AKP ភ្នំពេញ ថ្ងៃទី២៣ ខែកញ្ញា ឆ្នាំ២០២៦ -- ប្រធានាធិបតីអ៊ុយក្រែនលោក វូឡូឌីមៀ ហ្សេលេនស្គី (Volodymyr Zelenskyy) បានថ្លែងកាលពីថ្ងៃអង្គារថា លោកបានជួបជាមួយប្រធានាធិបតីបារាំង លោក អេមម៉ានូអែល ម៉ាក្រុន (Emmanuel Macron) នៅទីក្រុងញូវយ៉ក ដើម្បីពិភាក្សាអំពីកិច្ចសហប្រតិបត្តិការផ្នែកសន្តិសុខ និងកញ្ចប់ជំនួយសម្រាប់អ៊ុយក្រែនក្នុងរដូវរងា។

នៅក្នុងសេចក្តីថ្លែងការណ៍មួយនៅលើបណ្តាញសង្គមអ៊ិចរបស់សហរដ្ឋអាមេរិក លោក ហ្សេលេនស្គី បានឱ្យដឹងថា ការពិភាក្សានោះផ្តោតលើការផ្តល់ប្រព័ន្ធការពារដែនអាកាស និងមីស៊ីលបន្ថែមទៀត ដោយប្រើប្រាស់ថវិកាដែលមានក្រោមក្របខ័ណ្ឌកម្ចីរបស់សហភាពអឺរ៉ុប (EU)។

លោកបានមានប្រសាសន៍ថា៖ «យើងបន្តធ្វើការលើលទ្ធភាពនៃការផលិតប្រព័ន្ធការពារដែនអាកាស និងមីស៊ីលទាំងនេះនៅក្នុងប្រទេសអ៊ុយក្រែន ក៏ដូចជាលើកម្មវិធីរួមគ្នាប្រឆាំងនឹងមីស៊ីលផ្លោង ដែលមានឈ្មោះថា FREYJA ជាមួយដៃគូរបស់យើង។ យើងរំពឹងថានឹងទទួលបានលទ្ធផលដំបូងនៅឆ្នាំនេះ»។

ចំណែកឯលោក ម៉ាក្រុន វិញ បានថ្លែងថា លោកបានពិភាក្សា «យ៉ាងស៊ីជម្រៅ» ជាមួយលោក ហ្សេលេនស្គី អំពីការវាយប្រហាររបស់ប្រទេសរុស្ស៊ីទៅលើហេដ្ឋារចនាសម្ព័ន្ធថាមពលរបស់អ៊ុយក្រែន ដោយព្រមានថាការវាយប្រហារទាំងនោះអាចធ្វើឱ្យគ្រួសាររាប់លាននាក់ខ្វះខាតប្រព័ន្ធកម្ដៅ និងអគ្គិសនី។

លោកបានសរសេរនៅលើបណ្តាញសង្គមអ៊ិចថា៖ «ប្រទេសបារាំងនឹងឈរនៅជាមួយអ៊ុយក្រែនដើម្បីឆ្លងកាត់រដូវរងា ហើយក្រុមការងារថាមពលនៃក្រុមប្រទេស G7 ក៏នឹងចូលរួមគាំទ្រនៅក្បែរអ៊ុយក្រែនផងដែរ»។

លោក ម៉ាក្រុន បានប្រកាសថា ទីក្រុងប៉ារីស និងទីក្រុងគៀវ បានចុះហត្ថលេខាលើកិច្ចសន្យាសម្រាប់ការផ្គត់ផ្គង់ប្រព័ន្ធរ៉ាដា ខណៈដែលប្រទេសបារាំងក៏នឹងផ្តល់ជូនអ៊ុយក្រែននូវមីស៊ីលស្ទាក់ចាប់ (interceptors) ដើម្បីពង្រឹងប្រព័ន្ធការពារដែនអាកាសរបស់ខ្លួនផងដែរ។

លោកក៏បានបន្ថែមទៀតថា លោកបានពិភាក្សាអំពីការគាំទ្រដល់អ៊ុយក្រែនជាមួយអតីតប្រធានាធិបតីសហរដ្ឋអាមេរិក លោក ដូណាល់ ត្រាំ​ (Donald Trump) ក៏ដូចជាលទ្ធភាពនៃការឈប់បាញ់គ្នាលើវិស័យថាមពលនិងការផ្អាកសកម្មភាពយោធានៅតំបន់សមុទ្រខ្មៅ៕

ដោយ៖ មូល មិនា (ប្រភព៖ AA-AKP)