AKP កំពង់ធំ ថ្ងៃទី២៥ ខែកញ្ញា ឆ្នាំ២០២៦--

លោក ជា សុភឿន អនុប្រធានល.ខ.ប អញ្ជើញបើកវគ្គបណ្តុះបណ្តាលស្តីពី "ការពិនិត្យបញ្ជីឈ្មោះនិងការចុះឈ្លោះបោះឆ្នោតឆ្នាំ២០២៦" រៀបចំដោយលេខាធិការដ្ឋានរៀបចំការបោះឆ្នោតប្រចាំខេត្តកំពង់ធំដល់មន្ត្រីមន្ទីរ-អង្គភាព ពាក់ព័ន្ធទាំងអស់កងកម្លាំងទាំងបីកាលពីថ្ងៃទី២៤ខែកញ្ញា ឆ្នាំ២០២៦នៅសាលប្រជុំលេខាធិការដ្ឋានខេត្ត។

លោក ជា សុភឿន អនុប្រធាន ល.ខ.ប មានប្រសាសន៍ថា អនុលោមតាមច្បាប់ស្តីពីការបោះឆ្នោតជ្រើសរើសតំណាងរាស្រ្តនិងច្បាប់ស្តីពីវិសោធនកម្មនៃច្បាប់នេះ និងច្បាប់ស្តីពីការបោះឆ្នោតជ្រើសរើសក្រុមប្រឹក្សាឃុំសង្កាត់និងច្បាប់ស្តីពីវិសោធនកម្មនៃច្បាប់នេះ គ.ជ.ប មានភារកិច្ចរៀបចំចាត់ចែងនិងគ្រប់គ្រងដំណើរការនៃការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០២៦ដើម្បីរៀបចំបញ្ជីឈ្មោះបោះឆ្នោតឆ្នោតសម្រាប់បម្រើឱ្យការបោះឆ្នោតជ្រើសរើស ក្រុមប្រឹក្សាឃុំសង្កាត់អាណត្តិទី៦ឆ្នាំ២០២៧និងតាមកាលកំណត់នៃច្បាប់។ យោងតាមសេចក្តីសម្រេចលេខ ០០៥ គ.ជ.ប.ស.ស ចុះថ្ងៃទី២២ ខែមករា ឆ្នាំ២០២៦ ការពិនិត្យបញ្ជីឈ្មោះនិងការចុះឈ្មោះបោះឆ្នោតនិងការផ្តល់សុពលភាពលើបញ្ជីឈ្មោះបោះឆ្នោតផ្លូវការឆ្នាំ២០២៦ត្រូវធ្វើចាប់ពីថ្ងៃ៧ខែតុលាឆ្នាំ២០២៦រហូតដល់ថ្ងៃទី១២ ខែកុម្ភៈ ឆ្នាំ២០២៧។ រីឯការពិនិត្យបញ្ជីឈ្មោះបោះឆ្នោតនៅតាមឃុំសង្កាត់ទូទាំងប្រទេសមានរយះពេល៥៥ថ្ងៃ ត្រូវអនុវត្តចាប់ពីថ្ងៃទី៧ ខែតុលា ដល់ថ្ងៃទី៣០ខែវិច្ឆិកា ឆ្នាំ២០២៦ដូចបានកំណត់ក្នុងប្រតិទិននៃការពិនិត្យបញ្ជីឈ្មោះបោះឆ្នោតឆ្នាំ២០២៦។

លោកបានបញ្ជាក់ថា វគ្គបណ្តុះបណ្តាលនាពេលនេះ ត្រូវបានរៀបចំជាពិសេសជូនដល់មន្ត្រី ល.ខ.ប តំណាងគណបក្សនយោបាយ តំណាងសមាគមនិងអង្គការមិនមែនរដ្ឋាភិបាលដើម្បីឱ្យបានយល់ដឹងដូចៗគ្នា អំពីក្របខណ្ឌច្បាប់បោះឆ្នោតដំណើការប្រព្រឹត្តទៅនៃការពិនិត្យបញ្ជីឈ្មោះ និងការចុះឈ្មោះបោះឆ្នោត ការប្រើប្រាស់ទម្រង់បែបបទនានា ការវិចខ្ចប់សម្ភារៈឯកសារ ព្រមទាំងបែបបទ និងនិតិវិធីនៃការផ្តល់ ឯកសារបញ្ចាក់អត្តសញ្ញាណបម្រើឱ្យការចុះឈ្មោះបោះឆ្នោតសម្រាប់ជាមូលដ្ឋានក្នុងការពិនិត្យបញ្ជីឈ្មោះ បោះឆ្នោតឆ្នាំ២០២៦ ទទួលបានជោគជ័យ គោរពតាមច្បាប់បញ្ជា និងលិខិតបទដ្ឋានគតិយុត្តជាធរមាន។

លោក ជា សុភឿន សង្ឃឹមថា លោកលោកស្រីនឹងខិតខំយកចិត្តទុកដាក់ ពិសេសមន្ត្រី ល.ខ.ប ដោយផ្សាភ្ជាប់គ្នារវាងទ្រឹស្តី និងការអនុវត្តជាក់ស្តែង ព្រមទាំងកត់ត្រានូវចំណុចសំខាន់ៗនឹងលើកជាសំណួរដើម្បីឱ្យគ្រូឧទ្ទេសពន្យល់បកស្រាយបន្ថែមទៀតដើម្បីយកចំណេះដឹងទាំងនេះទៅចែករំលែក និងធ្វើការបណ្តុះបណ្តាលបន្តដល់មន្ត្រី ក.ច.ប កបឃ.ស នៅតាមមណ្ឌលប្រមូលផ្ដុំក្រុងស្រុកឱ្យបានល្អប្រសើរ៕

ដោយ ស៊ុម វណ្ណា