AKP ភ្នំពេញ ថ្ងៃទី២១ ខែកញ្ញា ឆ្នាំ២០២៦ --

តំណាងក្រុមប្រឹក្សាអភិវឌ្ឍន៍កម្ពុជា (CDC) ក្រសួងពាណិជ្ជកម្ម ក្រសួងព័ត៌មាន ស្ថានទូតចិនប្រចាំកម្ពុជា សមាគមសភាពាណិជ្ជកម្មចិនប្រចាំកម្ពុជា សមាគមសម្ព័ន្ធខ្មែរចិននៅកម្ពុជា និងធនាគារអាយស៊ីប៊ីស៊ី (ICBC) សាខាភ្នំពេញ ព្រមទាំងសមាជិកសមាគម និងក្រុមហ៊ុនដៃគូ បានចូលរួមក្នុងកិច្ចពិភាក្សានលើប្រធានបទនានាដូចជា គោលនយោបាយវិនិយោគ បរិយាកាសធុរកិច្ច ការកាត់បន្ថយហានិភ័យរបស់ក្រុមហ៊ុន និងការផ្សព្វផ្សាយព័ត៌មាន ឱ្យបានទូលំទូលាយកិច្ច។ពិភាក្សានេះ បានរៀបចំឡើងដោយសមាគមអភិវឌ្ឍន៍ពាណិជ្ជកម្មស៊ីឈួន ឆុងឈីងកម្ពុជា ក្រោមប្រធានបទ "ការអភិវឌ្ឍ និងឱកាសវិនិយោគនៅកម្ពុជា" កាលពីចុងសប្ដាហ៍កន្លងទៅនេះ ​នៅរាជធានីភ្នំពេញ។

ក្នុងឱកាសនោះ លោក Zheng Xianjiang ប្រធានសមាគមអភិវឌ្ឍន៍ពាណិជ្ជកម្មស៊ីឈួនឆុងឈីងកម្ពុជា បានថ្លែងថា ក្រោមការដឹកនាំជាយុទ្ធសាស្ត្ររបស់ថ្នាក់ដឹកនាំនៃប្រទេសទាំងពីរ កិច្ចសហប្រតិបត្តិការសេដ្ឋកិច្ច និងពាណិជ្ជកម្មត្រូវបានពង្រីកឱ្យកាន់តែស៊ីជម្រៅ ហើយការផ្លាស់ប្តូររវាងប្រជាជន និងប្រជាជនក៏ត្រូវបានពង្រឹងផងដែរ។ លោកបានគូសបញ្ជាក់ថា សហគ្រាសចិនកាន់តែច្រើនបានមកវិនិយោគ រយៈពេលវែងនៅកម្ពុជា ដែលបានរួមចំណែកយ៉ាងវិជ្ជមានដល់ការអភិវឌ្ឍឧស្សាហកម្មក្នុងស្រុក ការកសាងហេដ្ឋារចនាសម្ព័ន្ធ និងការបង្កើតឱកាសការងារ។ លោកប្រធានសមាគមបានឱ្យដឹងទៀតថា
កិច្ចពិភាក្សានេះ មានគោលបំណងបង្កើត ការសន្ទនាដោយផ្ទាល់រវាងស្ថាប័នរដ្ឋាភិបាល ស្ថានទូត សមាគមធុរកិច្ច និងសហគ្រាសនានា ដើម្បីជួយឱ្យធុរជនទទួលបានការយល់ដឹងដ៏ទូលំទូលាយ និងត្រឹមត្រូវអំពីស្ថានភាពជាក់ស្តែងក្នុងស្រុក ព្រមទាំងអនុញ្ញាតឱ្យពួកគេលើកឡើងពីតម្រូវការជាក់ស្តែងរបស់ខ្លួនពាក់ព័ន្ធនឹងគោលនយោបាយវិនិយោគ បរិយា​កាសធុរកិច្ច សេវាកម្មហិរញ្ញវត្ថុ ការគាំទ្រធនធានមនុស្ស និងការអនុលោមតាមច្បាប់។

លោក Zheng​ Xian Jiang បានសង្កត់ធ្ងន់ថា៖ «ទំនុកចិត្តកើតចេញពីស្ថិរភាព កិច្ចសហប្រតិបត្តិការកើតចេញពីការជឿទុកចិត្តគ្នាទៅវិញទៅមក ហើយការអភិវឌ្ឍពឹងផ្អែកលើការទំនាក់ទំនង។ សមាគមអភិវឌ្ឍន៍ពាណិជ្ជកម្មស៊ីឈួន ឆុងឈីង​កម្ពុជា នឹងបន្តដើរតួនាទីជាស្ពាន និងចំណុចតភ្ជាប់ ដើម្បីគាំទ្រដល់សមាជិក អ្នកវិនិយោគពង្រឹងការទំនាក់ទំនង និងកិច្ចសហប្រតិបត្តិការយ៉ាងល្អជាមួយស្ថាប័នរដ្ឋាភិបាល»។

លោក Zhao Haiyan ទីប្រឹក្សានៃស្ថានទូតចិនប្រចាំកម្ពុជា បានឱ្យដឹងថា សហគ្រាសចិន បានដើរតួនាទីយ៉ាងសកម្មជាយូរមកហើយក្នុងការអភិវឌ្ឍ ឧស្សាហកម្ម ហេដ្ឋារចនាសម្ព័ន្ធ ហិរញ្ញវត្ថុ កសិកម្ម និងសេវាកម្មដឹកជញ្ជូន។ល។  ដោយបានរួមចំណែកយ៉ាងសំខាន់ក្នុងការបង្កើតការងារ និងការបណ្តុះបណ្តាលធនធានមនុស្ស។ លោកបានអះអាងថា បច្ចុប្បន្ន កម្ពុជា ស្ថិតក្នុងដំណាក់កាលនៃការអភិវឌ្ឍយ៉ាងឆាប់រហ័ស និងការធ្វើទំនើបកម្មឧស្សាហកម្ម នោះមានសក្តានុពលដ៏ធំធេងសម្រាប់កិច្ចសហប្រតិបត្តិការជាក់ស្តែងរវាងចិន និងកម្ពុជា។ លោកបានសង្កត់ធ្ងន់លើសារៈសំខាន់នៃការទទួលបានការយល់ដឹងអំពីកម្ពុជាក្នុងលក្ខណៈ «ពិតប្រាកដ និងគ្រប់ជ្រុងជ្រោយ» ហើយបានសម្តែងក្តីសង្ឃឹមថា ស្ថាប័ន​​រដ្ឋាភិបាល ប្រព័ន្ធផ្សព្វផ្សាយ សមាគមធុរកិច្ច និងសហគ្រាសនានានឹងពង្រឹងការទំនាក់ទំនងជាមួយគ្នា។ លោកបានបញ្ជាក់ទៀតថា តាមរយៈការចែករំលែកព័ត៌មានដែលមានលក្ខណៈគោលបំណងច្បាស់លាស់ ត្រឹមត្រូវ និងប្រកបដោយការទទួលខុសត្រូវ ពួកគេអាចជំរុញការយល់ដឹងគ្នាទៅវិញទៅមក និងផ្តល់មូលដ្ឋានសម្រាប់ការវិនិច្ឆ័យផ្នែកធុរកិច្ច និងការសម្រេចចិត្តវិនិយោគប្រកបដោយភាពពិតប្រាកដ។

លោក Zhao Haiyan បានបន្ថែមទៀតថា ស្ថានទូតចិននឹងបន្តដើរតួនាទីជាស្ពានតភ្ជាប់ ដោយពង្រឹងការទំនាក់ទំនងជាមួយក្រសួងពាក់ព័ន្ធ ។ ទន្ទឺមនេះ ស្ថានទូតនៅតែបន្តប្តេជ្ញាចិត្តក្នុងការការពារសិទ្ធិ និងផលប្រយោជន៍ស្របច្បាប់របស់ពលរដ្ឋ និងសហគ្រាសចិនដើម្បីដោះស្រាយកង្វល់ផ្នែកធុរកិច្ចបានទាន់ពេលវេលា និងបន្តពង្រឹងកិច្ចសហប្រតិបត្តិការសេដ្ឋកិច្ច និងពាណិជ្ជកម្មរវាងចិន និងកម្ពុជា ឱ្យកាន់តែស៊ីជម្រៅ។

លោកជំទាវ ខា​ ឡេង រដ្ឋលេខាធិការក្រសួងពាណិជ្ជកម្ម បានគូសបញ្ជាក់ពីការប្តេជ្ញាចិត្តរបស់កម្ពុជា ចំពោះគោលនយោបាយពាណិជ្ជកម្មបើកចំហ និងការចូលរួមយ៉ាងសកម្មក្នុងយន្តការសហប្រតិបត្តិការនានា ដូចជាភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) និងកិច្ចព្រមព្រៀងពាណិជ្ជកម្មសេរីកម្ពុជា-ចិន។ លោកជំទាវបានជំរុញឱ្យសហគ្រាសនានាប្រើប្រាស់ឱកាសឱ្យបានពេញលេញទាក់ទងនឹងពន្ធគយ ការចូលទៅកាន់ទីផ្សារនិងខ្សែសង្វាក់ផ្គត់ផ្គង់ក្នុងតំបន់ ដែលផ្តល់ជូនដោយកិច្ចព្រមព្រៀងពាណិជ្ជកម្មសេរីទាំងនេះ ព្រមទាំងស្វែងយល់ឱ្យបានច្បាស់លាស់អំពីវិធានដើមកំណើតទំនិញ និងនីតិវិធីរដ្ឋបាលពាក់ព័ន្ធ។

 ឯកឧត្តម យុន ហេង អគ្គលេខាធិការរងគណៈកម្មាធិការវិនិយោគកម្ពុជា​ បានចាត់ទុកកិច្ចពិភាក្សានេះបានផ្តល់នូវវេទិកាមួយសម្រាប់ភាគីពាក់ព័ន្ធក្នុងការស្វែងយល់អំពីគោលនយោបាយ និងបរិយាកាសវិនិយោគរបស់កម្ពុជា វិនិយោគិនចិនគឺជាប្រភពដ៏សំខាន់នៃការវិនិយោគសម្រាប់កម្ពុជា អស់រយៈពេលជាយូរមកហើយ។ ឯកឧត្ដមបានបញ្ជាក់ផងដែរថា ការវិនិយោគបានគ្របដណ្តប់លើវិស័យនានាដូចជា ការផលិតឧបករណ៍អគ្គិសនី ការផលិតសំបកកង់យានយន្ត ការដំឡើងរថយន្ត និងការអភិវឌ្ឍតំបន់សេដ្ឋកិច្ចពិសេស ព្រមទាំងគម្រោងហេដ្ឋារចនាសម្ព័ន្ធធំៗដូចជា ហេដ្ឋារចនាសម្ព័ន្ធថាមពល និងផ្លូវល្បឿនលឿន ដែលដើរតួនាទីយ៉ាងសំខាន់ក្នុងការជំរុញកំណើនសេដ្ឋកិច្ចនិងការអភិវឌ្ឍឧស្សាហកម្មរបស់កម្ពុជា​។

ឯកឧត្តម សំបូរ វណ្ណារិទ្ធ អនុរដ្ឋលេខាធិការក្រសួងព័ត៌មាន បានមានប្រសាសន៍ថា នៅក្នុងយុគសម័យអ៊ីនធឺណិត និងបណ្តាញសង្គម ព័ត៌មានអាចចេញផ្សព្វផ្សាយបានយ៉ាងលឿន ប៉ុន្តែល្បឿនមិនអាចជំនួសភាពត្រឹមត្រូវបានឡើយ។ ព័ត៌មានពាក់ព័ន្ធនឹងគោលនយោបាយរបស់រដ្ឋាភិបាល បរិយាកាសវិនិយោគ សុវត្ថិភាពសាធារណៈ និងសកម្មភាពអាជីវកម្ម ប្រព័ន្ធផ្សព្វផ្សាយ ត្រូវពិនិត្យផ្ទៀងផ្ទាត់ពេលវេលា ទីតាំង ទិន្នន័យ និងប្រភពនៃរូបភាព និងវីដេអូឱ្យបានហ្មត់ចត់ ហើយខិតខំសម្រេចឱ្យបាននូវយុទ្ធនាការ "និយាយទេចំពោះព័ត៌មានក្លែងក្លាយ"។ ឯកឧត្ដមបញ្ជាក់ថា ការផ្ទៀងផ្ទាត់ព័ត៌មានដែលមិនទាន់បានបញ្ជាក់ និងខ្លឹមសារដែលបង្កើត ឬកែសម្រួលដោយបញ្ញាសិប្បនិម្មិត (AI) ហើយត្រូវកែតម្រូវកំហុសឆ្គងឱ្យបានទាន់ពេលវេលានៅពេលរកឃើញ។ ឯកឧត្ដមបានសង្កត់ធ្ងន់ថា៖ «ក្រសួងមានឆន្ទៈពង្រឹងការទំនាក់ទំនងជាមួយស្ថាប័នរដ្ឋ សមាគមធុរកិច្ច និងស្ថាប័នសារព័ត៌មានស្របច្បាប់ ដើម្បីបង្កើតបណ្តាញទំនាក់ទំនងកាន់តែរលូនសម្រាប់ការសាកសួរព័ត៌មាន និងការផ្ទៀងផ្ទាត់ការពិត។  ក្រសួងព័ត៌មានស្វាគមន៍កិច្ចសហប្រតិបត្តិការប្រកបដោយវិជ្ជាជីវៈរវាងស្ថាប័នសារព័ត៌មានភាសាចិន និងភាសាខ្មែរ ដើម្បីផ្សព្វផ្សាយរឿងរ៉ាវអំពីការអភិវឌ្ឍរបស់កម្ពុជា និងកិច្ចសហប្រតិបត្តិការផ្តល់ផលប្រយោជន៍ទៅវិញទៅមករវាងកម្ពុជានិងចិន។»

ទាក់ទងនឹងការវិនិយោគនេះដែរ លោក ហ៊ូ ជៀនហៃ (Hu Jianhai) អនុប្រធាន និងជាអគ្គលេខាធិការរងនៃសភាពាណិជ្ជកម្មចិនប្រចាំកម្ពុជា បានលើកឡើងថា សភាពាណិជ្ជកម្មនឹងផ្តោតលើតម្រូវការជាក់ស្តែងរបស់ក្រុមហ៊ុននានា ដោយធ្វើការទំនាក់ទំនងគោលនយោបាយប្រកបដោយប្រសិទ្ធភាព ការសម្របសម្រួលការតភ្ជាប់ ដែលជួយឱ្យក្រុមហ៊ុនអាចបញ្ចេញមតិអំពីការលំបាក និងសំណូមពររបស់ខ្លួន។ លោកបានបន្ដថា ពាក់ព័ន្ធនឹងបញ្ហាឆ្លងស្ថាប័ន សភាពាណិជ្ជកម្ម នឹងជួយក្រុមហ៊ុនក្នុងការរៀបចំឯកសារ និងសម្របសម្រួលការទំនាក់ទំនង ហើយសភាពាណិជ្ជកម្មនឹងពង្រឹងកិច្ចសហប្រតិបត្តិការជាមួយសភាពាណិជ្ជកម្មក្នុងស្រុក និងសភាពាណិជ្ជកម្មតាមវិស័យ ក៏ដូចជាស្ថាប័នហិរញ្ញវត្ថុ ដើម្បីជំរុញការចែករំលែកព័ត៌មាន ការផ្គូផ្គងតម្រូវការ និងការផ្គត់ផ្គង់ និងការផ្តល់សេវាកម្មផ្នែកច្បាប់ ក្នុងគោលបំណងគាំទ្រដល់កំណើនរបស់ក្រុមហ៊ុនជាសមាជិក។

ចំណែក លោក Dong Guiyuan អនុប្រធានគ្រប់គ្រងទូទៅនៃធនាគារ អាយស៊ីប៊ីស៊ី (ICBC) សាខាភ្នំពេញ បានកត់សម្គាល់ថា នៅពេលដែលកិច្ចសហប្រតិបត្តិការសេដ្ឋកិច្ច និងពាណិជ្ជកម្មរវាងចិន និងកម្ពុជា កាន់តែស៊ីជម្រៅ តម្រូវការរបស់សហគ្រាសសម្រាប់សេវាកម្មទូទាត់ឆ្លងដែន ហិរញ្ញប្បទានពាណិជ្ជកម្ម ហិរញ្ញប្បទានគម្រោង និងការគ្រប់គ្រងហិរញ្ញវត្ថុ កាន់តែមានភាពចម្រុះ។ លោកបានបញ្ជក់ឱ្យដឹងថា សហគ្រាសគួរតែរៀបចំផែនការហិរញ្ញវត្ថុជាមុន និងគ្រប់គ្រងដើមទុន បំណុល និងលំហូរសាច់ប្រាក់ដោយប្រុងប្រយ័ត្ន។ លោកបានបញ្ជាក់បន្ថែមថា៖ «ពួកគេគួរតែបង្កើនប្រសិទ្ធភាពនៃការប្រើប្រាស់ដើមទុន តាមរយៈការគ្រប់គ្រងគណនី និងឧបករណ៍ហិរញ្ញវត្ថុដែលមានស្តង់ដារ ដូចជាការទូទាត់ឆ្លងដែន លិខិតឥណទាន (Letters of Credit) និងការធានាផ្សេងៗ ព្រមទាំងពង្រឹងការគ្រប់គ្រងហានិភ័យទាក់ទងនឹងអត្រាប្តូរប្រាក់ អត្រាការប្រាក់ និងខ្សែសង្វាក់ផ្គត់ផ្គង់»។

សូមជម្រាបជូនថា កិច្ចពិភាក្សាបានលើកឡើងលើប្រធានបទជាច្រើន រួមមាន ទិសដៅវិនិយោគ និងសេវាកម្មអនុវត្តគម្រោង យន្តការសម្របសម្រួលរវាងស្ថាប័ន ការសម្រួលពាណិជ្ជកម្ម ការអភិវឌ្ឍឧស្សាហកម្មក្នុងស្រុក និងការផ្សព្វផ្សាយគោលនយោបាយ ការផ្សព្វផ្សាយព័ត៌មានផ្លូវការ និងការតភ្ជាប់ទំនាក់ទំនងអន្តរជាតិ យន្តការផ្ទៀងផ្ទាត់ព័ត៌មាន និងការបង្ការហានិភ័យ និងបរិយាកាសធុរកិច្ច ដោយបានផ្តល់ការពន្យល់ផ្អែកលើគោលនយោបាយពាក់ព័ន្ធ និងស្ថានភាពជាក់ស្តែង។ល៕

ដោយ៖ រិទ្ធី