AKP ភ្នំពេញ ថ្ងៃទី៣០ ខែកញ្ញា ឆ្នាំ២០២៦--យើងបដិសេធទាំងស្រុងចំពោះតំណាងថៃប្រចាំនៅអង្គការសហប្រជាជាតិ ដែលចោទពលរដ្ឋកម្ពុជានៅភូមិជោគជ័យ និងព្រៃចាន់ថាចូលរស់នៅលើដីថៃ។ 

ព្រំដែនប្រទេសយើង ត្រូវបានកំណត់ដោយអនុសញ្ញាបារាំង–សៀម ឆ្នាំ១៩០៤ សន្ធិសញ្ញាឆ្នាំ១៩០៧ និងផែនទីពាក់ព័ន្ធ ខណៈ MOU ឆ្នាំ២០០០ កំណត់ឱ្យវាស់វែង និងខណ្ឌសីមាតាមរយៈយន្តការJBC។ បើថៃជឿជាក់ថាជាទឹកដីខ្លួនច្បាស់យ៉ាងនេះ សូមពន្លឿនការចុះវាស់វែង មិនមែនប្រើកងកម្លាំងចូលឈ្លានពាន ដាក់លួស បន្លា ទូកុងតឺន័រ ជីកលេណដ្ឋាន ឬបង្កើតស្ថានភាពជាក់ស្តែងលើដី ដើម្បីកំណត់ខ្សែព្រំដែននោះឡើយ។ នេះជាប្រតិកកម្មរបស់លោក ទូច សុឃៈ អ្នកនាំពាក្យរងក្រសួងមហាផ្ទៃ នៃរាជរដ្ឋាភិបាលកម្ពុជា តបទៅកាន់តំណាងថៃប្រចាំនៅអង្គការស ហប្រជាជាតិ។

លោក ទូច សុឃៈ បានសង្កត់ធ្ងន់ថា បញ្ហាស្នូលដែលថៃត្រូវដោះស្រាយជាបន្ទាន់នៅចំពោះមុខច្បាប់អន្តរជាតិនាពេលនេះ គឺករណីពលរដ្ឋកម្ពុជាប្រមាណ ២០.០០០នាក់នៅតែមិនទាន់អាចវិលទៅលំនៅឋាន ព្រោះតែភូមិករពួកគាត់ត្រូវយោធាថៃចូលបំផ្លាញ និងកាន់កាប់ដោយខុសច្បាប់។ ដូច្នេះ ថៃត្រូវបង្ហាញភាពក្លាហាន អនុវត្តយន្តការ JBC ចុះវាស់វែងខណ្ឌសីមាជាក់ស្ដែង ជំនួសឱ្យការដើរនិយាយថាដីតំបន់នេះ ឬតំបន់នោះជារបស់ខ្លួន ហើយត្រូវធានាឱ្យជនស៊ីវិលខ្មែរបានវិលចូលភូមិឋានវិញ ស្របតាមខ្លឹមសារនៃសេចក្ដីថ្លែងការណ៍រួម៕

ដោយ៖ ចាន់ សុភឿន ,ប្រភព៖ ក្រសួងមហាផ្ទៃ