AKP បន្ទាយមានជ័យ ថ្ងៃទី២៩ ខែកញ្ញា ឆ្នាំ២០២៦--លោក ហឿន វីរៈ អភិបាល នៃគណៈអភិបាលស្រុកព្រះនេត្រព្រះ បានដឹកនាំក្រុមការងារមន្ត្រីជំនាញ សហការជាមួយក្រុមការងារឃុំ និងលោកមេភូមិស្រមោច ចុះពិនិត្យផ្ទាល់អំពីស្ថានភាពទឹកនៅសំណង់ស្ទាក់ទឹកស្រមោច និងស្ពាន៧៥ ស្ថិតក្នុងឃុំព្រះនេត្រព្រះ ស្រុកព្រះនេត្រព្រះ ខេត្តបន្ទាយមានជ័យ កាលពីថ្ងៃចន្ទ ទី២៨ ខែកញ្ញា ឆ្នាំ២០២៦ ដើម្បីតាមដានការវិវត្តនៃស្ថានភាពទឹក និងត្រៀមវិធានការឆ្លើយតបឱ្យបានទាន់ពេលវេលា។

លោក ហឿន វីរៈ បានមានប្រសាសន៍ថា ការចុះពិនិត្យជាក់ស្តែងនៅតាមចំណុចសំខាន់ៗនេះ គឺដើម្បីឱ្យអាជ្ញាធរមានព័ត៌មានជាក់ស្តែងអំពីស្ថានភាពទឹក លំហូរទឹក និងស្ថានភាពហេដ្ឋារចនាសម្ព័ន្ធ ព្រមទាំងអាចវាយតម្លៃហានិភ័យដែលអាចកើតមាន ដើម្បីចាត់វិធានការបានទាន់ពេលវេលា ប្រសិនបើកម្ពស់ទឹកមានការកើនឡើង ឬស្ថានភាពអាចបង្កផលប៉ះពាល់ដល់ប្រជាពលរដ្ឋ។

លោកអភិបាលស្រុកបានបញ្ជាក់ថា អាជ្ញាធរស្រុកត្រូវបន្តយកចិត្តទុកដាក់តាមដានស្ថានភាពទឹកនៅតាមតំបន់ប្រឈម ជាពិសេសចំណុចដែលមានសំណង់ស្ទាក់ទឹក ស្ពាន និងហេដ្ឋារចនាសម្ព័ន្ធសំខាន់ៗ ដោយត្រូវមានការសហការជិតស្និទ្ធរវាងមន្ត្រីជំនាញ អាជ្ញាធរឃុំ និងមូលដ្ឋាន ដើម្បីធានាថា រាល់ការវិវត្តនៃស្ថានភាពទឹកអាចត្រូវបានដឹង និងដោះស្រាយបានទាន់ពេលវេលា។

ក្នុងការចុះពិនិត្យនេះ ក្រុមការងារបានពិនិត្យស្ថានភាពទឹកនៅតាមសំណង់ស្ទាក់ទឹកស្រមោច និងតំបន់ជុំវិញស្ពាន៧៥ ដើម្បីតាមដានលំហូរទឹក និងពិនិត្យមើលស្ថានភាពហេដ្ឋារចនាសម្ព័ន្ធ ដែលអាចរងផលប៉ះពាល់ក្នុងករណីស្ថានភាពទឹកមានការប្រែប្រួល ឬកើនឡើងខ្ពស់។

លោក ហឿន វីរៈ បានអំពាវនាវឱ្យអាជ្ញាធរឃុំ ភូមិ និងមន្ត្រីពាក់ព័ន្ធ បន្តយកចិត្តទុកដាក់ចំពោះស្ថានភាពទឹកនៅក្នុងមូលដ្ឋាន និងរាយការណ៍ជាបន្ទាន់ ប្រសិនបើមានការកើនឡើងខុសប្រក្រតី ឬមានបញ្ហាប្រឈមណាមួយកើតឡើង ដើម្បីឱ្យអាជ្ញាធរស្រុកអាចចាត់វិធានការបានទាន់ពេលវេលា។

អាជ្ញាធរស្រុកព្រះនេត្រព្រះ នឹងបន្តតាមដានស្ថានភាពទឹកនៅតាមតំបន់ប្រឈម និងបន្តសហការជាមួយមន្ត្រីជំនាញ អាជ្ញាធរឃុំ និងភូមិ ដើម្បីត្រៀមលក្ខណៈឆ្លើយតបចំពោះស្ថានភាពដែលអាចកើតមាន ព្រមទាំងផ្តោតជាសំខាន់លើការការពារសុវត្ថិភាព អាយុជីវិត និងសុខុមាលភាពរបស់ប្រជាពលរដ្ឋក្នុងមូលដ្ឋាន៕

ដោយ៖ ឈុន សារ៉ាត