AKP កំពង់ធំ ថ្ងៃទី០១ ខែតុលា ឆ្នាំ២០២៦--ឃុំពពក ស្រុកស្ទោង ខេត្តកំពង់ធំ មានហេដ្ឋារចនាសម្ព័ន្ធផ្លូវថ្នល់ ព្រមទាំងការដាំដុះដំណាំកសិឧស្សាហកម្ម (ដំណាំកៅស៊ូ និងដំឡូងមី) និងរោងចក្រកែច្នៃដែលមានតម្លៃរាប់លានដុល្លារអាម៉េរិក ដែលជាការយកចិត្តទៅដាក់ខ្ពស់របស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។ លោក សាយ គឹមឡម អភិបាលស្រុកស្ទោង បានមានប្រសាសន៍លើកឡើងដូចនេះ ក្នុងឱកាសដែលលោក និងលោក ឡាយ ស៊ីលី ប្រធានក្រុមប្រឹក្សាស្រុក បានដឹកនាំសមាជិក សមាជិកាសហការីអញ្ជើញចូលរួមសូត្រមន្ត កាន់បិណ្ឌវេនទី៥ នៅក្នុងវត្តរុក្ខាបុប្ផាព្រៃស្អាត ស្ថិតនៅក្នុងភូមិអន្លង់ក្រាញ់ ឃុំពពក ស្រុកស្ទោង ខេត្តកំពង់ធំ កាលពីរសៀលថ្ងៃទី៣០ ខែកញ្ញា ឆ្នាំ២០២៦។

ក្នុងឱកាសនោះ លោកអភិបាលស្រុកបានលើកឡើងអំពីការចូលរួមកាន់បិណ្ឌរបស់រដ្ឋបាលស្រុកជារៀងរាល់ឆ្នាំជាមួយប្រជាពលរដ្ឋដូចនៅក្នុងឱកាសនេះជាតឹកតាងស្រាប់ ដែលជាការយកចិត្តទុកដាក់ និងផ្សារភ្ជាប់រវាងថ្នាក់ដឹកនាំអាជ្ញាធរស្រុក ជាមួយប្រជាពលរដ្ឋនៅក្នុងមូលដ្ឋានក៏ដូចជាផ្សារភ្ជាប់រវាងពុទ្ធចក្រ និងអាណាចក្រ ជាពិសេសបង្កឱ្យមានភាពស្និទ្ធស្នាលថែមទៀត រវាងថ្នាក់ដឹកនាំស្រុកជាមួយប្រជាពលរដ្ឋនៅក្នុងមូលដ្ឋាន។

លោក សាយ គឹមឡម អភិបាលស្រុកស្ទោង បានរំលេចអំពីសមិទ្ធផលនានា ដែលបាននិងកំពុងកើតឡើងនៅក្នុងឃុំពពក រួមមានទាំងសំណង់ហេដ្ឋារចនាសម្ព័ន្ធផ្លូវថ្នល់ ព្រមទាំងការដាំដុះដំណាំកៅស៊ូ ដំឡូងមី និងរោងចក្រកែច្នៃដែលមានតម្លៃរាប់លានដុល្លារអាម៉េរិក ក្រោមការយកចិត្តទុកដាក់ខ្ពស់របស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជណាចក្រកម្ពុជា ដែលបាននិងកំពុងជំរុញកំណើនផលិតភាព ជាពិសេសបានបង្កើតការងារជាច្រើនពាន់កន្លែង ថែមទាំងចូលរួមចំណែកយ៉ាងធំធេងក្នុងការលើកកម្ពស់ជីវភាពពលរដ្ឋនៅក្នុងឃុំពពកឱ្យកាន់តែប្រសើរឡើង។

នៅក្នុងឱកាសនោះ លោក សាយ គឹមឡម បានប្រគេននូវបច្ច័យកសាងវត្តចំនួន ៤០ម៉ឺនរៀល ប្រគេនបច្ច័យបួន និងទេយ្យទានដល់ព្រះសង្ឃ ព្រមទាំងចែកទានដល់លោកតា លោកយាយ ពុទ្ធបរិស័ទ ដែលអញ្ជើញចូលរួមនៅក្នុងឱកាសនោះចំនួន ១៥២នាក់ ដោយក្នុងម្នាក់ៗទទួលបាននូវថវិកាចំនួន ១ម៉ឺនរៀល៕

ដោយ៖ ស៊ុម វណ្ណា