AKP ភ្នំពេញ ថ្ងៃទី២ ខែ តុលា ឆ្នាំ ២០២៦--

ឯកឧត្តម តូច ប៊ុនហួរ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជាប្រធានគណៈកម្មាធិការ នៅថ្ងៃទី១ ខែតុលា ឆ្នាំ២០២៦ បានដឹកនាំកិច្ចប្រជុំដើម្បីពិនិត្យ និងវាយតម្លៃពូជក្លូនកៅស៊ូថ្មី ដែលជាស្នាដៃស្រាវជ្រាវរបស់វិទ្យាស្ថានស្រាវជ្រាវកៅស៊ូកម្ពុជា នៃបណ្ឌិត្យសភាវិទ្យាសាស្ត្រកសិកម្មកម្ពុជា។កិច្ចការងារនេះជាផ្នែកមួយនៃការជំរុញការស្រាវជ្រាវ និងកែលម្អពូជដំណាំនៅក្នុងប្រទេស។

ឯកឧត្តម តូច ប៊ុនហួរ បានឱ្យដឹងថា ពូជក្លូនកៅស៊ូថ្មីនេះ ជាពូជក្លូនកៅស៊ូទី៤ ដែលវិទ្យាស្ថានបានបង្កើតឡើង បន្ទាប់ពីការសិក្សាស្រាវជ្រាវយ៉ាងយកចិត្តទុកដាក់រយៈពេល ១៥ឆ្នាំ ពោលគឺចាប់ពីឆ្នាំ២០១១ ដល់ឆ្នាំ២០២៦។

កន្លងមកមានពូជកៅស៊ូក្លូនចំនួន៣ ដែលបាន និងកំពុងចូលរួមចំណែកក្នុងការលើកកម្ពស់ទិន្នផល និងគុណភាពផលជ័រកៅស៊ូរបស់កម្ពុជា។គួរបញ្ជាក់ថា វិទ្យាស្ថានស្រាវជ្រាវកៅស៊ូកម្ពុជាបានចាប់ផ្តើមដំណើរការស្រាវជ្រាវក្លូនកៅស៊ូតាំងពីឆ្នាំ ២០១១ ក្នុងគោលបំណងបង្កើតក្លូនកៅស៊ូកម្ពុជា ដែលមានសក្តានុពលខ្ពស់ អាចបន្សាំនឹងបម្រែបម្រួលអាកាសធាតុ ផ្តល់ទិន្នផលខ្ពស់ មានការលូតលាស់ល្អ និងសមស្របតាមលក្ខខណ្ឌក្សេត្របរិស្ថាននៅប្រទេសកម្ពុជា៕

ដោយ មករា