AKP ភ្នំពេញ ថ្ងៃទី៣០ ខែកញ្ញា ឆ្នាំ២០២៦--ឯកឧត្តម ចាន់ ស៊ីណាត រដ្ឋលេខាធិការ ក្រសួងធនធានទឹក និងឧតុនិយម នាថ្ងៃទី ២៩ ខែកញ្ញា ឆ្នាំ២០២៦បានអញ្ជើញចុះពិនិត្យដោយផ្ទាល់នូវស្ថានភាពគ្រប់គ្រងធនធានទឹក ស្ថិតក្នុងភូមិសាស្ត្រប្រឡាយចារ ប្រឡាយព្រៃខ្ពស់ តំបន់ពោធិ៍ពីរដើម តំបន់អូរស្ងួត តំបន់សឿរហាត និងអាងត្រពាំងថ្ម ក្នុងខេត្តបន្ទាយមានជ័យ។

ឯកឧត្តមរដ្ឋលេខាធិការ បញ្ជាក់ថា បេសកកម្មនេះធ្វើឡើងដើម្បីវាយតម្លៃ និងធ្វើទំនើបកម្មប្រព័ន្ធធារាសាស្ត្រដែលមានស្រាប់ សំដៅបង្កើនប្រសិទ្ធភាពស្រោចស្រព និងរក្សាទុកទឹកសម្រាប់ប្រើប្រាស់ពហុបំណង។ ផែនការនេះ នឹងឆ្លើយតបតម្រូវការប្រជាពលរដ្ឋ រួមចំណែកអភិវឌ្ឍសេដ្ឋកិច្ច និងទប់ទល់ការប្រែប្រួលអាកាសធាតុ តាមរយៈការដោះទឹកជំនន់ និងកាត់បន្ថយហានិភ័យគ្រោះរាំងស្ងួត។

ជាមួយគ្នានេះ ឯកឧត្តម ចាន់ ស៊ីណាត បានណែនាំឱ្យក្រុមការងារបច្ចេកទេសសហការជិតស្និទ្ធជាមួយមន្ទីរជំនាញ និងអាជ្ញាធរដែនដី ដើម្បីអនុវត្តការងារគ្រប់គ្រង និងអភិវឌ្ឍន៍ប្រព័ន្ធធារាសាស្ត្រនេះឱ្យបានត្រឹមត្រូវតាមបច្ចេកទេស និងទាន់ពេលវេលា៕

ដោយ៖ ពេជ្រ.សំអឿន(ប្រភព.ក្រសួងធនធានទឹកនិងឧតុនិយម)