AKP ភ្នំពេញ ថ្ងៃទី២៨ ខែកញ្ញា ឆ្នាំ២០២៦ -- អនុប្រធានាធិបតីចិន លោកហាន ចឹង (Han Zheng) បានថ្លែងកាលពីថ្ងៃសៅរ៍ថា ប្រទេសចិននឹងចាប់ដៃជាមួយបណ្តាប្រទេសនានា ដើម្បីកសាងសហគមន៍ដែលមានអនាគតរួមគ្នាសម្រាប់មនុស្សជាតិ និងធ្វើឱ្យពិភពលោកក្លាយជាកន្លែងដ៏ល្អប្រសើរសម្រាប់ទាំងអស់គ្នា។

លោក ហាន បានថ្លែងបែបនេះនៅក្នុងសុន្ទរកថារបស់លោកក្នុងអំឡុងពេលកិច្ចពិភាក្សាទូទៅនៃសម័យប្រជុំលើកទី៨១ នៃមហាសន្និបាតអង្គការសហប្រជាជាតិ។

លោកបានលើកឡើងថា ពិភពលោកកំពុងជួបប្រទះនូវការផ្លាស់ប្តូរ និងភាពចលាចលដែលជាប់ពាក់ព័ន្ធគ្នាទៅវិញទៅមក ជម្លោះភូមិសាស្ត្រនយោបាយដ៏រ៉ាំរ៉ៃ គម្លាតនៃការអភិវឌ្ឍដែលកាន់តែធំទូលាយ និងបញ្ហាប្រឈមជាសកលដែលកំពុងកើនឡើង។

ដោយកត់សម្គាល់ថា ប្រធានាធិបតីចិន លោក ស៊ី ជីនពីង (Xi Jinping) បានដាក់ចេញនូវ «គំនិតផ្តួចផ្តើមអភិវឌ្ឍន៍សកល» នៅឯសម័យប្រជុំលើកទី៧៦ នៃមហាសន្និបាតអង្គការសហប្រជាជាតិ ហើយចាប់តាំងពីពេលនោះមក បានស្នើឡើងនូវ «គំនិតផ្តួចផ្តើមសន្តិសុខសកល»       «គំនិតផ្តួចផ្តើមអរិយធម៌សកល» និង «គំនិតផ្តួចផ្តើមអភិបាលកិច្ចសកល» នោះលោក ហាន បានមានប្រសាសន៍ថា គំនិតផ្តួចផ្តើមទាំងនេះផ្តល់នូវការណែនាំជាយុទ្ធសាស្ត្រសម្រាប់ការកសាងសហគមន៍ដែលមានអនាគតរួមគ្នាសម្រាប់មនុស្សជាតិ។

លោកបានលើកឡើងថា ប្រទេសកាន់តែច្រើនឡើងៗចង់ចាប់ដៃគ្នាដើម្បីទទួលយកបេសកកម្មជាប្រវត្តិសាស្ត្រក្នុងការដោះស្រាយការលំបាកនិងបញ្ហាប្រឈមនានា ព្រមទាំងជំរុញសុខុមាលភាពរបស់មនុស្សជាតិទាំងមូល។

បណ្តាប្រទេសនានាគួរតែរួបរួមគ្នា និងចាត់វិធានការរួមគ្នាដើម្បីការពារអង្គការសហប្រជាជាតិ និងធ្វើឱ្យអង្គការនេះកាន់តែរឹងមាំ។ ប្រទេសចិនគាំទ្រអង្គការសហប្រជាជាតិក្នុងការធ្វើកំណែទម្រង់ និងកែលម្អខ្លួនឯង ព្រមទាំងការដោះស្រាយបញ្ហាប្រឈមជាសកលប្រកបដោយប្រសិទ្ធភាព រួមទាំងការប្រែប្រួលអាកាសធាតុ និងសន្តិសុខសុខភាពសាធារណៈ៕

ដោយ៖ មូល មិនា (ប្រភព៖ ភីបផលដេលី)