AKP ភ្នំពេញ ថ្ងៃទី១៨ ខែកញ្ញា ឆ្នាំ២០២៦ -- មន្ត្រីក្នុងតំបន់ និងប្រជាពលរដ្ឋបានឱ្យដឹងកាលពីថ្ងៃពុធថា ចំនួនអ្នកស្លាប់ដោយសារការដួលរលំនៃអគារលំនៅដ្ឋានមួយនៅភាគខាងលិចទីក្រុងហ្គាហ្សា បានកើនឡើងដល់ ២១នាក់ដែលក្នុងនោះរួមមានកុមារ ១១នាក់ និងស្ត្រី ៦នាក់ ខណៈដែលមានមនុស្សជាង ២៥នាក់ទៀតបានរងរបួស។

លោក ម៉ាហ៍មូដ នាសាល់ (Mahmoud Basal) អ្នកនាំពាក្យផ្នែកការពារស៊ីវិលបានឱ្យដឹងថា អគារ Al-Saada ដែលមានកម្ពស់ ៦ជាន់ និងធ្លាប់រងការខូចខាតដោយសារការទម្លាក់គ្រាប់បែករបស់អ៊ីស្រាអែលពីមុនមកនោះបានដួលរលំកាលពីព្រឹកព្រលឹមថ្ងៃពុធ ក្បែរទីស្នាក់ការកណ្តាលរបស់ទីភ្នាក់ងារអង្គការសហប្រជាជាតិសម្រាប់ជនភៀសខ្លួនប៉ាឡេស្ទីន(UNRWA)។

ប្រជាពលរដ្ឋបាននិយាយថា អគារនេះគឺជាកន្លែងស្នាក់នៅរបស់ជនភៀសខ្លួនប្រហែល ១០០នាក់។

លោក បាសាល់ បាននិយាយថា ក្រុមជួយសង្គ្រោះបានជួយសង្គ្រោះមនុស្ស ៤៥នាក់ និងរកឃើញសាកសពចំនួន ២១នាក់ ក្នុងអំឡុងពេលប្រតិបត្តិការរយៈពេល ១៦ម៉ោង។ លោកបានបន្ថែមថា មនុស្ស ៣៥នាក់ផ្សេងទៀតបានរត់គេចខ្លួនរួច។

សាច់ញាតិជាច្រើននាក់ដែលកំពុងមានទុក្ខសោកបានប្រមូលផ្តុំគ្នានៅខាងក្រៅអគារដែលដួលរលំនោះ ដោយខ្លះបានប្រើដៃទទេរបស់ពួកគេដើម្បីជីកកកាយរកជនរងគ្រោះ។

អាជ្ញាធរប៉ាឡេស្ទីនបានចោទប្រកាន់អ៊ីស្រាអែលថាបានរឹតត្បិតការនាំចូលគ្រឿងចក្រធុនធ្ងន់ និងឧបករណ៍នានាដែលចាំបាច់សម្រាប់កិច្ចខិតខំប្រឹងប្រែងជួយសង្គ្រោះ។

ការិយាល័យប្រព័ន្ធផ្សព្វផ្សាយដែលគ្រប់គ្រងដោយក្រុមហាម៉ាស់(Hamas) នៅតំបន់ហ្គាហ្សា បានចេញសេចក្តីថ្លែងការណ៍មួយថា មនុស្សជាង ៨.៥០០នាក់ដែលបាត់ខ្លួននៅតែស្ថិតក្រោមគំនរបាក់បែកនៅទូទាំងតំបន់ហ្គាហ្សា ដោយសារតែការលំបាកក្នុងការនាំចូលគ្រឿងចក្រធុនធ្ងន់ និងឧបករណ៍ជួយសង្គ្រោះ ហើយការិយាល័យនេះបានហៅអគាររាប់ពាន់ខ្នងដែលរងការខូចខាតថាជា «គ្រាប់បែកពេលវេលា» (គ្រោះថ្នាក់ដែលអាចផ្ទុះឡើងគ្រប់ពេល)៕

ដោយ៖ មូល មិនា (ប្រភព៖ ស៊ីនហួ)