AKPកំពង់ធំថ្ងៃទី២៦ខែកញ្ញាឆ្នាំ២០២៦ -- មន្ទីរកិច្ចការនារីខេត្តកំពង់ធំសហការជាមួយនាយកដ្ឋានស្រ្តី និងសុខភាពនៃក្រសួងកិច្ចការនារី មន្ទីរសុខាភិបាលនៃរដ្ឋបាលខេត្តនិងរដ្ឋបាលស្រុកស្ទោង ក្រោមការឧបត្ថម្ភគាំទ្រពីអង្គការមូលនិធិហ្រ្វេដហូឡូ បានរៀបចំវគ្គបណ្តុះបណ្តាលស្តីពី យេនឌ័រ និងសុខភាពភ្នែកជូនដល់មន្ត្រីការិយាល័យសង្គមកិច្ច និងសុខុមាលភាពសង្គម ស្រុកស្ទោង។

កាលពីថ្ងៃទី២៥ខែកញ្ញាឆ្នាំ២០២៦ មន្ទីរកិច្ចការនារីខេត្តកំពង់ធំនិងអ្នកទទួលបន្ទុកកិច្ចការនារី និងកុមារឃុំ ទាំង១៣ឃុំ ក្នុងស្រុកស្ទោង និងអ្នកទទួលបន្ទុកកិច្ចការនារីនិងកុមារឃុំមួយចំនួនក្នុងស្រុកប្រាសាទបល្ល័ង្កក្រោមអធិបតីភាព លោកស្រី ស៊ូ ផារិន អនុប្រធានមន្ទីរកិច្ចការនារីខេត្តកំពង់ធំដោយមានការចូលរួមពីលោកស្រីឡេង មោនីផា អនុប្រធាននាយកដ្ឋានស្រ្តីនិងសុខភាពក្រសួងកិច្ចការនារី លោកស្រី  ទត គឹមសុភារិន្ទ អភិបាលរងនៃគណៈអភិបាលស្រុកស្ទោង លោកស្រី ហួត ប៉ិច នាយអាគារចក្ខុរោគនៃមន្ទីរពេទ្យបង្អែកខត្តកំពង់ធំ នៅសាលប្រជុំសាលាស្រុកស្ទោងដោយមានអ្នកចូលរួមជាស្ត្រីចំនួន២៤នាក់។

វគ្គបណ្ដុះបណ្ដាលនេះមានគោលបំណងផ្តល់ចំណេះដឹងនិងពង្រឹងសមត្ថភាពមន្រ្តីថ្នាក់ក្រោមជាតិស្តីពីយេនឌ័រនិងសុខភាពភ្នែកប្រកបដោយសេវាទូលំទូលាយនិងបរិយាប័ន្នរួមទាំងសិទ្ធជនមានពិការភាពនិងសិទ្ធកុមារដើម្បីផ្តល់ជាទន់សម្រាប់ផ្សព្វផ្សាយបន្តនិងបញ្ជូនអ្នកមានបញ្ហាភ្នែកជូនបងប្អូនប្រជាពលរដ្ឋនៅក្នុងសហគមន៍។

លោកស្រី ស៊ូ ផារិន បានគូសបញ្ជាក់ថា សុខភាពភ្នែកគឺជាផ្នែកមួយដ៏សំខាន់នៃសុខុមាលភាពនិងគុណភាពជីវិត របស់មនុស្ស ព្រោះភ្នែកជាអវៈយវៈដ៏សំខាន់សម្រាប់ការរស់នៅប្រចាំថ្ងៃ ការសិក្សា ការងារ ការទំនាក់ទំនងនឹងការចូលរួមក្នុងសង្គម។នៅក្នុងសម័យបច្ចុប្បន្នដែលបច្ចេកវិទ្យាកំពុងរីកចម្រើនយ៉ាងឆាប់រហ័សការប្រើប្រាស់ ឧបករណ៍អេឡិចត្រូនិក ដូចជា ទូរស័ព្ទដៃ កុំព្យូទ័រ និងថេបប្លែត បានក្លាយជាផ្នែកមួយនៃជីវិតប្រចាំថ្ងៃ។ ទន្ទឹមនឹងអត្ថប្រយោជន៍ជាច្រើនការប្រើប្រាស់អេក្រង់ជាបន្តបន្ទាប់ រយៈពេលយូរក៏អាចប៉ះពាល់ដល់ភ្នែក ពាក់ព័ន្ធនឹងរោគសញ្ញា ដូចជាភ្នែកស្ងួត ឈឺភ្នែក មើលមិនច្បាស់និងបញ្ហាគំហើញមួយចំនួន។

លោកស្រីបានបន្តទៀតថា ការអប់រំផ្សព្វផ្សាយ និងការថែទាំ ពិនិត្យនិងព្យាបាលសុខភាពភ្នែក ត្រូវធ្វើទន្ទឹមគ្នាជាមួយការយកចិត្តទុកដាក់លើ សមភាពយេនឌ័រ និងបរិយាបន្ន ដោយមិនទុកនរណាម្នាក់ចោលឡើយ។ ការងារនេះ ក៏ស្របតាមចក្ខុវិស័យនិងគោលនយោបាយរបស់រាជរដ្ឋាភិបាលកម្ពុជា ដែលបាននិងកំពុងយកចិត្ត ទុកដាក់លើការលើកកម្ពស់សុខភាពនិងសុខុមាលភាពរបស់ប្រជាពលរដ្ឋ ជាពិសេសស្ត្រីនិងក្មេងស្រីព្រមទាំង ក្រុមប្រជាជនដែលងាយរងគ្រោះ និងជនមានពិការភាព ដើម្បីធានាឱ្យពួកគេអាចចូលរួមយ៉ាងសកម្ម និងស្មើភាពក្នុងគ្រប់សកម្មភាពនៃការអភិវឌ្ឍសង្គម និងសេដ្ឋកិច្ច។

លោកស្រី ស៊ូ ផារិន អនុប្រធានមន្ទីរកិច្ចការនារីខេត្តកំពង់ធំបានមានប្រសាសន៍ថាតាមរយៈកម្មវិធីវគ្គបណ្តុះបណ្តាលនាឱកាសនេះ លោក លោកស្រី និងបងប្អូន សិក្ខាកាមទាំងអស់នឹងទទួលបានចំណេះដឹងនិងការយល់ដឹងបន្ថែមអំពីសុខភាពភ្នែក ព្រមទាំងវិធីថែទាំនិងការពារភ្នែករបស់យើងឱ្យបានត្រឹមត្រូវ និងយកចំណេះដឹងដែលទទួលបានពីវគ្គបណ្តុះបណ្តាលថ្ងៃនេះទៅផ្សព្វផ្សាយបន្ត ដល់បងប្អូនប្រជាពលរដ្ឋនៅក្នុងសហគមន៍។ 

ប្រសិនបើមានរោគសញ្ញាដូចជា ឈឺភ្នែក ភ្នែកមើលមិនសូវច្បាស់ ស្រអាប់ឬមានការប្រែប្រួលនៃការមើលឃើញ សូមកុំមើលរំលង ឬពន្យារពេល សូមទៅពិនិត្យ និងទទួលបានការប្រឹក្សាពីអ្នកជំនាញឬសេវាសុខភាពភ្នែកដែលមានសមត្ថភាពឱ្យបានទាន់ពេលវេលា ដើម្បីអាចរកឃើញបញ្ហាបានឆាប់និងទទួលបានការថែទាំ ឬព្យាបាលសមស្រប។ 

ក្នុងនោះផងដែរ លោកស្រីអនុប្រធានមន្ទីរក៏បានបញ្ជ្រាបពីជំងឺគ្រុនឈាម មានការកើនឡើងនៅរដូវវស្សានេះ សូមឱ្យអ្នកទទួលបន្ទុកកិច្ចការនារី និងកុមារឃុំ ជួយផ្សព្វផ្សាយបន្ត នឹងជំរុញបន្ថែមឱ្យប្រជាពលរដ្ឋមានការប្រុងប្រយ័ត្ន និងមានវិធានការបង្ការ ការពារពីជំងឺគ្រុនឈាម រួមទាំងស្វែងរកការព្យាបាលឱ្យទាន់ពេលវេលានិងបានផ្តាំផ្ញើឱ្យអ្នកទទួលបន្ទុកកិច្ចការនារី និងកុមារឃុំទាំងអស់ ជួយផ្សព្វផ្សាយបន្ត និងជំរុញឱ្យស្រ្តីដែលមានផ្ទៃពោះទាំងអស់ទៅពិនិត្យផ្ទៃពោះឱ្យបានទៀងទាត់តាមការណាត់ជួបរបស់គ្រូពេទ្យដើម្បីកាត់បន្ថយអត្រាស្លាប់កើតនិងកើតស្លាប់របស់ទារក៕

ដោយ៖ ស៊ុម វណ្ណា