AKP បន្ទាយមានជ័យ ថ្ងៃទី២៨ ខែកញ្ញា ឆ្នាំ២០២៦--អាជ្ញាធរ និងកម្លាំងចម្រុះនៅក្នុងខេត្តបន្ទាយមានជ័យ បន្តប្រតិបត្តិការតាមដានស្ថានភាពទឹក និងជម្លៀសប្រជាពលរដ្ឋទៅកាន់ទីទួលសុវត្ថិភាព ខណៈទឹកជំនន់ដែលបណ្តាលមកពីភ្លៀងធ្លាក់ និងទឹកហូរមកពីប្រទេសថៃ បានបន្តបង្កផលប៉ះពាល់នៅតំបន់មួយចំនួន ជាពិសេសតាមបណ្តោយមាត់អូរព្រំដែនក្នុងក្រុងប៉ោយប៉ែត។

យោងតាមរបាយការណ៍បឋមរបស់រដ្ឋបាលខេត្តបន្ទាយមានជ័យ គិតត្រឹមថ្ងៃទី២៧ ខែកញ្ញា ឆ្នាំ២០២៦ ក្នុងចំណោមក្រុង-ស្រុកទាំង៩ មានក្រុង-ស្រុកចំនួន៥ បានរងផលប៉ះពាល់ដោយជំនន់ទឹកភ្លៀង និងទឹកហូរមកពីប្រទេសថៃ។ សរុបមានប្រជាពលរដ្ឋជាង ១.៤៨០គ្រួសារ រងផលប៉ះពាល់ ខណៈជាង ១.៣០០គ្រួសារ ត្រូវបានជម្លៀសទៅកាន់ទីទួលសុវត្ថិភាព ដើម្បីធានាសុវត្ថិភាពអាយុជីវិត។

ក្នុងចំណោមតំបន់រងផលប៉ះពាល់ទាំងនេះ ក្រុងប៉ោយប៉ែតបានរងគ្រោះធ្ងន់ជាងគេ ដោយប្រជាពលរដ្ឋដែលរស់នៅតាមតំបន់ទំនាប និងតាមបណ្តោយមាត់អូរព្រំដែន ប្រឈមនឹងការកើនឡើងនៃកម្ពស់ទឹក ដែលជំរុញឱ្យអាជ្ញាធរត្រូវបង្កើនការត្រៀមលក្ខណៈ និងបន្តជម្លៀសប្រជាពលរដ្ឋជាបន្តបន្ទាប់។

គិតត្រឹមម៉ោង ៦:០០នាទីល្ងាច ថ្ងៃទី២៧ ខែកញ្ញា នៅក្នុងក្រុងប៉ោយប៉ែតមានប្រជាពលរដ្ឋប្រមាណជាង ១.២០០គ្រួសារ ត្រូវបានជម្លៀសទៅស្នាក់នៅទីទួលសុវត្ថិភាពចំនួន ៩ទីតាំង ដែលរៀបចំដោយអាជ្ញាធរ ខណៈប្រជាពលរដ្ឋមួយចំនួនទៀតបានទៅស្នាក់នៅជាមួយសាច់ញាតិ និងបងប្អូន។

ឯកឧត្តម ប៉ាន់ខែម ប៊ុនថន ប្រធានក្រុមការងាររាជរដ្ឋាភិបាលចុះជួយក្រុងប៉ោយប៉ែត បានឱ្យដឹងថា ជំនន់ទឹកភ្លៀងដែលធ្លាប់លិចលង់ក្រុងប៉ោយប៉ែតបានចាប់ផ្តើមស្រកចុះ ប៉ុន្តែទឹកដែលហូរមកពីប្រទេសថៃបានបន្តបង្កសម្ពាធ និងជន់លិចតំបន់មួយចំនួនក្នុងក្រុង។ ក្នុងស្ថានភាពនេះ អាជ្ញាធរមូលដ្ឋាន កម្លាំងនគរបាល កងរាជអាវុធហត្ថ និងកងយោធា បានសហការគ្នាយ៉ាងសកម្ម ដើម្បីសង្គ្រោះ និងជម្លៀសប្រជាពលរដ្ឋ។

ឯកឧត្តមបានបញ្ជាក់ថា កម្លាំងចម្រុះនៅតែបន្តចុះដល់តំបន់ប្រឈមដើម្បីជួយសម្របសម្រួលការជម្លៀសប្រជាពលរដ្ឋ និងធានាសន្តិសុខ សណ្តាប់ធ្នាប់ ព្រមទាំងការពារអាយុជីវិត និងទ្រព្យសម្បត្តិរបស់ប្រជាពលរដ្ឋ។

ជាមួយគ្នានេះ កាលពីថ្ងៃទី២៧ ខែកញ្ញា ឆ្នាំ២០២៦ ឯកឧត្តម កែ គឹមយ៉ាន តំណាងរាស្ត្រមណ្ឌលខេត្តបន្ទាយមានជ័យ និងជាឧត្តមប្រឹក្សាផ្ទាល់ព្រះមហាក្សត្រ បានចាត់បញ្ជូនក្រុមការងារ និងមធ្យោបាយសង្គ្រោះបន្ទាន់ រួមមាន ទូកសង្គ្រោះចំនួន ៣០គ្រឿង និងទូកពោងខ្យល់ចំនួន ១៥គ្រឿង ដើម្បីចុះជួយសង្គ្រោះ និងអន្តរាគមន៍ដល់ប្រជាពលរដ្ឋ ដែលកំពុងរងផលប៉ះពាល់ដោយជំនន់ទឹកភ្លៀងនៅក្នុងខេត្តបន្ទាយមានជ័យ។

នៅល្ងាចថ្ងៃដដែល ឯកឧត្តម អ៊ុំ រាត្រី អភិបាលនៃគណៈអភិបាលខេត្ត និងជាប្រធានគណៈបញ្ជាការឯកភាពរដ្ឋបាលខេត្តបន្ទាយមានជ័យ បានដឹកនាំក្រុមការងារ រួមមានលោក ហ៊ឹល រ៉ាយ៉ា អភិបាលរងខេត្ត លោក កែវ តារារស្មី អភិបាលស្រុកមង្គលបូរី និងកងកម្លាំង ចុះរៀបចំទីទួលសុវត្ថិភាពសម្រាប់ប្រជាពលរដ្ឋដែលរស់នៅតំបន់ទំនាបប្រឈមនឹងជំនន់ទឹកភ្លៀង ត្រង់ចំណុចផ្លូវៀងក្រុងជាប់ព្រំប្រទល់ក្រុងសិរីសោភ័ណ។

ឯកឧត្តម អ៊ុំ រាត្រី បានណែនាំដល់រដ្ឋបាលក្រុង-ស្រុកទាំង៩ ត្រូវបន្តតាមដានស្ថានភាពទឹកនៅតំបន់ប្រឈម ពិសេសប្រសិនបើស្ថានភាពទឹកបន្តកើនឡើង ត្រូវជូនដំណឹងដល់ប្រជាពលរដ្ឋឱ្យបានទាន់ពេលវេលា និងត្រៀមកម្លាំងចុះអន្តរាគមន៍ ជម្លៀសប្រជាពលរដ្ឋទៅកាន់ទីតាំងសុវត្ថិភាព ដើម្បីកាត់បន្ថយហានិភ័យ និងការខូចខាតដែលអាចកើតមាន។

មិនត្រឹមតែប៉ះពាល់ដល់លំនៅឋានប្រជាពលរដ្ឋប៉ុណ្ណោះទេ របាយការណ៍បឋមរបស់រដ្ឋបាលខេត្តក៏បានបង្ហាញថា ទឹកជំនន់បានប៉ះពាល់ដល់ផ្ទៃដីស្រែប្រមាណជាង ១២.០០០ហិកតា ក្នុងនោះមានប្រមាណ ៩៦ហិកតា ត្រូវបានរាយការណ៍ថាខូចខាត។ ក្រៅពីនេះ សាលារៀន វត្តអារាម មណ្ឌលសុខភាព និងផ្លូវមួយចំនួន ក៏បានរងផលប៉ះពាល់ផងដែរ។

ក្នុងពេលជម្លៀស អាជ្ញាធរមូលដ្ឋានបានរៀបចំទីតាំងស្នាក់នៅបណ្តោះអាសន្ន ស្បៀងអាហារ សម្ភារៈប្រើប្រាស់ចាំបាច់ សេវាសុខាភិបាល និងក្រុមសង្គ្រោះវេជ្ជសាស្ត្រ ដើម្បីបំពេញតម្រូវការរបស់ប្រជាពលរដ្ឋនៅតាមទីទួលសុវត្ថិភាព។ កម្លាំងចម្រុះក៏ត្រូវបានដាក់ពង្រាយ ដើម្បីរក្សាសន្តិសុខ សណ្តាប់ធ្នាប់ និងជួយសម្រួលដល់ប្រតិបត្តិការសង្គ្រោះ។

ស្ថិតក្នុងស្ថានភាពនេះ ឯកឧត្តម ប៉ាន់ខែម ប៊ុនថន និងលោក គាត ហ៊ុល អភិបាលក្រុងប៉ោយប៉ែត បានបញ្ជាក់ថា ថ្នាក់ដឹកនាំ និងក្រុមការងារអាជ្ញាធរគ្រប់លំដាប់ថ្នាក់ តែងតែស្ថិតនៅក្បែរប្រជាពលរដ្ឋ និងត្រៀមខ្លួនជានិច្ច ដើម្បីចុះជួយសង្គ្រោះ និងដោះស្រាយបញ្ហាជូនប្រជាពលរដ្ឋគ្រប់ពេលវេលា។

ការបន្តចុះពិនិត្យទីតាំងប្រឈម និងដឹកនាំប្រតិបត្តិការជម្លៀសដោយផ្ទាល់របស់ថ្នាក់ដឹកនាំខេត្ត ក្រុង និងក្រុមការងារ ស្របពេលដែលទឹកជំនន់នៅតំបន់មួយចំនួនកំពុងបន្តកើនឡើង បានធ្វើឱ្យការឆ្លើយតបត្រូវផ្តោតជាចម្បងលើការការពារអាយុជីវិត ការជម្លៀសទាន់ពេលវេលា និងការធានាតម្រូវការចាំបាច់របស់ប្រជាពលរដ្ឋនៅទីទួលសុវត្ថិភាព។ អាជ្ញាធរខេត្ត និងក្រុងប៉ោយប៉ែត បានអំពាវនាវដល់ប្រជាពលរដ្ឋដែលរស់នៅតំបន់ប្រឈម ត្រូវបន្តតាមដានស្ថានភាពទឹក ស្តាប់ការណែនាំរបស់អាជ្ញាធរ និងត្រៀមបំលាស់ទីទៅកាន់ទីទួលសុវត្ថិភាពឱ្យបានទាន់ពេលវេលា ដោយចាត់ទុកសុវត្ថិភាពអាយុជីវិតជាអាទិភាពខ្ពស់បំផុត៕

ដោយ៖ ឈុន សារ៉ាត