AKP សៀមរាប ថ្ងៃទី១៨ ខែកញ្ញា ឆ្នាំ២០២៦ -- រដ្ឋមន្ត្រីក្រសួងទេសចរណ៍ អះអាងថា ការអភិវឌ្ឍជំនាញ និងការរៀនសូត្រពេញមួយជីវិត គឺជាផ្លូវដ៏សំខាន់សម្រាប់កសាងកម្លាំងពលកម្មទេសចរណ៍កម្ពុជាឱ្យមានសមត្ថភាព ស្តង់ដា និងភាពប្រកួតប្រជែង ខណៈរដ្ឋបាលខេត្តសៀមរាប ចាត់ទុកអ្នកមានជំនាញវិជ្ជាជីវៈថាជាកម្លាំងស្នូលក្នុងការអភិវឌ្ឍគ្រួសារ សហគមន៍ និងរួមចំណែកលើកកម្ពស់វិស័យទេសចរណ៍ប្រកបដោយចីរភាព។

ការលើកឡើងនេះធ្វើឡើងក្នុងពិធីបិទ «កម្មវិធីហាត់ការវិជ្ជាជីវៈតាមមូលដ្ឋានអាជីវកម្ម សម្រាប់ខេត្តគោលដៅរបស់កម្មវិធីអភិវឌ្ឍន៍ជំនាញ» នៅសាលាសណ្ឋាគារ និងទេសចរណ៍ ប៉ូល ឌុយប្រ៊ូល ខេត្តសៀមរាប កាលពីថ្ងៃទី១៧ ខែកញ្ញា ឆ្នាំ២០២៦។

ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិអ្នកជំនាញទេសចរណ៍មានប្រសាសន៍ថា ការអភិវឌ្ឍជំនាញមិនគួរបញ្ចប់ត្រឹមការបញ្ចប់វគ្គបណ្តុះបណ្តាលនោះទេ ប៉ុន្តែត្រូវបន្តរៀនសូត្រពេញមួយជីវិត ដើម្បីធ្វើបច្ចុប្បន្នភាពសមត្ថភាពឱ្យស្របតាមការវិវត្តរបស់ឧស្សាហកម្មទេសចរណ៍។ ឯកឧត្តមបញ្ជាក់ថា ក្រសួងកំពុងជំរុញការភ្ជាប់កម្មវិធីបណ្តុះបណ្តាល ហូកា (HoKa) ទៅកាន់ក្របខ័ណ្ឌគុណវុឌ្ឍិជាតិកម្ពុជា ដើម្បីឱ្យជំនាញ និងបទពិសោធន៍ការងារទទួលបានការទទួលស្គាល់ជាផ្លូវការ និងបង្កើតផ្លូវអាជីពច្បាស់លាស់សម្រាប់អ្នកជំនាញទេសចរណ៍។

ឯកឧត្តមរដ្ឋមន្ត្រីបានគូសបញ្ជាក់ថា «ពីជំនាញ ទៅសមត្ថភាព ពីសមត្ថភាព ទៅគុណវុឌ្ឍិ និងពីគុណវុឌ្ឍិ ទៅអាជីព» គឺជាផ្លូវដ៏សំខាន់ក្នុងការកសាងកម្លាំងពលកម្មទេសចរណ៍កម្ពុជា ដែលអាចរួមចំណែកដល់ការអភិវឌ្ឍវិស័យទេសចរណ៍ប្រកបដោយចីរភាព និងឆ្លើយតបទៅនឹងតម្រូវការទីផ្សារការងារ។

ជាមួយគ្នានេះ លោក ង៉ូវ សេងកាក់ អភិបាលរងខេត្តសៀមរាប មានប្រសាសន៍ថា ការអភិវឌ្ឍធនធានមនុស្សឱ្យមានចំណេះដឹង ជំនាញវិជ្ជាជីវៈ សមត្ថភាព និងសីលធម៌ការងារ គឺជាកត្តាចាំបាច់សម្រាប់ធានាគុណភាពសេវាកម្ម និងលើកកម្ពស់ការអភិវឌ្ឍវិស័យទេសចរណ៍ប្រកបដោយចីរភាព។ លោកបានលើកទឹកចិត្តឱ្យសិក្ខាកាមយកជំនាញដែលទទួលបានទៅប្រើប្រាស់ក្នុងការស្វែងរកការងារ បង្កើតមុខរបរ និងបង្កើនប្រាក់ចំណូល ដើម្បីក្លាយជាកម្លាំងស្នូលក្នុងការអភិវឌ្ឍគ្រួសារ សហគមន៍ និងសង្គមជាតិ។

សូមបញ្ជាក់ថា កម្មវិធីនេះរៀបចំឡើងដោយគណៈកម្មការគ្រប់គ្រងគម្រោងហូកា នៃក្រសួងទេសចរណ៍ សហការជាមួយអង្គការស្វីសខន់ថាក់ រដ្ឋបាលខេត្តសៀមរាប និងភាគីពាក់ព័ន្ធ។ គិតត្រឹមឆមាសទី១ ឆ្នាំ២០២៦ គម្រោងហូកា បានបណ្តុះបណ្តាល និងពង្រឹងសមត្ថភាពយុវជនក្រីក្រ និងងាយរងគ្រោះ អ្នកជំនាញកម្រិតទាប ម្ចាស់អាជីវកម្ម និងអ្នកគ្រប់គ្រងក្នុងវិស័យបដិសណ្ឋារកិច្ច សរុបជាង ៨.០០០នាក់៕

ដោយ ឃុត សៅ