AKP កំពង់ឆ្នាំ ថ្ងៃទី១៧ ខែកញ្ញា ឆ្នាំ២០២៦ -- សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានថ្លែងអំណរគុណ និងវាយតម្លៃខ្ពស់ចំពោះក្រុមប្រឹក្សាភិបាល និងថ្នាក់ដឹកនាំក្រុមហ៊ុន ធីអេច អូតូម៉ូធីវ មេនូហ្វេកឆឺរីង ដែលបានមើលឃើញពីសក្តានុពលពិតប្រាកដរបស់កម្ពុជា តាមរយៈការសម្រេចចិត្តបោះទុនវិនិយោគសរុបចំនួន ២០លានដុល្លារអាម៉េរិក ដើម្បីបង្កើតរោងចក្រផ្គុំដំឡើងរថយន្តម៉ាក GAC ក្នុងខេត្តកំពង់ឆ្នាំង។ ការលើកឡើងរបស់សម្តេចនាយករដ្ឋមន្ត្រីបែបនេះ ក្នុងពិធីសម្ពោធដាក់ឱ្យដំណើរការជាផ្លូវការរោងចក្រផ្គុំ និងដំឡើងរថយន្តរបស់ក្រុមហ៊ុន ធីអេច អូតូម៉ូធីវ មេនូហ្វេកឆឺរីង និងខ្សែសង្វាក់ផលិតកម្មរថយន្តម៉ាក GAC ស្ថិតក្នុងស្រុកកំពង់ត្រឡាច ខេត្តកំពង់ឆ្នាំង នាព្រឹកថ្ងៃទី១៧ ខែកញ្ញា ឆ្នាំ២០២៦។

ក្នុងឱកាសនេះ សម្តេចធិបតី ហ៊ុន ម៉ាណែត បានបង្ហាញនូវក្តីសោមនស្សរីករាយចំពោះដំណឹងដែលថា ក្រុមហ៊ុនខាងលើក្រៅពីបង្កើតរោងចក្រផ្គុំដំឡើងរថយន្តរបស់ប្រទេសចិន ម៉ាក GAC ហើយនោះ ក្រុមហ៊ុនក៏នឹងមានរោងចក្រមួយទៀតគឺផ្គុំដំឡើងរថយន្តរបស់សហរដ្ឋអាមេរិកម៉ាក Chevrolet ដែលវាប្រៀបបាននឹងមហាអំណាចពីរផ្សេងគ្នាជាដៃគូរបស់ក្រុមហ៊ុន។ សម្តេចធិបតីបានចូលរួមអបអរសាទរជូនអ្នកខត្តកំពង់ឆ្នាំង ដែលប្រែក្លាយពីខេត្តមួយដែលគេហៅថា ខេត្តគេទៅហួសមកហួសកាលពី១០-២០ឆ្នាំមុន ដោយខេត្តកំពង់ឆ្នាំង និងពោធិ៍សាត់គេទៅហួសមកហួស ប៉ុន្តែខេត្តទាំងពីរនេះ គឺខេត្តពោធិ៍សាត់ ជាពិសេសខេត្តកំពង់ឆ្នាំងបានក្លាយទៅជាខេត្តដែលមានសក្តានុពលធំ និងកំពុងតែពង្រីកខ្លួននៅក្នុងវិស័យឧស្សាហកម្មនាពេលបច្ចុប្បន្ន។ សម្តេចធិបតីនាយករដ្ឋមន្រ្ដីក៏បានអរគុណដល់ថ្នាក់ដឹកនាំខេត្តកំពង់ឆ្នាំង ជាពិសេសអភិបាលខេត្តចំពោះការខិតខំប្រឹងប្រែង ឈ្មុសឈ្មុល គិតគូរពីរឿងការប្រែក្លាយកន្លែងខ្លះពីប្រភេទសេដ្ឋកិច្ចពឹងផ្អែកលើកសិកម្ម ទៅជាកន្លែងដែលបង្កើតនូវសកម្មភាពឧស្សាហកម្ម កម្មន្តសាល ដែលជាកន្លែងសម្រាប់ទាញមនុស្ស និងបង្កើតផលិតផលបន្ថែមជូនប្រជាជន។ សម្ដេចធិបតីនាយករដ្ឋមន្រ្ដីក៏បានកត់សម្គាល់ឃើញថា អ្នករស់នៅខេត្ដកំពង់ឆ្នាំង ជាខេត្តមួយដែលនឹងក្លាយទៅជាមូលដ្ឋានសំខាន់ នៃការផលិតផលិតផលឧស្សាហកម្មនៅថ្ងៃអនាគត ខណៈដែលផ្លូវជាតិលេខ៥ ត្រូវបានពង្រីករួចរាល់ហើយ ដែលវាបានក្លាយជាសក្តានុពលនៃការតភ្ជាប់មួយយ៉ាងសំខាន់។

សម្តេចធិបតីនាយករដ្ឋមន្ត្រីបានគូសបញ្ជាក់ទៀតថា៖ «យើងមានផែនការជាយូរមកហើយក្នុងការតភ្ជាប់ផ្លូវគមនាគមន៍ដឹកជញ្ជូនសម្រាប់ខេត្តកំពង់ឆ្នាំ ងទៅកាន់ខេត្តដទៃទៀត ប៉ុន្តែយើងមិនទាន់បានអនុវត្តន៍ពេញលេញ ក្នុងនោះមានការតភ្ជាប់ភាគខាងកើត និងភាគខាងលិចទន្លេសាប ស្រុកកំពង់លែង ខេត្តកំពង់ឆ្នាំង ទៅក្រុងស្ទឹងសែន ខេត្តកំពង់ធំ តាមផ្លូវ ៥០C ដែលត្រូវកសាងស្ពាន។ កន្លែងនេះយើងនឹងគិតគូរអំពីកំពង់ផែពហុបំណង និងមណ្ឌលភស្តុភារកម្មថែមទៀតផង»។

សូមជម្រាបជូនថា រោងចក្រដំឡើងរថយន្តរបស់ក្រុមហ៊ុន ធីអេច អូតូម៉ូធីវ មេនូហ្វេកឆឺរីង គឺជាក្រុមហ៊ុនរបស់ខ្មែរ ១០០% ដែលប្រើប្រាស់ទុនវិនិយោគជិត ២០លានដុល្លារអាម៉េរិក លើផ្ទៃដីសរុប ១១ហិកតា ស្ថិតនៅតាមបណ្តោយផ្លូវជាតិលេខ៥ គីឡូម៉ែត្រលេខ៦៦ ក្នុងស្រុកកំពង់ត្រឡាច ខេត្តកំពង់ឆ្នាំង។ បច្ចុប្បន្ន រោងចក្រមានកម្មករជំនាញចំនួន ២៥០នាក់ ដែលបានបណ្តុះបណ្តាលបច្ចេកទេសផ្គុំដំឡើងរថយន្តតាមស្តង់ដារអន្តរជាតិ ដោយក្រុមហ៊ុន GAC របស់ប្រទេសចិន។ រោងចក្រនេះមានសមត្ថភាពផ្គុំដំឡើងរថយន្តរហូតដល់ ២០ ០០០គ្រឿង ក្នុង១ឆ្នាំ៕

ដោយ៖ ចាន់ សុភឿន