AKP ព្រះសីហនុ ថ្ងៃទី២៩ ខែកញ្ញា ឆ្នាំ២០២៦--ឯកឧត្តម ម៉ាង ស៊ីណេត អភិបាល នៃគណៈអភិបាលខេត្តព្រះសីហនុបានអញ្ជើញដឹកនាំមន្ត្រីរាជការ កងកម្លាំងប្រដាប់អាវុធ ប្រជាពលរដ្ឋ និងពុទ្ធបរិស័ទជិតឆ្ងាយចូលរួមពិធីរាប់បាត បង្សុកូល ឧទ្ទិសកុសលជូនមាតាបិតា ក្នុងឱកាសពិធីបុណ្យកាន់បិណ្ឌ ភ្ជុំបិណ្ឌវេនទី៣ នៅវត្តឧត្តមវិញ្ញាណរាម (វត្តតាម) ស្ថិតនៅសង្កាត់រាម ក្រុងកំពង់សោម ខេត្តព្រះសីហនុ ។ 

ពិធីបុណ្យកាន់បិណ្ឌ និងភ្ជុំបិណ្ឌ គឺជាពិធីបុណ្យប្រពៃណីជាតិដ៏ធំមួយដែលប្រជាពលរដ្ឋខ្មែរតែងតែប្រារព្ធឡើងជារៀងរាល់ឆ្នាំ តាំងពីបុរាណកាលមក។  
ពិធីរាប់បាត បង្សុកូល និងឧទ្ទិសកុសលផលបុណ្យជូនមាតា បីតា ជីដូន ជីតាដែលបានចែកឋានទៅក្នុងឱកាសពិធីបុណ្យភ្ជុំបិណ្ឌ គឺជាកិច្ចពិធីផ្លូវសាសនាដ៏សំខាន់ដែលពុទ្ធសាសនិកខ្មែរប្រកាន់ខ្ជាប់ ដើម្បីសម្តែងនូវកតញ្ញូកតវេទិតាធម៌ ឧទ្ទិសកុសលជូនចំពោះមាតាបិតា ជីដូន ជីតា និងបុព្វការីជន ដែលបានចែកឋានទៅ។ 

ពិធីបុណ្យកាន់បិណ្ឌ និងភ្ជុំបិណ្ឌ នឹងប្រារព្ធទៅចាប់ពីថ្ងៃ ១រោច ដល់ថ្ងៃ១៥ រោច ខែភទ្របទ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី២៧ ខែកញ្ញា ដល់ថ្ងៃទី១១ ខែតុលា ឆ្នាំ២០២៦។  
ពិធីបុណ្យកាន់បិណ្ឌ និងភ្ជុំបិណ្ឌនេះ គឺជាពិធីបុណ្យ ប្រពៃណីជាតិដ៏ធំមួយ ដែលប្រជារាស្ត្រខ្មែរតែងតែប្រារព្ធឡើងជារៀងរាល់ឆ្នាំ តាំងពីបុរាណកាលមក។ ពិធីបុណ្យនេះ មានសារៈសំខាន់ និងមានអត្ថន័យយ៉ាងជ្រាលជ្រៅបំផុត ព្រោះជាឱកាសដ៏វិសេសវិសាលសម្រាប់ប្រជារាស្ត្រខ្មែរទាំងអស់ មិនថានៅទីជិត ឬទីឆ្ងាយបានធ្វើដំណើរត្រឡប់ទៅកាន់ស្រុកកំណើត ដើម្បីជួបជុំគ្រួសារ ញាតិមិត្ត និងចូល រួមធ្វើបុណ្យតាមប្រពៃណី នៅតាមលំនៅឋាន និងវត្តអារាម។ លើសពីនេះ ពិធីបុណ្យកាន់បិណ្ឌ និងភ្ជុំបិណ្ឌ ក៏ជាពេលវេលាដែល ប្រជារាស្ត្រខ្មែរបង្ហាញនូវកតញ្ញូតាធម៌គោរពប្រតិបត្តិចំពោះអ្នកមានគុណ ព្រមទាំងឧទ្ទិសកុសលផលបុណ្យជូនដល់បុព្វការីជន និងញាតិសណ្តាន ដែល បានលាចាក លោកនេះទៅហើយ។

ទន្ទឹមនេះដែរ ឯកឧត្តម អភិបាលខេត្តព្រះសីហនុ ក៏បានសម្តែងនូវការកោត សរសើរ និងវាយតម្លៃខ្ពស់ចំពោះស្មារតីសាមគ្គីភាព ការរួបរួម និងទំនាក់ទំនងដ៏ល្អប្រសើររបស់ប្រជាពលរដ្ឋខ្មែរ ដែលបានបង្ហាញតាមរយៈការចូលរួមប្រារព្ធពិធីបុណ្យប្រពៃណីជាតិដ៏រុងរឿងនៅតាមទីវត្តអារាមនានា ជាពិសេសស្មារតីស្រឡាញ់វប្បធម៌ ការចូលរួមការពារ ថែរក្សាទំនៀមទម្លាប់ ប្រពៃណីដ៏ល្អផូរផង់របស់ជាតិឱ្យបានគង់វង្ស ស្ថិតស្ថេរ និងបន្តរីកចម្រើនពីជំនាន់មួយទៅជំនាន់មួយ ដើម្បីទុកជាមរតកដ៏មានតម្លៃសម្រាប់ជាតិ និងកូនចៅខ្មែរគ្រប់រូប។
 
«ក្នុងឱកាសដ៏ប្រពៃថ្លៃថ្លានៃពិធីបុណ្យកាន់បិណ្ឌ និងភ្ជុំបិណ្ឌនេះ សូមប្រជាពល រដ្ឋខ្មែរ បន្តចូលរួមការពារ ថែរក្សា និងលើកតម្កើងទំនៀមទម្លាប់ ប្រពៃណី និងវប្បធម៌ដ៏ឧត្តុង្គឧត្តមរបស់ជាតិ ព្រមទាំងរួមគ្នាពង្រឹងសាមគ្គីភាព ឯកភាពជាតិជាធ្លុងមួយ ដើម្បីថែរក្សាសុខសន្តិភាព ស្ថិរភាព សង្គមឱ្យកាន់តែរឹងមាំ ព្រមទាំងចូលរួមកសាង និងអភិវឌ្ឍប្រទេសជាតិឱ្យមានការ រីកចម្រើនជានិច្ចនិរន្តរ៍»។

ក្នុងឱកាសនោះ ឯកឧត្តម អភិបាលខេត្ត ក៏បានប្រគេនសម្ភារៈ និងបច្ច័យរួមមានអង្ករ ៣០០គីឡូក្រាម មី ទឹកសុទ្ធ ទឹកក្រូច ទឹកត្រី ទឹកស៊ីអ៉ីវ ត្រីខ ប្រេងឆា បច្ច័យប្រគេនវត្ត ១២លាន រៀល ជុនយាយជី តាជី ក្រណាត់សរ ១ដុំ និងថវិកា ២ម៉ឺនរៀល  ៕

ដោយ ងូ សុមុនី