AKPកំពង់ធំថ្ងៃទី២៥ខែកញ្ញាឆ្នាំ២០២៦--

ឧត្តមសេនីយ៍ទោ សោម ស៊ុន មេបញ្ជាកា រតំបន់ប្រតិបត្តិការសឹក រង អនុប្រធា នអចិន្ត្រៃយ៍នៃគណៈកម្មការ ការពារ ទប់ស្កាត់ និងបង្ក្រាបបទល្មើស ធនធានធម្មជាតិខេត្តកំពង់ធំកាលពីថ្ងៃទី២៤ខែ កញ្ញាឆ្នាំ២០២៦បានដាក់បទបញ្ជាឱ្យកងកម្លាំងអន្តរាគមន៍នៃបញ្ជាការដ្ឋានតំបន់ប្រតិបត្តិការសឹករងកំពង់ធំសហ ការជាមួយមន្ត្រីជំនាញជលផលស្រុកស្ទោង ទៅបង្ក្រាបឧបករណ៍នេសាទខុសច្បាប់ជាបន្ទាន់នៅតំបន់អាងយាយវិនក្នុងភូមិសាស្ត្រ ឃុំសំពោចស្រុកស្ទោង ខេត្តកំពង់ធំ។

កិច្ចប្រតិបត្តិការនេះដឹកនាំដោយលោកអនុសេនីយ៍ឯក លុយ សុភាព និងលោកអនុសេនីយ៍ឯក ហែម ថន នាយទាហាននៃបញ្ជាការដ្ឋានតំបន់ប្រតិបត្តិការសឹករងកំពង់ធំយោធភូមិភាគទី៤។

ជាលទ្ធផលកងកម្លាំងចម្រុះបានធ្វើស កម្មភាពបង្ក្រាបបានឧបករណ៍នេសាទល្មើសច្បាប់នៅនឹងកន្លែងរួមមាន៖របាំងស្បៃមុងចំនួន៥៥របាំងប្រវែង ២២០០ ម៉ែត្រឡុកស្បៃមុងចំនួន៥៥គ្រឿងលូឬលបស្បៃមុងចំនួន១១០មាត់ របាំងសាច់អួនក្រឡាញឹកចំនួន៤របាំងប្រវែង ៨០០ម៉ែត្រឡុកសាច់អួនចំនួន៤គ្រឿង លូឬលបចំនួន ៨គ្រឿងបង្គោលឈើចំនួន១៥០០ដើមនិងចាក់លែងកូនត្រីចម្រុះចំនួន៩០ គីឡូក្រាមចូលបឹងធម្មជាតិវិញ។

ឧត្តមសេនីយ៍ទោ សោម ស៊ុន បានសំណូមពរដល់អាជ្ញាធរដែនដីនិងប្រជាពលរដ្ឋនៅតាមមូលដ្ឋាននីមួយៗសូមមេត្តាចូលរួមទាំងអស់គ្នាក្នុងការការពារ ទប់ស្កាត់និងបង្ក្រាបបទល្មើសនេសាទខុសច្បាប់ពិសេសនៅក្នុងរដូវបិទនេសាទនិងបានសំណូមពរដល់ប្រជានេសាទាំងអស់សូមមេត្តាកុំប្រើប្រាស់ឧបករណ៍នេសាទខុសច្បាប់ដែលនាំឱ្យបាត់បង់ដល់ធនធានមច្ឆជាតិរបស់យើងព្រមទាំងបានដាក់បទបញ្ជាដល់កង កម្លាំងអន្តរាគមន៍និងកងកម្លាំងដែលប្រចាំការនៅទីបញ្ជាការស្រាលបង្ក្រាបបទល្មើសនេសាទនៅក្នុងភូមិសាស្ត្រស្រុកស្ទោងនិងស្រុកកំពង់ស្វាយត្រូវបន្តធ្វើសកម្មភាពក្នុងការបង្ក្រាបបទល្មើសនេសាទខុសច្បាប់ឱ្យដូចភ្លៀងរលឹម ដោយគ្មានការដកថយឡើយដើម្បីសង្គមជាតិនិងកូនចៅយើងនៅជំនាន់ក្រោយៗទៀត។

នៅថ្ងៃជាមួយគ្នានេះដែរដោយមានការអនុញ្ញាតពីលោក ជិន ស៊ីថា នាយខណ្ឌរដ្ឋបាលជលផលកំពង់ធំបានចាត់ឱ្យលោក យ៉េង យ៉ាន នាយសង្កាត់រដ្ឋបាលជលផលស្ទឹងសែន និងលោក សៀង ហុកឃាន់ មេបញ្ជាការផ្នែក សឹករងក្រុងស្ទឹងសែន បានដឹកនាំកម្លាំងបន្តចុះត្រួតពិនិត្យនិងបង្ក្រាបបទល្មើសជលផលនៅចំណុចបឹងអំពែនិងព្រែកដំរីឡូតស្ថិតក្នុងភូមិសាស្ត្រសង្កាត់ស្រយ៉ូវក្រុងស្ទឹងសែនខេត្តកំពង់ធំ។
ជាលទ្ធផលក្រុមការងារបានរុះរើនិងកាប់បំផ្លាញចោលឧបករណ៍នេសាទខុសច្បាប់នៅនឹងកន្លែងរួមមាន៖ របាំងស្បៃមុងប្រវែងសរុប១៨០០ម៉ែត្រឡុកចំនួន២៥គ្រឿងលូស្បៃមុងចំនួន២៥មាត់ បង្គោលចំនួន១៩០០ដើមនិងបានចាក់លែងកូនត្រីចម្រុះទម្ងន់ប្រមាណ៩០គីឡូក្រាមចូលក្នុងបឹងធម្មជាតិវិញដើម្បីចូលរួមថែរក្សានិងអភិរក្សធនធានជលផល៕

ដោយ៖ ស៊ុម វណ្ណា