AKP កំពង់ធំ ថ្ងៃទី២៦ ខែកញ្ញា ឆ្នាំ ២០២៦ – លោកជំទាវឃួន ឃុនឌី សមាជិកគណៈកម្មាធិការកណ្តាលគណបក្សប្រជាជនកម្ពុជាជំរុញឱ្យសមាជិកសមាជិកាគណបក្សទាំងអស់បន្តតាមដាន និងគ្រប់គ្រងបញ្ហាប្រឈមឱ្យបានត្រឹមត្រូវដើម្បីរកដំណោះស្រាយឱ្យបានទាន់ពេលវេលា។
លោកជំទាវ ឃួន ឃុនឌី លើកឡើងដូច្នេះក្នុងកិច្ចប្រជុំពិភាក្សាការងារគណបក្សនៅមូលដ្ឋាននាព្រឹក ថ្ងៃទី២៦ ខែកញ្ញា ឆ្នាំ២០២៦ នៅទីស្នាក់ការគណបក្សឃុំសាន់គ ស្រុកកំពង់ស្វាយខេត្តកំពង់ធំ។ 

លោកជំទាវបានមានប្រសាសន៍ថាតាមរយៈរបាយការណ៍ និងការលើកឡើងរបស់សមាជិកសមាជិកាគណបក្សភូមិទាំងអស់យើងសង្កេតឃើញមានបញ្ញាប្រឈមសំខាន់មួយចំនួនដែលត្រូវដោះស្រាយឱ្យបានទាន់ពេលវេលាដោយសង្កត់ធ្ងន់លើចំណុចមួយចំនួនដូចជា÷១. ប្រជាជនធ្វើចំណាកស្រុកទៅធ្វើការនៅកន្លែងឆ្ងាយ ដែលតម្រូវឱ្យក្រុមការងារគណបក្សត្រូវស្រង់ទិន្នន័យ តួលេខឱ្យបានច្បាស់លាស់ នឹងធ្វើយ៉ាងណាដើម្បីឱ្យពួកគាត់មានឈ្មោះបោះឆ្នោត។២.ត្រូវក្តាប់ឱ្យបាននូវចំនួនបងប្អូនដែលមិនទាន់មានអត្តសញ្ញាណប័ណ្ណ ដោយសម្របសម្រួលយ៉ាងណាឱ្យពួកគាត់មានអត្តសញ្ញាណប័ណ្ណ ព្រមទាំងឯកសារពាក់ព័ន្ធផ្សេងទៀតដើម្បីឱ្យពួកគាត់អាចបោះឆ្នោតបាន។៣. គ្រប់គ្រងឱ្យបាននូវចំនួនប្រជាជនដែលគ្រប់អាយុបោះឆ្នោត និងចំនួនប្រជាជនដែលមិនទាន់ចុះឈ្មោះបោះឆ្នោត ដោយធ្វើរបាយការណ៍ និងសម្របសម្រួលដើម្បីផ្តល់លទ្ធភាពអាចបោះឆ្នោតបាន។

បន្ថែមពីនេះទៀតក្រុមការងារទាំងអស់ត្រូវរក្សាការទំនាក់ទំនងជាមួយប្រជាពលរដ្ឋឱ្យបានល្អ ការរស់រាយរាក់ទាក់ ការចុះសួរសុខទុក្ខសមាជិកគណៈបក្សចាស់ ដោយបក្សយើងតែងតែប្រើគីរក្សាចាស់បង្កើតថ្មី ព្រមទាំងរក្សាឱ្យបានការសាមគ្គីគ្នាឱ្យបានរឹងមាំដើម្បីភាពជោគជ័យរបស់គណបក្សក្នុងការបោះឆ្នោតនាពេលខាងមុខនេះ។ 
លោកជំទាវបញ្ជាក់ថាយើងត្រូវចងចាំការបោះឆ្នោតជ្រើសរើសក្រុមប្រឹក្សាឃុំសង្កាត់គីជាមូលដ្ឋានគ្រឹះដ៏រឹងមាំមួយដើម្បីឈានទៅរកភាពជោគជ័យក្នុងការបោះឆ្នោតជ្រើសរើសតំណាងរាស្ត្រនាពេលខាងមុខនេះ។ ដូច្នេះហើយយើងមិនអាចមើលស្រាលលើស្ថានភាពនេះបានទេ។

លោកជំទាវ ឃួន ឃុនឌី ក្រើនរំលឹកដល់ការរក្សាឱ្យបាននូវភូមិឃុំមានសុវត្តិភាព ដែលជាចំណុចស្នូលក្នុងមូលដ្ឋានរបស់យើងហើយត្រូវខិតខំដាំដុះដំណាំផ្សេងៗ ដើម្បីផ្គត់ផ្គង់ជីវភាពគ្រួសារបន្ថែមទៀត និងថែទាំសុខភាពឱ្យបានល្អ ពិសេសប្រុងប្រយ័ត្នក្នុងការធ្វើដំណើរ ដើម្បីជៀសវាងគ្រោះថ្នាក់ចរាចរណ៍ដែលជាអាវុធលាក់មុខដ៏សាហាវ។
នាឱកាសនេះលោកជំទាវបានឧបត្តម្ភដល់សមាជិកម្នាក់ៗទទួលបាន ថង់ក្រណាត់១ សារុង១ ក្រមា១ និងថវិកា ២ ម៉ឺនរៀល៕

ដោយ៖ ស៊ុម វណ្ណា