AKP ភ្នំពេញ ថ្ងៃទី១ ខែតុលា ឆ្នាំ២០២៦--ទិវាមនុស្សចាស់ឆ្នាំនេះ ក្រោមប្រធានបទ «ក្មេងមានកម្លាំង និងស្គាល់ផ្លូវ ជរាមានបទពិសោធ»ដែលជាទិសដៅសម្រាប់លើកកម្ពស់គុណតម្លៃមនុស្សវ័យចាស់នៅព្រះរាជាណាចក្រកម្ពុជា ក៏ដូចជាមនុស្សវ័យចាស់នៅទូទាំងពិភពលោក និងលើកកម្ពស់មនសិការទទួលខុសត្រូវរបស់យើងទាំងអស់គ្នាក្នុងការចូលរួមកសាងសង្គមជាតិជាមួយគ្នាសម្បូរវិបុលភាព។ នេះជាការលើកឡើងរបស់សម្ដេចធិបតី។

តាមេរយៈសារលិខិតអបអរទិវាមនុស្សចាស់ដែលបានបង្ហោះតាមបណ្ដាញសង្គមរបស់សម្ដេចធិបតី នាព្រឹកថ្ងៃនេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានគូសបញ្ជាក់ថា«ដើម្បីឱ្យសង្គមជាតិមានការអភិវឌ្ឍ មានស្ថិរភាព មានសុខក្សេមក្សាន្ត និងមានសន្តិភាព ទាមទារឱ្យមានសាមគ្គីភាព សហការគ្នារវាងកម្លាំង និងគំនិតច្នៃប្រឌិតរបស់យុវជន គប្បីផ្សារភ្ជាប់ជាមួយការណែនាំដ៏ល្អផ្ជិតផ្ជង់ និងបូជាតស៊ូនិងបទពិសោធន៍របស់មនុស្សវ័យចាស់ ជាពិសេសការគោរពដឹងគុណជាកិច្ចចំពោះមនុស្សវ័យចាស់ ដែលជាការប្តេជ្ញាចិត្តនិងឆន្ទៈមោះមុតរបស់រាជរដ្ឋាភិបាលក្នុងការបន្តលើកកម្ពស់សុខុមាលភាពរបស់មនុស្សវ័យចាស់នៅព្រះរាជាណាចក្រកម្ពុជា និងនៅទូទាំងពិភពលោកក្នុងការពង្រឹងប្រព័ន្ធគាំពារសង្គម និងថែទាំសុខភាពមនុស្សគ្រប់វ័យ»។ 

ដើម្បីឱ្យក្មេងមានកម្លាំងនិងស្គាល់ផ្លូវ រាជរដ្ឋាភិបាលទាំងអាណត្តិមុនៗ ក៏ដូចជាអាណត្តិទី៧នេះ បានយកចិត្តទុកដាក់ខ្ពស់លើការពង្រឹងគុណភាពអប់រំនិងបណ្តុះបណ្តាលជំនាញវិជ្ជាជីវៈនិងបច្ចេកទេស ព្រមទាំងបានដាក់ចេញនូវកម្មវិធីបណ្តុះបណ្តាលជំនាញវិជ្ជាជីវៈនិងបច្ចេកទេសដល់យុវជនមកពីគ្រួសារក្រីក្រ និងគ្រួសារងាយរងគ្រោះនិងគោលនយោបាយជាតិនានាពាក់ព័ន្ធនឹងវិស័យអប់រំនិងវិស័យការងារផងដែរ។ 

ជាមួយគ្នានេះពាក់ព័ន្ធនឹងគោលនយោបាយជាតិស្តីពីមនុស្សវ័យចាស់២០១៧-២០៣០ ក៏បានរំលេចឡើងអំពីការត្រៀមខ្លួនរបស់ប្រជាជនវ័យក្មេងដើម្បីឈានចូលវ័យចាស់ដែលជាការបង្ហាញអំពីការយកចិត្តទុកដាក់ខ្ពស់របស់រាជរដ្ឋាភិបាលក្នុងការវិនិយោគលើយុវជនវ័យក្មេង ដែលមានន័យថា ការវិនិយោគលើយុវជនវ័យក្មេងនៅថ្ងៃនេះសម្រាប់មនុស្សវ័យចាស់ប្រកបដោយផលិតភាពនៅថ្ងៃអនាគត។ ជារៀងរាល់ឆ្នាំ ការប្រារព្ធទិវាមនុស្សចាស់កម្ពុជា និងទិវាមនុស្សចាស់អន្តរជាតិ ថ្ងៃទី១ ខែតុលា គឺស្របទៅនឹងគោលនយោបាយរបស់រាជរដ្ឋាភិបាលនៃព្រះរាជាណាចក្រកម្ពុជា និងស្របតាមសេចក្តីសម្រេចរបស់អង្គការសហប្រជាជាតិ។

ក្នុងឱកាសអបអរសាទរដ៏មានអត្ថន័យយ៉ាងជ្រាលជ្រៅនេះ សម្ដេចធិបតីមានកិត្តិយសសូមសម្តែងនូវការកោតសរសើរដោយស្មោះស្ម័គ្រជូនជនរួមជាតិជាទីស្នេហាអំពីឆន្ទៈនិងបុព្វហេតុក្នុងការគោរពដឹងគុណមនុស្សវ័យចាស់និងលើកកម្ពស់មនសិការរបស់បងប្អូនជនរួមជាតិយើងទាំងអស់ឱ្យចូលរួមកាន់តែសកម្ម ដើម្បីឱ្យកូនចៅជំនាន់ក្រោយៗទៀតយល់ដឹងអំពីតម្លៃពិតប្រាកដនៃមនុស្សវ័យចាស់។ ជារួម ប្រវត្តិសាស្ត្រនិងបទពិសោធនៃសង្គមនីមួយៗបានបង្ហាញឱ្យឃើញថា ការអភិវឌ្ឍសេដ្ឋកិច្ច សង្គមកិច្ច និងវប្បធម៌នៃប្រជាជាតិមួយអាចប្រព្រឹត្តទៅបានប្រកបដោយចីរភាពនិងសមធម៌ទាមទារឱ្យមានការអភិវឌ្ឍផ្នែកអប់រំសីលធម៌ គុណធម៌ និងវប្បធម៌អហិង្សា។ 

ផ្ទុយទៅវិញ ក្នុងសង្គមជាតិមួយដែលមានសុជីវធម៌ គុណធម៌ និងសីលធម៌ធ្លាក់ចុះ សង្គមជាតិនោះនឹងត្រូវទទួលរងនូវវិបត្តិនិងមហន្តរាយ។ ព្រះរាជាណាចក្រកម្ពុជាយើង មានប្រពៃណី ទំនៀមទម្លាប់ដ៏ល្អ កេរមរតកសម្បត្តិវប្បធម៌អរូបីសម្បូណ៌បែប និងសមិទ្ធផលទាំងឡាយដែលត្រូវបានរក្សាដង្ហែរហូតមកដល់សព្វថ្ងៃនេះ។ មរតកទាំងអស់នេះកើតចេញពីស្នាដៃ គុណូបការៈ និងការអប់រំទូន្មានប្រៀនប្រដៅប្រកបដោយគតិបណ្ឌិតនៃបុព្វបុរសនិងចាស់ព្រឹទ្ធាចារ្យរបស់យើងដែលអាចជា ក្សត្រ ប្រជាជន មន្ត្រីរាជការ យុទ្ធជន បព្វជិត គ្រហស្ថ អ្នកអក្សរសាស្ត្រ ភាសាវិទូ សេដ្ឋវិទូ អ្នកស្រាវជ្រាវ សិល្បករ អ្នកច្បាប់ និងអ្នកវិទ្យាសាស្ត្រជាដើម៕

ដោយ៖ គង់ សិរីរ័ត្ន