AKP រដ្ឋធានីប៉េកាំង, ប្រទេសចិន ថ្ងៃទី២៧ ខែកញ្ញា ឆ្នាំ២០២៦ --  ក្នុងកិច្ចបង្ហាញដ៏មានសារៈសំខាន់មួយ ដែលប្រារព្ធធ្វើឡើងនៅថ្ងៃទី២៧ ខែកញ្ញា ឆ្នាំ២០២៦ នៅរដ្ឋធានីប៉េកាំង ក្រោមប្រធានបទ «ប្រតិបត្តិការ និងការទំនាក់ទំនងប្រព័ន្ធផ្សព្វផ្សាយថ្មី» (New Media Operations and Communication) លោក Liu Qingzhen ដែលជាវគ្មិនជំនាញបានធ្វើបទបង្ហាញយ៉ាងស៊ីជម្រៅដល់គណៈប្រតិភូព័ត៌មានអាស៊ាន អំពីការវិវត្ត និង យុទ្ធសាស្ត្រគ្រប់គ្រងប្រព័ន្ធផ្សព្វផ្សាយសម័យថ្មី ដោយផ្តោតជាចម្បងលើការច្នៃប្រឌិតមាតិកាវីដេអូខ្លី ការយល់ដឹងពីទម្លាប់អ្នកទស្សនា និងការយកបច្ចេកវិទ្យាទំនើបមកជួយជ្រោមជ្រែង។ ចំពោះបទបង្ហាញទាំងនោះ រួមមាន៖

១. ការវិវត្តនៃការទីផ្សារមាតិកា និងការបង្កើតម៉ាកសញ្ញាផ្ទាល់ខ្លួន (IP) ដែល លោក Liu Qingzhen បានគូសបញ្ជាក់ថា ទីផ្សារមាតិកាបានវិវត្តពីសម័យកាល ១.០ ដល់ ៤.០ ដែលក្នុងសម័យកាលទំនើបនេះ ការផ្សព្វផ្សាយ និងអាជីវកម្មត្រូវតែដើរទន្ទឹមគ្នា និងបំពេញបន្ថែមឱ្យគ្នាទៅវិញទៅមកលើបណ្តាញសង្គម។ លោកបានលើកយកគំរូជោគជ័យថ្នាក់ជាតិ ដូចជា កម្មវិធី Central Kitchen Model របស់សារព័ត៌មាន People's Daily និងស្ថាប័ន CCTV មកបង្ហាញពីរបៀបបំបែកភាពរឹងត្អឹងនៃការធ្វើព័ត៌មាននយោបាយ ឬឯកសារប្រពៃណី ឱ្យទៅជាវីដេអូខ្លីៗដ៏ទាក់ទាញ ដែលអាចទាក់ទាញអ្នកអាន និងទស្សនារាប់ពាន់លានដង។ 

២. យុទ្ធសាស្ត្រក្នុងការផលិតស្គ្រីបវីដេអូខ្លី (៤ ជំហានសំខាន់ៗ) សម្រាប់អ្នកបង្កើតមាតិកា ៖ លោកបានបង្ហាញពីរចនាសម្ព័ន្ធដ៏សំខាន់ៗចំនួន ៤ ដើម្បីឱ្យវីដេអូខ្លីទទួលបានការចាប់អារម្មណ៍ខ្ពស់៖ ការទាក់ទាញភ្លាមៗ (Hook៖) ៣ វិនាទីដំបូងគឺជាកត្តាកំណត់ជោគជ័យ ដោយត្រូវប្រើប្រាស់រូបភាព ឬសាច់រឿងដែលផ្ទុះ(Viral) ឬរំជួលចិត្តខ្លាំង ដើម្បីឃាត់ទស្សនិកជនឱ្យនៅមើលបន្ត ។ សម្រាប់ការបង្កើតបញ្ហាប្រឈម (Conflict)៖ ត្រូវមាន បញ្ហាប្រឈម ឬឧបសគ្គក្នុងសាច់រឿង  យ៉ាងហោចណាស់ពីរក្នុងមួយភាគ ដើម្បីរក្សាចំណង់នៃការទស្សនារបស់ទស្សនិកជន។ ការបង្វិលសាច់រឿង (Twist) ៖ រៀងរាល់ ៣០ ទៅ ៦០ វិនាទី មាតិកាគួរតែមានការប្តូរទស្សនៈ ឬស្ថានភាព ដើម្បីកុំឱ្យអ្នកមើលមានអារម្មណ៍ធុញទ្រាន់។ ទាក់ទងនឹងការបន្សល់ទុកនូវភាពមន្ទិល ឫចម្ងល់(Suspense៖) មុននឹងចប់ភាគនីមួយៗ ត្រូវបង្កើតចំណង ឬសាច់រឿងអន្លង់អន្លោច ដើម្បីបង្ខំចិត្តឱ្យទស្សនិកជនចង់តាមដានទស្សនាភាគបន្តទៀត។ 

៣. ទម្លាប់ និងអាកប្បកិរិយារបស់អ្នកប្រើប្រាស់៖ បទបង្ហាញក៏បានវិភាគយ៉ាងលម្អិតផងដែរថា ទស្សនិកជនភាគច្រើនជាស្ត្រីដែលមានអាយុចន្លោះពី ២៥ ទៅ ៤៥ឆ្នាំ ដែលចូលចិត្តទស្សនាមាតិកាបង្កប់អារម្មណ៍រំជួលចិត្តខ្លាំង មានការបង្វិលសាច់រឿងញឹកញាប់ និងមានតួអង្គដែលពួកគេអាចពាក់ព័ន្ធ ឬយល់ចិត្តបាន ហើយពេលវេលាដែលពួកគេចំណាយប្រាក់ទិញ ឬទស្សនាច្រើនជាងគេគឺនៅចន្លោះម៉ោង ១០ យប់ ដល់ម៉ោង ១ រំលងអធ្រាត្រ (យោងតាមបរិបទសង្គមជាក់ស្តែង)

៤. បច្ចេកវិទ្យា៖  លោក Liu Qingzhen បានបញ្ជាក់ថា ការវិនិយោគលើបច្ចេកវិទ្យាទំនើបដូចជា 4K, 5G និង AI គឺជាឆ្អឹងខ្នងដ៏សំខាន់ ព្រោះការប្រើប្រាស់បច្ចេកវិទ្យាទាំងនេះមិនត្រឹមតែជួយឱ្យការបញ្ជូនសញ្ញាវីដេអូ ឬការផ្សាយបន្តផ្ទាល់បែប VR មានភាពរលូនប៉ុណ្ណោះទេ ប៉ុន្តែថែមទាំងជួយផ្លាស់ប្តូរទ្រង់ទ្រាយនៃមាតិកាឱ្យកាន់តែទំនើប ឆ្លើយតបទៅនឹងតម្រូវការដ៏ឆាប់រហ័សរបស់ប្រជាពលរដ្ឋក្នុងយុគសម័យឌីជីថលបច្ចុប្បន្នផងដែរ។ 

ទាក់ទងនឹងបទបង្ហាញរបស់ លោក Liu Qingzhen ខាងលើនេះ មិនត្រឹមតែបានផ្តល់នូវចំណេះដឹង និងបទពិសោធន៍ថ្មីៗផ្នែកបច្ចេកទេស និងការគ្រប់គ្រងប្រព័ន្ធផ្សព្វផ្សាយប៉ុណ្ណោះទេ ថែមទាំងជួយពង្រឹងកិច្ចសហប្រតិបត្តិការ និងការផ្លាស់ប្តរបទពិសោធន៍ជាក់ស្តែងរវាងស្ថាប័នព័ត៌មាននៃបណ្តាប្រទេសអាស៊ាន និងប្រទេសចិន ក្នុងការបោះជំហានទៅមុខយ៉ាងរឹងមាំក្នុងយុគសម័យនៃការផ្លាស់ប្តូរឌីជីថលជាសកលផងដែរ៕

ដោយ៖ ទូច វលក័្ខណ