AKPភ្នំពេញថ្ងៃទី១៨ ខែ កញ្ញា ឆ្នាំ ២០២៦---

ត្រីរាជខ្នាតយក្សប្រវែង ២,៣ ម៉ែត្រ និងទម្ងន់ ១៣០ គីឡូក្រាម ត្រូវបានប្រជានេសាទនៅស្រុកពួក ខេត្តសៀមរាប ដោះលែងចូលទៅក្នុងដែនទឹកធម្មជាតិវិញកាលពីថ្ងៃទី១៧ ខែកញ្ញា ឆ្នាំ ២០២៦  បន្ទាប់ពីនេសាទជាប់ដោយអចេតនា។

ក្រសួងកសិកម្មបានលើកឡើងថាព្រឹត្តិការណ៍នេះ ឆ្លុះបញ្ចាំងពីកិច្ចសហការយ៉ាងជិតស្និទ្ធ និងប្រកបដោយប្រសិទ្ធ ភាព រវាងប្រជានេសាទ មន្ត្រីរដ្ឋបាលជលផល និងគម្រោងអច្ឆរិយភាពនៃទន្លេមេគង្គ ក្នុងការរួមគ្នាអភិរក្សប្រភេទត្រីទឹកសាបជិតផុតពូជខ្លាំងកម្រិតពិភពលោក។

ក្រសួងកសិកម្មបានឱ្យដឹងដែរថានាពេលកន្លងមក ការងារសង្គ្រោះត្រីរាជទទួលបានលទ្ធផលជាបន្តបន្ទាប់ រួមមានការលែងចំនួន ២៦ ក្បាល ក្នុង អំឡុងឆ្នាំ២០២៣-២០២៤, ចំនួន ៥ ក្បាល ក្នុងឆ្នាំ២០២៥ និង ១ ក្បាលទៀត (ឈ្មោះ «រំដួលកងមាស») ដែលត្រូវបានប្រជានេសាទប្រទះឃើញជាប់ម៉ងដោយអចេតនា ឃុំរកាកោយ ស្រុកកងមាស ខេត្តកំពង់ចាម ហើយត្រូវបានបំពាក់ស្លាកលេខ (Code 039) មុននឹងលែងចូលទន្លេមេគង្គវិញ។

ជាមួយគ្នានេះក្រសួងចាត់ទុកថាសកម្ម ភាពដោះលែងជាបន្តបន្ទាប់នេះ បញ្ជាក់យ៉ាងច្បាស់ពីការប្រែប្រួលឥរិយាបថ និងការយល់ដឹងកាន់តែខ្ពស់របស់ប្រជានេសាទ ក្នុងការរួមគ្នារក្សាការពារធនធា នជលផលកម្រ និងបេតិកភណ្ឌធម្មជាតិសម្រាប់កូនចៅជំនាន់ក្រោយ។

សូមបញ្ជាក់ថាត្រីរាជជាប្រភេទត្រីទឹកសាប ដែលចូលចិត្តរស់នៅតាមបឹងទន្លេសាប និងតំបន់មេគង្គលើ ជាពិសេសតាមអន្លង់នៅក្នុងទន្លេមេគង្គ ក្នុងខេត្តក្រចេះ និងស្ទឹងត្រែង ។

ត្រីប្រភេទនេះត្រូវបានចាត់ថ្នាក់ក្នុងបញ្ជីក្រហម ជាត្រីកំពុងរងការគំរាមកំហែងយ៉ាងខ្លាំង ឈានទៅរកការផុតពូជ របស់អង្គការសហភាពអន្តរជាតិ ដើម្បីអភិរក្សធម្មជាតិ IUCN ៕

ដោយ៖មករា