AKP កំពង់ធំ ថ្ងៃទី១៧ ខែកញ្ញា ឆ្នាំ២០២៦ -- លោក អ៊ុន បុត្ត អភិបាលរងខេត្តកំពង់ធំ បានជំរុញឱ្យភាគីពាក់ព័ន្ធបង្កើនកិច្ចសហការចំពោះវិធានការការពារសន្តិសុខសុវត្ថិភាពសណ្ដាប់ធ្នាប់សាធារណៈសម្រាប់ការពិនិត្យបញ្ជីឈ្មោះ និងចុះឈ្មោះបោះឆ្នោតឆ្នាំ២០២៦។

លោក អ៊ុន បុត្ត បានជំរុញដូចនេះក្នុងកម្មវិធីកិច្ចសហការនិងវិធានការ ការពារសន្តិសុខសុវត្ថិភាពនិងសណ្ដាប់ធ្នាប់សាធារណៈ សម្រាប់ពិនិត្យបញ្ជីឈ្មោះនិងការចុះឈ្មោះបោះឆ្នោតឆ្នាំ២០២៦ដែលរៀបចំឡើងនៅលេខាធិការដ្ឋានរៀបចំការបោះឆ្នោតខេត្តកំពង់ធំ កាលពីថ្ងៃទី១៦ ខែកញ្ញា ឆ្នាំ២០២៦។

‎លោក អ៊ុន បុត្ត បានបញ្ជាក់ថា ផ្អែកតាមរបាយការណ៍សង្ខេបរបស់លេខាធិការដ្ឋានរៀបចំការបោះឆ្នោតខេត្តកំពង់ធំ ការពិនិត្យបញ្ជីឈ្មោះ ការចុះឈ្មោះបោះឆ្នោត និងការផ្ដល់សុពលភាព លើបញ្ជីបោះឆ្នោតឆ្នាំ២០២៦ និងចាប់ផ្ដើមចាប់ពីថ្ងៃទី៧ ខែតុលា ឆ្នាំ២០២៦ រហូតដល់ថ្ងៃទី១២ ខែកុម្ភៈ ឆ្នាំ២០២៧។ រីឯការពិនិត្យបញ្ជីឈ្មោះ និងការចុះឈ្មោះបោះឆ្នោតនៅតាមឃុំសង្កាត់ទូទាំងប្រទេសមានរយៈពេល៥៥ថ្ងៃ នឹងត្រូវអនុវត្តន៍ចាប់ពីថ្ងៃទី៧ ខែតុលា ដល់ថ្ងៃទី៣០ ខែវិច្ឆិកា ឆ្នាំ២០២៦។

លោកបានស្នើសុំឱ្យលេខាធិការដ្ឋានរៀបចំការបោះឆ្នោតខេត្តកំពង់ធំ និងគ្រប់ភាគីពាក់ព័ន្ធទាំងអស់សូមផ្ដល់នូវកិច្ចសហការឱ្យបានល្អទៅវិញទៅមក ដោយមានការយោគយល់គ្នា ប្រកបដោយភាតរភាពក្នុងនាមជាខ្មែរតែមួយ។ ដើម្បីឱ្យដំណើរការនៃការពិនិត្យ បញ្ជីឈ្មោះនិងការចុះឈ្មោះបោះឆ្នោត ប្រព្រឹត្តទៅបានដោយត្រឹមត្រូវ និងស្មើភាពមិនមានការរើសអើងការបំភិតបំភ័យ ការគំម្រាមកំហែង និងអំពើហិង្សាកើតឡើងណាមួយនោះឡើយ។ ម្យ៉ាងវិញទៀត អាជ្ញាធរនិងរដ្ឋបាលសាធារណៈកងកម្លាំងប្រដាប់អាវុធគ្រប់ថ្នាក់ សូមប្រកាន់នូវជំហរអព្យាក្រឹត្យឥតលំអៀងក្នុងការដោះស្រាយនូវកិច្ចការរដ្ឋបាល ជូនទៅដល់គ្រប់គណបក្សនយោបាយ។

លោកបានស្នើសុំឱ្យគ្រប់គណបក្សនយោបាយ និងសមាគមអង្គការមិនមែនរដ្ឋាភិបាលទាំងអស់ដែលកំពុងតែធ្វើសកម្មភាពនៅក្នុងខេត្តកំពង់ធំ ត្រូវតែគោរពច្បាប់ បទបញ្ជានីតិវិធី និងប្រកាន់ខ្ជាប់នៅក្រមសីលធម៌របស់ខ្លួនប្រកបដោយអាកប្បកិរិយាថ្លៃថ្នូរ ដោយមិនត្រូវញុះញង់អ្នកគាំទ្រឱ្យប្រព្រឹត្តនូវអំពើហិង្សាទៅលើប្រជាពលរដ្ឋ ឬអ្នកគាំទ្រគណបក្សដទៃនោះឡើយ។

‎សូមបញ្ជាក់ថា នៅក្នុងកិច្ចប្រជុំនេះមានការអញ្ជើញចូលរួមពីតំណាងគណបក្សនយោបាយចំនួន៨រួមមាន៖ គណបក្សប្រជាជនកម្ពុជា, គណបក្សហ្វ៊ុនស៊ិនប៉ិច, គណបក្សកម្លាំងជាតិ, គណបក្សខ្មែររួបរួមជាតិ, គណបក្សសញ្ជាតិកម្ពុជា, គណបក្សឆន្ទៈខ្មែរ, គណបក្សជំនាន់ថ្មី និងគណបក្សកែទម្រង់កម្ពុជា៕

ដោយ ស៊ុម វណ្ណា