AKP ភ្នំពេញ ថ្ងៃទី២០ ខែកញ្ញា ឆ្នាំ២០២៦--តាមរយៈភាពជាដៃគូជាមួយ ក្រុមហ៊ុន ស្មាត អាស្យាតា ( Smart Axiata ) អាជ្ញាធរមូលដ្ឋាន និង មជ្ឈមណ្ឌលសកម្មភាពកំចាត់មីនកម្ពុជា-CMAC អង្គការទស្សនៈពិភពលោកអន្តរជាតិ ប្រចាំកម្ពុជា World Vision បានសហការគ្នាដំឡើងផ្ទាំងប៉ាណូចំណេះដឹងអំពីគ្រាប់មិនទាន់ផ្ទុះ (UXO) នៅតាមទីតាំងសំខាន់ៗក្នុងស្រុកជាំក្សាន្ត ខេត្តព្រះវិហារ ដើម្បីបង្កើនការយល់ដឹង និងលើកកម្ពស់សុវត្ថិភាពសហគមន៍។ 

មន្ត្រីរអង្គការ World Vision បានឱ្យដឹងនៅថ្ងៃទី១៩ ខែកញ្ញា ឆ្នាំ២០២៦នេះថា កិច្ចសហការនេះជាផ្នែកមួយនៃ គម្រោងគាំទ្រ និងស្តារឡើងវិញសម្រាប់ប្រជាជនកម្ពុជា របស់ Smart ដែលឆ្លុះបញ្ចាំងពីការប្តេជ្ញាចិត្តក្នុងការចូលរួមស្តារឡើងវិញរយៈពេលវែង ដើម្បីជួយសហគមន៍ និងគ្រួសារកម្ពុជាដែលរងផលប៉ះពាល់ដោយសារជម្លោះព្រំដែន ឱ្យមានជីវភាពរស់នៅល្អប្រសើរឡើងវិញ ។ ផ្ទាំងប៉ាណូទាំងនេះត្រូវបានដាក់នៅតំបន់ដែលមានមនុស្សធ្វើដំណើរឆ្លងកាត់ជាញឹកញាប់ ដើម្បីធានាថា សារក្នុងការការពារសុវត្ថិភាព អាចត្រូវបានមើលឃើញ យល់ដឹង និងចងចាំបានយ៉ាងទូលំទូលាយ។ តាមរយៈការផ្សព្វផ្សាយព័ត៌មានសំខាន់ៗអំពីហានិភ័យនៃគ្រាប់មិនទាន់ផ្ទុះ យើងចូលរួមចំណែកក្នុងការការពារសុវត្ថិភាពប្រជាពលរដ្ឋ ជាពិសេសកុមារ ពីគ្រោះថ្នាក់ដែលអាចកើតមាន។

បន្ថែមពីលើផ្ទាំងប៉ាណូទាំងនេះ យុវជនស្ម័គ្រចិត្ត និងអ្នកសម្របសម្រួលសហគមន៍របស់យើងកំពុងបន្តការចុះផ្សព្វផ្សាយយ៉ាងសកម្ម ដើម្បីចែករំលែកចំណេះដឹង បង្កើនភាពធន់របស់សហគមន៍ ការពារក្រុមគ្រួសារ និងរួមកសាងអនាគតដែលមានសុវត្ថិភាពសម្រាប់កុមារ និងមនុស្សគ្រប់រូប ៕

ដោយ ណយ នឿន (ប្រភព៖World Vision)