AKP ភ្នំពេញ ថ្ងៃទី២២ ខែកញ្ញា ឆ្នាំ២០២៦ -- កាលពីថ្ងៃចន្ទអង្គការសហប្រជាជាតិបានបង្ហាញពីការព្រួយបារម្ភយ៉ាងខ្លាំងចំពោះស្ថានភាពសន្តិសុខដែលកាន់តែធ្ងន់ធ្ងរ និងព្រឹត្តិការណ៍ថ្មីៗនៅក្នុងប្រទេសអេត្យូពី រួមទាំងការបង្កើតសម្ព័ន្ធភាពថ្មីនៃក្រុមប្រដាប់អាវុធ និងសេចក្តីរាយការណ៍អំពីអសន្តិសុខដែលនៅតែបន្តកើតមាន ក៏ដូចជាការវាយប្រហារដោយយន្តហោះគ្មានមនុស្សបើក (drone)។

លោក ស្តេហ្វាន ឌូចារីក (Stephane Dujarric) អ្នកនាំពាក្យរបស់អគ្គលេខាធិការអង្គការសហប្រជាជាតិ លោក អានតូញ៉ូ ហ្គូធឺរែស (Antonio Guterres) បានថ្លែងប្រាប់អ្នកសារព័ត៌មាននៅក្នុងសន្និសីទមួយថា៖ «ក្នុងពេលដែលមានភាពតានតឹងកើនឡើងនេះ យើងសូមអំពាវនាវដល់ភាគីពាក់ព័ន្ធទាំងអស់ឱ្យជៀសវាងសកម្មភាព ឬការថ្លែងសុន្ទរកថាដែលអាចធ្វើឱ្យស្ថានភាពកាន់តែធ្ងន់ធ្ងរឡើង។ យើងក៏សូមអំពាវនាវឱ្យពួកគេប្តេជ្ញាចិត្តឡើងវិញចំពោះការសន្ទនាផងដែរ។ សកម្មភាពយោធានឹងមិនអាចដោះស្រាយភាពខុសគ្នាផ្នែកនយោបាយ ឬដោះស្រាយបញ្ហាដែលជាឫសគល់នៃជម្លោះនោះឡើយ»។

លោក ឌូចារីក បានបញ្ជាក់ថា អង្គការសហប្រជាជាតិនៅតែបន្តគាំទ្រកិច្ចខិតខំប្រឹងប្រែងដែលដឹកនាំដោយសហភាពអាហ្វ្រិក ដើម្បីកាត់បន្ថយភាពតានតឹង និងជំរុញការអនុវត្តកិច្ចព្រមព្រៀងទីក្រុងព្រេតូរីយ៉ា៕

ដោយ៖ មូល មិនា (ប្រភព៖ ភីបផលដេលី)