AKP ភ្នំពេញ ថ្ងៃទី២៩ ខែកញ្ញា ឆ្នាំ២០២៦--ក្នុងជំនួបជាមួយឯកឧត្តមឯកអគ្គរាជទូតកម្ពុជាប្រចាំនៅកូរ៉េជួបប្រធានក្រុម ប្រឹក្សាក្រុងផ្យង់ថេក​ ខេត្តខ្យង់គីដូ នៃសាធារណរដ្ឋកូរ៉េបានសន្យាជំរុញកិច្ចសហប្រតិ បត្តិការលើវិស័យសេដ្ឋកិច្ច វប្បធម៌ និងអប់រំ ដើម្បីបង្កើតបាននូវការអភិវឌ្ឍរួមរវាងប្រទេសទាំងពីរ។

នៅថ្ងៃទី២៨ ខែកញ្ញា ឆ្នាំ២០២៦ ឯកឧ ត្តម ឃួន ផុនរតនៈ ឯកអគ្គរាជទូតកម្ពុជាប្រចាំសាធារណរដ្ឋកូរ៉េ បានអញ្ជើញជួបសំណេះសំណាល និងពិភាក្សាការងារជាមួយលោក Choi Jae-young ប្រធានក្រុមប្រឹក្សាក្រុងផ្យង់ថេក នៅទីស្នាក់ការក្រុមប្រឹក្សាក្រុងផ្យង់ថេក ខេត្តខ្យង់គីដូ នៃសាធារណរដ្ឋកូរ៉េ។ 

ក្នុងឱកាសនៃជំនួប ឯកឧត្តមឯកអគ្គរាជទូត បានជម្រាបជូនលោក Choi អំពីស្ថានភាពរស់នៅរបស់បងប្អូនសហគមន៍ខ្មែរ ក្នុងតំបន់ផ្យង់ថេក។ ឯកឧត្តមបានជម្រាបលោក​ Choi ថា ឯកឧត្តមបានសម្លឹងឃើញពីល្បឿននៃការអភិវឌ្ឍរបស់ក្រុងផ្យង់ថេក និងបំណងពង្រីកកិច្ចសហប្រតិបត្តិការលើវិស័យការងារ ពាណិជ្ជកម្ម និងអប់រំ រវាងស្ថាប័នរដ្ឋ និងឯកជននៃក្រុង-ខេត្ត របស់កម្ពុជា និងទីក្រុងផ្យង់ថេក។ 

ឯកឧត្តម ក៏បានស្នើលោក Choi ពិនិត្យលទ្ធភាពដឹកនាំក្រុមហ៊ុនកូរ៉េរបស់ក្រុងផ្យង់ថេកទៅបំពេញទស្សនកិច្ចនៅកម្ពុ ជា ដើម្បីបង្កើតឱកាសឱ្យក្រុមហ៊ុននៃប្រទេសទាំងពីរចាប់ដៃគូអាជីវកម្ម និងបង្កើតកិច្ចសហប្រតិបត្តិការអាជីវកម្មជាមួយគ្នា។ 

លោក Choi បានជម្រាប​ឯកឧត្តមអគ្គ រាជទូត​ ថា ប្រទេសកម្ពុជា និងកូរ៉េ មានលក្ខណៈ ស្រដៀងគ្នាដែលអាចបំពេញតម្រូវការឲ្យគ្នាទៅវិញទៅមកបាន លោកបានបញ្ជាក់ថា​ ទីក្រុងផ្យង់ថេក​ ជាទីក្រុងដែលមានសេដ្ឋកិច្ចធ្លាប់ពឹងផ្អែកលើវិស័យកសិកម្ម​ ប៉ុន្តែឥឡូវទីក្រុងនេះ​ បានផ្លាស់ប្តូរមកជាទីក្រុងឧស្សាហកម្មវិញ ដែលការណ៍នេះបានធ្វើឱ្យសេដ្ឋកិច្ចនៃក្រុងផ្យង់ថេក​ មានការរីកចំរើនគួរឱ្យកត់សម្គាល់។

លោកបន្តថា ក្នុងអាណត្តិរបស់លោក លោកនឹងព្យាយាមជំរុញកិច្ចសហប្រតិ បត្តិការលើវិស័យសេដ្ឋកិច្ច វប្បធម៌ និងអប់រំ ដើម្បីបង្កើតបាននូវការអភិវឌ្ឍរួមរវាងប្រទេសទាំងពីរ៕

ដោយ៖ ប៊ុនរិទ្ធ