AKP កំពង់ធំ ថ្ងៃទី៣០ ខែកញ្ញាឆ្នាំ២០២៦--លោកជំទាវ លំ គន្ធារី អនុប្រធានអចិន្ន្រយ៍គណៈកម្មាធិការសាខាកាកបាទ ក្រហមកម្ពុជាខេត្តកំពង់ធំ បានអញ្ជើញជាអធិបតីភាពក្នុងពិធីចុះយុទ្ធនាការអប់រំផ្សព្វផ្សាយសុវត្ថិភាពចរាចរណ៍ផ្លូវគោក។

ពិធីមានការចូលរួមពីថ្នាក់ដឹកនាំ មន្ត្រីសាខា មន្រ្តីអនុសាខា មន្រ្តីសាធារណៈការ និងដឹកជញ្ជូនខេត្ត និងកងកម្លាំងប៉ូលីសចរាចរណ៍ស្រុក ដែលមានអ្នករួមសរុបចំនួន៤១នាក់នាព្រឹកថ្ងៃទី៣០ ខែកញ្ញាឆ្នាំ២០២ យុទ្ធនាការនេះរៀបចំឡើងនៅផ្លូវជាតិលេខ៦ច្រកចូលផ្សារស្ទោង ស្រុកស្ទោងខេត្តកំពង់ធំ និងមានសំណួរ-ចម្លើយ ដើម្បីដាស់ស្មារតីដល់បងប្អូនប្រជាពលរដ្ឋឱ្យចូលរួមគោរពច្បាប់ចរាចរណ៍ទាំងអស់គ្នាដើម្បីសុវត្ថិភាពរបស់ខ្លួន មានរង្វាន់លើកទឹកចិត្តមួកសុវត្តិភាពដែលមានអ្នកចូលរួមសរុបចំនួន២៨៣នាក់ ស្រី១៩៩នាក់។

ក្នុងឱកាសនេះដែរលោកជំទាវអនុប្រ ធានបានពាំនាំនូវប្រសាសន៍ផ្តាំផ្ញើសួរសុខទុក្ខ និងក្តីនឹករលឹកពី សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងថ្លែងអំ ណរគុណយ៉ាងជ្រាលជ្រៅជាទីបំផុតចំពោះវត្តមាន ក្មួយៗយុវជនកាកបាទក្រហមកម្ពុជា ដែលមានវត្តមាននៅទីនេះ ដែលបានចំណាយពេលវេលា កម្លាំងកាយ និងឆន្ទៈមុតមកចូលរួមយុទ្ធនាការនាព្រឹកនេះ។

លោកជំទាវបានបន្តថា កាកបាទក្រហមកម្ពុជា តែងតែធ្វើយុទ្ធនាការលើកកម្ពស់សុវត្ថិភាពចរាចរណ៍នេះ ជារៀងរាល់ឆ្នាំ ព្រោះកាកបាទក្រហមកម្ពុជា ជាសមាជិកថ្នាក់ជាតិរបស់គណៈកម្មាធិការជាតិសុវត្ថិភាពចរាចរណ៍ផ្លូវគោក និងដើម្បីឆ្លើយតបទៅនឹងផែនការជាតិទសវត្សរ៍សុវត្ថិភាពចរាចរណ៍ផ្លូវគោកឆ្នាំ២០២១-២០៣០ និងការអំពាវនាវរបស់រាជរដ្ឋាភិបាលកម្ពុជា សូមឱ្យស្ថាប័នពាក់ព័ន្ធរួមគ្នាចូលរួមកាត់បន្ថយអត្រាស្លាប់ របួសធ្ងន់ និងពិការដោយសារគ្រោះថ្នាក់ចរាចរណ៍ក្នុងព្រះរាជាណាចក្រកម្ពុជាតាមតែអាចធ្វើទៅបាន។ គ្រោះថ្នាក់ចរាចរណ៍ជាបញ្ហាប្រឈមចម្បងមួយ បានសំម្លាប់ប្រជាពលរដ្ឋខ្មែរជាច្រើនពាន់នាក់ក្នុង១ឆ្នាំៗ។

សូមបញ្ជាក់រថា យុទ្ធនាការចុះអប់រំផ្សព្វផ្សាយនេះផងដែរក្រុមការងារបានជូនឯកសារពាក់ព័ន្ធនិងសុវត្ថិភាពចរាចរណ៍ផ្លូវគោកមានដូចជា÷ ខិតប័ណ្ណជំនួយស្មារតីស្ដីពីច្បាប់ចរាចរណ៍ផ្លូវគោកចំនួន១០០សន្លឹក។ ខិតប័ណ្ណអ្វីដែលអ្នកបើកបរត្រូវយល់ដឹងចំនួន១០០សន្លឹក។ លិខិតអំពាវនាវស្ដីពីការចូលរួមទប់ស្កាត់គ្រោះថ្នាក់ចរាចរណ៍ផ្លូវគោកចំនួន១៣០ សន្លឹក ព្រមទាំងផ្ដល់មួកសុវត្ថិភាពជូនទៅដល់ប្រជាពលរដ្ឋដែលបានចូលរួមឆ្លើយសំណួរបានត្រឹមត្រូវចំនួន៤៦មួក៕

ដោយ៖ ស៊ុម វណ្ណា