

ដោយ ពេជ្រ សំអឿន(ប្រភព៖ក្រសួងផែនការ)