AKP កំពង់ធំ ថ្ងៃទី១៦ ខែកញ្ញា ឆ្នាំ២០២៦ -- លោកឧត្តមសេនីយ៍ទោ ហេង សុផល ស្នងការនគរបាលខេត្តកំពង់ធំកាលពីថ្ងៃទី១៥ ខែកញ្ញា ឆ្នាំ២០២៦ បានដឹកនាំកងកម្លាំងចុះសាកសួរសុខទុក្ខ និងសំណេះសំណាលជាមួយបុគ្គលិកកម្មករ កម្មការិនី ដែលកំពុងបម្រើការងារនៅក្រុមហ៊ុនចំការកៅស៊ូ ភឿកហ្វា ស្ថិតនៅភូមិកំពុបអំបិល ឃុំបឹងល្វា ស្រុកសន្ទុក ខេត្តកំពង់ធំ។

លោកឧត្តមសេនីយ៍ទោ ហេង សុផល បានលើកឡើងថា ការចុះមកជួបសួរសុខទុក្ខ និងពិនិត្យស្ថានភាពនៅទីតាំងនេះ គឺអនុវត្តន៍តាមការយកចិត្តទុកដាក់របស់ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ និងឯកឧត្តម នួន ផារ័ត្ន អភិបាល នៃគណៈអភិបាលខេត្តកំពង់ធំ ព្រមទាំងតាមសំណូមពររបស់ក្រុមហ៊ុនចំការកៅស៊ូ ភឿកហ្វាផងដែរ។

លោកឧត្តមសេនីយ៍ទោស្នងការបានបញ្ជាក់ថា កងកម្លាំងនគរបាលត្រូវបន្តចុះពិនិត្យនិងសិក្សាស្ថានភាពភូមិសាស្ត្រដើម្បីពង្រឹងការការពារ និងថែរក្សាសន្តិសុខ សុវត្ថិភាព និងសណ្តាប់ធ្នាប់សាធារណៈ ព្រមទាំងបង្ការ ទប់ស្កាត់បទល្មើសគ្រប់ប្រភេទសំដៅធានាឱ្យបាននូវភាពសុខដុមរមនានិងសុវត្ថិភាពជូនប្រជាពលរដ្ឋ និងសង្គមជាតិ។

ក្នុងឱកាសនោះ លោកឧត្តមសេនីយ៍ទោ ហេង សុផល បានផ្តាំផ្ញើដល់បងប្អូនបុគ្គលិក កម្មករ កម្មការិនី ឱ្យយកចិត្តទុកដាក់ថែរក្សាសុខភាព ដោយរស់នៅស្អាត បរិភោគអាហារស្អាត មានអនាម័យ និងសម្អាតបរិស្ថានជុំវិញកន្លែងស្នាក់នៅឱ្យបានជាប្រចាំ ជាពិសេសត្រូវសម្រាកក្នុងមុងដើម្បីការពារខ្លួនពីជំងឺដែលបង្កឡើងដោយសត្វមូសខ្លា។

លោកឧត្តមសេនីយ៍ទោស្នងការ ក៏បានអំពាវនាវឱ្យបងប្អូនចូលរួមថែរក្សាសន្តិភាពស្រឡាញ់សន្តិភាព និងបន្តចូលរួមអនុវត្តន៍គោលនយោបាយ «ភូមិ-ឃុំ-សង្កាត់មានសុវត្ថិភាព» ដែលផ្តោតលើការផ្តល់សេវាសាធារណៈប្រកបដោយគុណភាពនិងតម្លាភាព ការទប់ស្កាត់ និងបង្ក្រាបបទល្មើស ការរក្សាសណ្តាប់ធ្នាប់សាធារណៈ ការទប់ស្កាត់គ្រោះថ្នាក់ចរាចរណ៍ អំពើអនាចារ ការជួញដូរមនុស្ស អំពើហិង្សាក្នុងគ្រួសារ និងក្មេងទំនើង ព្រមទាំងការដោះស្រាយវិវាទនៅមូលដ្ឋាន ការថែរក្សាអនាម័យ សោភណភាព បរិស្ថាន និងការត្រៀមឆ្លើយតបចំពោះគ្រោះមហន្តរាយ និងជំងឺឆ្លងរាតត្បាត។

ជាមួយគ្នានេះ លោកឧត្តមសេនីយ៍ទោស្នងការ ក៏បានណែនាំឱ្យបងប្អូនមានការប្រុងប្រយ័ត្នចំពោះការឆបោកតាមបច្ចេកវិទ្យានិងប្រព័ន្ធអនឡាញគ្រប់រូបភាព ដើម្បីការពារសន្តិសុខ សណ្តាប់ធ្នាប់សង្គម និងផលប្រយោជន៍ស្របច្បាប់របស់ប្រជាពលរដ្ឋនិងបានជំរុញឱ្យចូលរួមអនុវត្តន៍អនុក្រឹត្យលេខ០៣ ស្តីពីការគ្រប់គ្រងសន្តិសុខតាមទីតាំងរស់នៅប្រមូលផ្តុំ ដើម្បីរួមចំណែកបង្ការ និងទប់ស្កាត់បទល្មើសឆបោកតាមប្រព័ន្ធអនឡាញ។

លោកឧត្តមសេនីយ៍ទោស្នងការ បានផ្តាំផ្ញើថាប្រសិនបើបងប្អូនជួបប្រទះបញ្ហាប្រឈម ឬការលំបាកដោយប្រការណាមួយ សូមរាយការណ៍ជូនសមត្ថកិច្ចមូលដ្ឋាន ដើម្បីឱ្យកងកម្លាំងអាចចុះអន្តរាគមន៍ និងដោះស្រាយជូនបានទាន់ពេលវេលា៕

ដោយ ស៊ុម វណ្ណា