AKP ភ្នំពេញ ថ្ងៃទី១៧ ខែកញ្ញា ឆ្នាំ២០២៦ -- មន្ត្រីកូរ៉េខាងត្បូង បានឱ្យដឹងកាលពីថ្ងៃពុធថា មន្ត្រីការទូតជាន់ខ្ពស់កូរ៉េខាងត្បូង និងសហរដ្ឋអាមេរិក មានគម្រោងជួបគ្នានៅទីក្រុងវ៉ាស៊ីនតោនក្នុងសប្តាហ៍នេះ ដោយការសន្យាវិនិយោគរបស់ទីក្រុងសេអ៊ូល និងតួនាទីរបស់ខ្លួនក្នុងការធានាសុវត្ថិភាពនៅច្រកសមុទ្រហ័រមូស (Strait of Hormuz) ទំនងជានឹងក្លាយជាប្រធានបទសំខាន់ៗនៅក្នុងរបៀបវារៈនៃកិច្ចប្រជុំនេះ។

យោងតាមក្រសួងការបរទេសកូរ៉េខាងត្បូង បានឱ្យដឹងថា រដ្ឋមន្ត្រីការបរទេស លោក ចូ យ៉ុន (Cho Hyun) មានគម្រោងទៅបំពេញទស្សនកិច្ចនៅទីក្រុងវ៉ាស៊ីនតោនចាប់ពីថ្ងៃព្រហស្បតិ៍ដល់ថ្ងៃសៅរ៍ហើយនឹងជួបពិភាក្សាជាមួយរដ្ឋមន្ត្រីការបរទេសសហរដ្ឋអាមេរិក លោក ម៉ាកូ រូប៊ីអូ (Marco Rubio) នៅថ្ងៃសុក្រ (ម៉ោងនៅសហរដ្ឋអាមេរិក)។

ក្រសួងបានបញ្ជាក់នៅក្នុងសេចក្តីថ្លែងការណ៍មួយថា៖ «ភាគីទាំងពីរនឹងពិភាក្សាលើបញ្ហាជាច្រើន រួមទាំងទំនាក់ទំនងរវាងប្រទេសកូរ៉េខាងត្បូង និងសហរដ្ឋអាមេរិក ស្ថានភាពនៅឧបទ្វីបកូរ៉េ និងបញ្ហាក្នុងតំបន់ និងពិភពលោក»។

កិច្ចប្រជុំនេះនឹងក្លាយជាការជួបពិភាក្សាទ្វេភាគីជាផ្លូវការដោយផ្ទាល់លើកដំបូងរវាងលោក ចូ និងលោក រូប៊ីអូ ចាប់តាំងពីខែកុម្ភៈមក។ មន្ត្រីការទូតជាន់ខ្ពស់ទាំងពីរធ្លាប់បានជួបសន្ទនាគ្នាដោយសង្ខេបនៅទីក្រុងម៉ានីលកាលពីខែកក្កដា អំឡុងពេលនៃកិច្ចប្រជុំពាក់ព័ន្ធនឹងអាស៊ាន (ASEAN)។

នៅក្នុងការសន្ទនាតាមទូរស័ព្ទកាលពីចុងខែមុន មន្ត្រីការទូតទាំងពីរបានឯកភាពគ្នាជួបដោយផ្ទាល់ «នៅពេលដ៏ខ្លីខាងមុខ» និងបន្តរក្សាទំនាក់ទំនងនិងកិច្ចសហប្រតិបត្តិការយ៉ាងជិតស្និទ្ធលើបញ្ហាសំខាន់ៗ រួមទាំងកិច្ចសហប្រតិបត្តិការសេដ្ឋកិច្ច បញ្ហានុយក្លេអ៊ែរកូរ៉េខាងជើង និងវិបត្តិនៅតំបន់មជ្ឈិមបូព៌ា៕

ដោយ៖ មូល មិនា (ប្រភព៖ យ៉ុនហាប់)