AKP ភ្នំពេញ ថ្ងៃទី១៨ ខែកញ្ញា ឆ្នាំ២០២៦ -- អាជ្ញាធរជាតិទទួលបន្ទុកការកាត់បន្ថយ និងគ្រប់គ្រងហានិភ័យគ្រោះមហន្តរាយបានឱ្យដឹងកាលពីថ្ងៃពុធថា ចំនួនអ្នកស្លាប់ដោយសារគ្រោះមហន្តរាយបាក់ដីដ៏ធ្ងន់ធ្ងរនៅក្នុងប្រទេសនេប៉ាល់ បានកើនឡើងដល់ ១.៤០៣នាក់ ខណៈដែលមនុស្សចំនួន៦.១៥០នាក់ផ្សេងទៀតនៅតែបន្តបាត់ខ្លួន។

សាកសពចំនួន ៤នាក់ និងផ្នែកមួយនៃសាកសពត្រូវបានគេរកឃើញនៅក្នុងផ្លូវរូងក្រោមដីនៃគម្រោងវារីអគ្គិសនី Chilime ក្នុងស្រុករ៉ាស៊ូវ៉ាកាលពីថ្ងៃពុធ ស្របពេលដែលប្រតិបត្តិការស្វែងរក និងជួយសង្គ្រោះនៅតែបន្តដំណើរការ។

យោងតាមរបាយការណ៍ចុងក្រោយរបស់អាជ្ញាធរបានឱ្យដឹងថាមនុស្សចំនួន ១៣.៧៤២នាក់ត្រូវបានជួយសង្គ្រោះរួចហើយគិតមកទល់ពេលនេះ។ បច្ចុប្បន្ននេះ មានមនុស្សសរុបចំនួន ២.០៩៦នាក់កំពុងស្នាក់នៅតាមមជ្ឈមណ្ឌលស្នាក់នៅបណ្តោះអាសន្នចំនួន ២៩កន្លែង នៅក្នុងស្រុករ៉ាស៊ូវ៉ា ស្រុកនូវ៉ាកូត និងស្រុកដាឌិង។

គ្រោះមហន្តរាយបាក់ដីនេះបានកើតឡើងនៅក្នុងស្រុកទាំងបីខាងលើកាលពីថ្ងៃទី២៦ ខែសីហា ដោយបានបង្កឱ្យមានការបាត់បង់ជីវិត និងការខូចខាតយ៉ាងធ្ងន់ធ្ងរដល់លំនៅឋាន ហេដ្ឋារចនាសម្ព័ន្ធ និងគម្រោងវារីអគ្គិសនីនានា៕

ដោយ៖ មូល មិនា (ប្រភព៖ ស៊ីនហួ)