AKP រដ្ឋធានីប៉េកាំង, ប្រទេសចិន ថ្ងៃទី២៧ ខែកញ្ញា ឆ្នាំ២០២៦ --  ក្នុងកិច្ចខិតខំប្រឹងប្រែងជំរុញការអភិវឌ្ឍវិស័យសារព័ត៌មានក្នុងសម័យកាលឌីជីថល ថ្ងៃទី២៦ ខែកញ្ញា ឆ្នាំ២០២៦ ទីភ្នាក់ងារសារព័ត៌មាន Xinhua បានធ្វើបទបង្ហាញជូនដល់សិក្ខាកាមជាប្រតិភូព័ត៌មានអាស៊ាន ក្រោមប្រធានបទ «ការរួមបញ្ចូលគ្នារវាងបញ្ញាសិប្បនិម្មិត និងប្រព័ន្ធផ្សព្វផ្សាយថ្មី» (Integrated Applications of Artificial Intelligence and New Media) ផ្តោតសំខាន់ពីការវិវត្តយ៉ាងលឿននៃបច្ចេកវិទ្យា និងការប្រើប្រាស់ឧបករណ៍បញ្ញាសិប្បនិម្មិត (AI) ដើម្បីបង្កើនប្រសិទ្ធភាពការងារសារព័ត៌មាន។

យោងតាមបទបង្ហាញរបស់តំណាងទីភ្នាក់ងារ សារព័ត៌មាន Xinhua គឺ លោកស្រី Wang Yihan បានឱ្យឃើញថា ឧបករណ៍បង្កើតមាតិកាដោយ AI (AIGC Tools) បានវិវត្តយ៉ាងលឿនចាប់ពីឆ្នាំ២០២៣ រហូតដល់ឆ្នាំ២០២៦ នេះ ដូចជាកម្មវិធី Sora, Kling AI, Midjourney, Google Veo, ChatGPT និង Gemini ជាដើម ដែលកំពុងក្លាយជាដៃគូមិនអាចខ្វះបានសម្រាប់អ្នកអាជីពក្នុងវិស័យព័ត៌មាន។ 

ក្នុងឱកាសនោះ ប្រតិភូព័ត៌មានអាស៊ានក៏បានស្វែងយល់បន្ថែមអំពីបច្ចេកទេស និងជំនាញជាក់ស្តែង រួមមាន៖ ការសរសេរពាក្យបញ្ជា (Prompt Formula)៖ តាមរយៈរូបមន្តស្តង់ដាររួមមាន ប្រធានបទ (Subject) រចនាប័ទ្ម (Style) គុណភាព (Quality) មុំកាមេរ៉ា (Shot) និងប៉ារ៉ាម៉ែត្រ (Parameters) ដើម្បីបញ្ជា AI ឱ្យបង្កើតរូបភាព ឬវីដេអូបានត្រឹមត្រូវតាមតម្រូវការ។  ទន្ទឹមនេះ ការប្រើ ប្រាស់មុខងារកម្រិតខ្ពស់៖ ដូចជាការប្រើប្រាស់កូដបញ្ជា ដើម្បីគ្រប់គ្រងកម្រិតភាពស្រដៀងគ្នារវាងរូបភាពថ្មី និងរូបភាពដើម មុខងារបម្លែងរូបភាពទៅជាអត្ថបទបញ្ជា និងការលាយបញ្ចូលគ្នារវាងរូបភាពជាច្រើន។ការណែនាំពីឧបករណ៍ថ្មីៗ៖ ដូចជាឧបករណ៍ Whisk របស់ Google Labs និង Kling AI ក្នុងការជួយសម្រួលដល់ការច្នៃម៉ូដរចនាបទរូបភាព និងក្រាហ្វិកផ្សេងៗ។ 

តាមរយៈបទបង្ហាញនេះ បានឆ្លុះបញ្ចាំងឱ្យឃើញថា ការបត់បែនតាមការវិវត្តនៃបច្ចេកវិទ្យា AI គឺជាកត្តាគន្លឹះសម្រាប់ស្ថាប័នសារព័ត៌មានអាស៊ាន ក្នុងការលើកកម្ពស់គុណភាពនៃការផ្សព្វផ្សាយព័ត៌មានឱ្យកាន់តែរស់រវើក ទាក់ទាញ និងឆ្លើយតបនឹងតម្រូវការទស្សនិកជនក្នុងសម័យកាលឌីជីថលបច្ចុប្បន្ន៕

ដោយ៖ ទូច វលក័្ខណ