AKP បន្ទាយមានជ័យ ថ្ងៃទី២៧ខែកញ្ញា ឆ្នាំ២០២៦ -- ក្នុងពេលដែលទឹកជំនន់កំពុងបង្កផលប៉ះពាល់ដល់ផ្ទៃដីកសិកម្ម និងគំរាម កំហែងដល់ផលស្រូវរបស់ប្រជាកសិករ ការចុះអន្តរាគមន៍ប្រមូលផលស្រូវជាបន្ទាន់ ត្រូវបានចាត់ទុកជាវិធានការជាក់ស្តែងមួយ ដើម្បីជួយសង្គ្រោះផលដំណាំ និងសម្រាលការលំបាករបស់ប្រជាកសិករ ដែលកំពុងប្រឈមនឹងការខាតបង់។

នៅរសៀលថ្ងៃសៅរ៍ ទី២៦ ខែកញ្ញា ឆ្នាំ២០២៦ ឯកឧត្តម ប្រាក់ ដាវីដ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានដឹកនាំក្រុមការងាររបស់មន្ទីរកសិកម្ម រុក្ខាប្រមាញ់ និងនេសាទខេត្តបន្ទាយមានជ័យ ចុះអន្តរាគមន៍ជាមួយប្រជាកសិករ ប្រមូលផលស្រូវដែលអាចប្រមូលបាន ស្ថិតនៅភូមិដីឡូ សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ ខណៈផ្ទៃដីស្រូវកំពុងរងផលប៉ះពាល់ដោយសារទឹកជំនន់។

ឯកឧត្តម ប្រាក់ ដាវីដ បានលើកបង្ហាញថា ការចុះអន្តរាគមន៍នៅពេលនេះ គឺផ្តោតសំខាន់លើការជួយប្រជាកសិករឱ្យអាចសង្គ្រោះផលស្រូវដែលនៅសល់ មុនពេលទឹកជំនន់បង្កការខូចខាតកាន់តែធ្ងន់ធ្ងរ។ ការចូលរួមរបស់មន្ត្រីជំនាញជាមួយកសិករផ្ទាល់នៅក្នុងស្រែ គឺជាការបង្ហាញពីការយកចិត្តទុកដាក់ចំពោះជីវភាព និងផលប្រយោជន៍របស់ប្រជាកសិករ ជាពិសេសនៅក្នុងស្ថានភាពដែលពួកគាត់កំពុងប្រឈមនឹងការលំបាកដោយសារគ្រោះធម្មជាតិ។

ឯកឧត្តមបានបញ្ជាក់ថា ផលស្រូវដែលអាចប្រមូលបាន គឺត្រូវខិតខំសង្គ្រោះឱ្យបានទាន់ពេលវេលា ដើម្បីកាត់បន្ថយការខាតបង់របស់កសិករ ព្រោះរាល់ផលស្រូវដែលអាចរក្សាទុកបាន គឺជាចំណែកមួយក្នុងការរក្សាចំណូល និងសន្តិសុខស្បៀងរបស់គ្រួសារកសិករ។ ដូច្នេះ ការអន្តរាគមន៍ត្រូវធ្វើឱ្យបានរហ័ស ស្របតាមស្ថានភាពជាក់ស្តែងនៃទឹកជំនន់ និងលទ្ធភាពប្រមូលផលនៅតាមតំបន់។

ក្នុងប្រតិបត្តិការនេះ ក្រុមការងារមន្ទីរកសិកម្ម រុក្ខាប្រមាញ់ និងនេសាទខេត្ត បានសហការជាមួយប្រជាកសិករ ចុះប្រមូលផលស្រូវដែលមានលទ្ធភាពប្រមូលបាន ដោយផ្តោតលើស្រែដែលកំពុងប្រឈមនឹងការលិចលង់ និងអាចខូចខាត ប្រសិនបើមិនបានប្រមូលទុកទាន់ពេល។    

សកម្មភាពនេះមិនត្រឹមតែជាការប្រមូលផលស្រូវប៉ុណ្ណោះទេ ប៉ុន្តែជាការឆ្លើយ តបជាក់ស្តែងរបស់មន្ត្រីជំនាញចំពោះបញ្ហារបស់ប្រជាកសិករ នៅពេលដែលផលិតផលដែលពួកគាត់បានខិតខំប្រឹងប្រែងដាំដុះអស់រយៈពេលជាច្រើនខែ កំពុងប្រឈមនឹងការខូចខាតដោយសារទឹកជំនន់។

ការចុះអន្តរាគមន៍នេះ ក៏បានបង្ហាញពីសារៈសំខាន់នៃការចូលរួមរបស់អាជ្ញាធរ និងមន្ទីរជំនាញ ក្នុងការឆ្លើយតបចំពោះគ្រោះធម្មជាតិដែលប៉ះពាល់ដល់វិស័យកសិកម្ម ដោយមិនរង់ចាំឱ្យផលប៉ះពាល់កាន់តែធ្ងន់ធ្ងរ ទើបចាត់វិធានការ។ ជាពិសេស ការជួយ សង្គ្រោះផលស្រូវដែលនៅអាចប្រមូលបាន គឺជាការរួមចំណែកកាត់បន្ថយការខាតបង់ផ្នែកសេដ្ឋកិច្ច និងជួយឱ្យកសិករមានលទ្ធភាពរក្សាទុកផលិតផលសម្រាប់ជីវភាពគ្រួសារ។

សម្រាប់ប្រជាកសិករដែលកំពុងរងផលប៉ះពាល់ដោយទឹកជំនន់ ការចុះមកដល់ទីតាំងផ្ទាល់របស់ក្រុមការងារជំនាញ និងការចូលរួមប្រមូលផលជាមួយពួកគាត់ គឺជាសកម្មភាពដែលបង្ហាញពីការយក ចិត្តទុកដាក់ និងការចូលរួមសម្រាលការលំបាកក្នុងគ្រាដែលពួកគាត់កំពុងត្រូវការជំនួយជាបន្ទាន់។

ជាមួយគ្នានេះ ការអន្តរាគមន៍ប្រមូលផលស្រូវនៅភូមិដីឡូ ក៏ជាមេរៀនសម្រាប់ការឆ្លើយតបបន្ទាន់ក្នុងវិស័យកសិកម្ម ដោយតម្រូវឱ្យមានការតាមដានស្ថានភាពទឹកជំនន់ ការវា យតម្លៃផលប៉ះពាល់ និងការចាត់វិធានការសង្គ្រោះផលដំណាំឱ្យបានទាន់ពេលវេលា ដើម្បីកាត់បន្ថយហានិភ័យដែលអាចប៉ះពាល់ដល់ជីវភាពប្រជាកសិករ។

តាមរយៈសកម្មភាពនេះ ក្រុមការងារមន្ទីរកសិកម្ម រុក្ខាប្រមាញ់ និងនេសាទខេត្តបន្ទាយមានជ័យ បានបន្តបង្ហាញពីតួនាទីរបស់មន្ទីរជំនាញ ក្នុងការចូលរួមដោះស្រាយបញ្ហាជាក់ស្តែងនៅមូលដ្ឋាន និងសម្រាលការលំបាករបស់ប្រជាក សិករ ជាពិសេសក្នុងស្ថានភាពគ្រោះទឹកជំ នន់ ដែលតម្រូវឱ្យមានការឆ្លើយតបឱ្យបានឆាប់រហ័ស និងមានប្រសិទ្ធភាព៕

ដោយ ៖ឈុនសារ៉ាត