AKP ប៉េកាំង, ប្រទេសចិន ថ្ងៃទី២១ ខែកញ្ញា ឆ្នាំ២០២៦ – នៅក្នុងវគ្គបណ្តុះបណ្តាលអន្តរជាតិដ៏សំខាន់ស្តីពី " ប្រព័ន្ធផ្សព្វផ្សាយថ្មី ដើម្បីជំរុញការអភិវឌ្ឍវិស័យឧស្សាហកម្មប្រកបដោយគុណភាពខ្ពស់សម្រាប់បណ្តាប្រទេសអាស៊ាន" ដែលបានប្រព្រឹត្តិទៅកាលពីថ្ងៃទី ១៩ ខែកញ្ញា ឆ្នាំ២０២៦ នៅទីក្រុងប៉េកាំង ប្រទេសចិន កញ្ញា Li Fangni ដែលជាអ្នកមានឥទ្ធិពលលើបណ្តាញសង្គម (Influencer) និងជាអ្នកពហុជំនាញ បានធ្វើបទបង្ហាញពីបទពិសោធន៍ និងចំណេះដឹងដ៏ទូលំទូលាយលើវិស័យសារព័ត៌មាននៅក្នុងយុគសម័យឌីជីថល។

សម្រាប់បទពិសោធន៍ជាង ១៤ ឆ្នាំនៅក្នុងវិស័យផ្សាយផ្ទាល់ (On-air broadcasting) ទាំងក្នុង និងក្រៅប្រទេស និងធ្លាប់បានបម្រើការងារនៅស្ថាប័នព័ត៌មានលំដាប់អន្តរជាតិធំៗជាច្រើន រួមមាន CCTV, Xinhua News Agency និង Fox Sports ជាដើមនោះ កញ្ញា Li Fangni បានផ្តោតខ្លឹមសារបទបង្ហាញទាំងមូលថា "Stop reporting the event. Start reporting the meaning." (ឈប់រាយការណ៍ត្រឹមតែព្រឹត្តិការណ៍ ដោយចាប់ផ្តើមរាយការណ៍អំពីអត្ថន័យនៃព្រឹត្តិការណ៍នោះ)។ នេះគឺជាការអំពាវនាវឱ្យមានការផ្លាស់ប្តូរទស្សនវិស័យនៅក្នុងវិស័យសារព័ត៌មាន។ 

អ្នកជំនាញ និងជាសាស្ត្រាចារ្យ បណ្ឌិត (Ph.D.) ផ្នែកវិទ្យាសាស្ត្រកីឡា (Sports Science) ព្រមទាំងជាសមាជិកក្រុមអ្នកស្រាវជ្រាវនៅសាលាអន្តរជាតិទំនាក់ទំនងនៃវិទ្យាស្ថាន CUC (Communication University of China) រូបនេះបានពន្យល់យ៉ាងច្បាស់អំពីភាពខុសគ្នានៃវិធីសាស្ត្រទាំងពីរនេះ៖ ១. ការរាយការណ៍អំពីព្រឹត្តិការណ៍ (Reporting the Event): វិធីសាស្ត្របែបប្រពៃណីនេះ ផ្តោតតែលើសំណួរថា "តើមានអ្វីកើតឡើង?" (what happened?)។ ទោះបីជាព័ត៌មាននេះមានលក្ខណៈពិត និងពេញលេញក៏ដោយ ប៉ុន្តែកញ្ញាបានសង្កត់ធ្ងន់ថា វាមិនមានអ្វីទាក់ទាញអារម្មណ៍អ្នកអានទេ ហើយជារឿយៗត្រូវបានគេចាត់ទុកថាជាព័ត៌មានដែល"អាចបំភ្លេចបាន" (forgettable)។ ជាលទ្ធផល ព័ត៌មានប្រភេទនេះប្រហែលជាមិនមានអ្នកអានក្រៅពីចំណងជើងនោះទេ។ ២. ការរាយការណ៍អំពីអត្ថន័យ (Reporting the Meaning): នេះគឺជាទស្សនវិស័យដែលអ្នកសារព័ត៌មានដែលមានវិជ្ជាជីវៈខ្ពស់ត្រូវអនុវត្ត និងមានប្រសិទ្ធភាព។ ការរាយការណ៍ប្រភេទនេះឆ្លើយសំណួរថា "ហេតុអ្វីបានជាវាសំខាន់?" (why it matters?)។ វាទាមទារឱ្យអ្នកសារព័ត៌មាន ភ្ជាប់ព្រឹត្តិការណ៍ទៅនឹង ចំណែកពាក់ព័ន្ធនឹងមនុស្ស (human stake) ដែលធ្វើឱ្យព័ត៌មានកាន់តែមានអត្ថន័យ, ក្តុកក្តួល, និងទាក់ទាញចំណាប់អារម្មណ៍របស់ទស្សនិកជនគ្រប់ស្រទាប់។

តាមរយៈបទបង្ហាញរបស់កញ្ញា Li Fangni សិក្ខាកាមមកពីបណ្តាប្រទេសអាស៊ានទទួលបានការរម្លឹកដ៏សំខាន់មួយថា វិជ្ជាជីវៈសារព័ត៌មានមិនមែនគ្រាន់តែជាការងារបច្ចេកទេសនៃការបញ្ជូនព័ត៌មានបន្តនោះទេ ប៉ុន្តែ គោលដៅពិតប្រាកដគឺការបង្កើត និងបញ្ចូលរឿងរ៉ាវដែលផ្តល់បរិបទ បញ្ហា និងដំណោះស្រាយ ដែលជួយឱ្យសង្គមយល់ដឹងពីពិភពលោកកាន់តែច្បាស់ ដើម្បីជំរុញការយល់ដឹង និងការចូលរួមរបស់សាធារណជនឱ្យកាន់តែទូលំទូលាយ។ កញ្ញាបានបន្ថែមថា ការផ្លាស់ប្តូរនេះ គឺជាគន្លឹះសម្រាប់អនាគតនៃវិស័យសារព័ត៌មានដែលមានគុណភាពខ្ពស់នៅក្នុងតំបន់។

សូមបញ្ជាក់ថា វគ្គបណ្តុះបណ្តាលនេះធ្វើឡើងក្រោមការឧបត្ថម្ភពីក្រសួងពាណិជ្ជកម្មចិន, ដឹកនាំសម្របសម្រួលដោយអគ្គនាយកដ្ឋានវិទ្យុ និងទូរទស្សន៍ជាតិចិន (NRTA), និងរៀបចំដោយក្រុមហ៊ុន China Broadcasting International Economic and Technical Cooperation Co., Ltd. (CBIC)៕

ដោយ៖ ទូច វលក្ខ័ណ